Niam să bi Y Phen Niê, bi gơtùi tam pà jơnau mờng chài bơh să tờm bi dê tàm broă lơh mpồl bal mờ lơh broă sa?

Đảng viên Y Phen Niê: “Mờ gơnoar broă là Củ tịc Mpồl cau lơh broă sa xã Dray Sáp, mờ kung là đảng viên, să tờm añ sùm lơh gơs ală broă geh jào, sùm pal lam lài tàm ală broă lơh nàng làng bol tàm mpồl đờm jăt bal. Nàng làng bol gŏ geh broă lơh añ dê geh cồng nha, làng bol pin dờn mờ geh đờm jăt bal. Añ kung bơto sồr làng bol lơh sa hìu nhă nàng bơtàu tơnguh rơlao, nàng rài kis ngai sơlơ kơl jăp. Tàm hìu kung sùm lam lài, lài jơh klà kòn bao, tơnơ̆ hơ̆ là cau tàm jơi nòi ƀòn lơgar, kis lơh jăt sơnoa bơh lam mờ adăt boh lam, tơriang tơriồng lơh broă, lam lài nàng làng bol đờm jăt bal. Là dùl nă cau đảng viên Đảng Kộng sản Việt Nam dê, añ sùm pal lam lài tàm ală broă lơh, yal ală gùng dà broă lơh bơh Đảng, Adăt boh lam bơh Dà lơgar nàng làng bol in git, nàng làng bol lơh jăt bal. Bơh tŭ hơ̆, làng bol geh tam klăc bal rơlao tàm ală broă lơh tàm xã dê”.

Ơi, tŭ do, bi là dùl tàm ờ uă ngan cau tàm mpồl cau lơh broă sa xã Dray Sáp dê geh priă rơlao nggùl tơmàn đong pah nam bơh broă ròng phan mờ tam phan, bi gơtùi tam pà bal broă mờng chài nàng lơh geh cồng nha do, ơ bi?

Đảng viên Y Phen Niê: “Hìu añ geh rơlao 5 lồ ù tam phan bơtàu tơnguh lơh sa. Bol añ lơh sre, tam tiêu, kao su, kơphe… Pah nam hìu añ geh kung mờr 500 tơlăk đong, ờ kờp priă tă tàm broă lơh, gam geh priă cồng rơlao 300 tơlăk đong… bơdìh hơ̆ tai, hìu añ geh lơh 2 ròt wàng ròng sur ơnàng rơlao 200 thơ̆k vuông, ròng bơh 5 tus 6 nơm sur me, ală sur ndrờm geh lời ròng nàng deh sur tăc poăc. Tŭ do geh bơh 50 tus 60 nơm sur, tơl dơ̆ tăc geh bơh 4 tấn sur poăc”.

Bơdìh mờ broă lơh sa kă bro jăk, bi gam sùm lam lài tàm broă tă tơl ală khà priă bơ̆t bơtàu ƀòn lơgar pa tàm xã dê. Dan bi tam pà bè tơngu me do?

Đảng viên Y Phen Niê: “Tàm broă bơ̆t bơtàu ƀòn lơgar pa añ kung sùm lam lài làng bol tàm broă bơtàu tơnguh lơh sa, gàr niam bơta lơngăp lơngai ƀòn lơgar, bơ̆t bơtàu rài kis hờm ram. Mờ kơnòl broă bơh dùl nă cau đảng viên, añ geh lam sồr làng bol tàm ală broă lơh, dà lơgar bal mờ làng bol lơh bal, bơ̆t bơtàu ƀòn lơgar pa geh cồng nha. Añ sùm bơto bơtê làng bol pal tam klăc bal, dùl nùs bal bơ̆t bơtàu ƀòn lơgar ngai sơlơ bơtàu tơnguh mờ hờm ram rơlao”.

Là Củ tịc Mpồl cau lơh broă sa xã Dray Sáp dê, ală nam do broă dong kờl làng bol bè bơta chài, priă, sơn tìl phan tam, phan ròng… nàng làng bol bơtàu tơnguh lơh sa, tơn jơh jơgloh tơmù rơƀah geh lơh bè lơi, ơ bi?

Đảng viên Y Phen Niê: “Tàm gơnoar broă là Củ tịc Mpồl cau lơh broă sa, añ sùm pơgồp bal mờ ală kông ty, mpồl lơh sa kă bro, ală cau chài lơh sa suơn sre nàng bơto sồr bơta chài làng bol in tàm broă lơh sa, tam tiêu, kơphe, kao su, ală bơta tờm chi sa plai, ròng kơnrồ, sur, iar, be… nàng làng bol geh git bơta chài pa ngan tŭ do, ngui tàm broă lơh sa nàng geh uă cồng nha, bơta niam mờ priă geh làng bol in. Mờ añ sùm pơgồp bal mờ ală mpồl ai càn priă, jòi geh priă càn sa priă cồng ờ uă nàng dong kờl làng bol gam gơtìp kal ke in geh priă tă tàm broă lơh sa, bơtàu tơnguh bal, ai geh priă uă ală hìu nhă in”.

Ơi, dan ưn ngài bi uă ngan!