Là tiah rềp nhàr đah 2 xã Dăk Nuê mờ Dăk Liêng, den tàng gùng dờng 27 gơl lòt gan ƀòn Tơ, xã Dăk Liêng, kơnhoàl Lăk, càr Dăk Lăk lài do là dùl tiah gơlik geh uă ngan bơta tuh sang sồ siă mờ dùl anih tơrgùm sang sồ siă lơh is jòng mờr 100 thơk. Nàng lơh niam “tiah ờ niam” do, đoàn ơruh pơnu 2 xã Dăk Liêng mờ Dăk Nuê neh sùm khòm tơrgùm mờ lơh niam sồ siă, mờ kung crăp camera jat sền nàng git gŏ mờ lơh glài ală cau lơh tìs. Jat bi Sao Mai Len, Ƀí thư Đoàn xã Dăk Liêng pà git, jơnau bơceh lơh “crăp camera lơngăp lơngai tơn jơh tiah tơrgùm tuh sang sồ siă” geh lam lơh bơh lồi nhai 7 nam 2023, neh mhar ngan lơh geh cồng nha: “Lài do den bol hi kung neh tồt ƀàng cih là bañ tuh sang sồ siă, mơya ờ geh cồng nha. Tơnơ̆ tŭ bol hi crap camera den kung geh 2 nă cau lơh tìs, dùl nă cau den tơngkah sồr wàs sàng goh tơn tàm anih tuh sang sồ siă. Cau dơ̆ 2 den Ủy ƀan Ñân zân xã tơlik kơrnuat lơh glài, khà lơh glài là 1 tơlak đông. Đơs bal mờ tơnơ̆ tŭ bol hi lam lơh broă lơh camera do den uă cau neh git kung ờ huan geh bơta tuh sang sồ siă. Jơnau git wă bơh làng bol dê kung neh geh tơnguh, ờ hềt geh cau lơi lơh tìs tai”.

Bi Phan Thị Hoa ơm tàm ƀòn Tơ, xã Dăk Liêng ơm kis rềp hơ̆ kung sền gŏ ală bơta tam gơl niam bơh broă do: “Bơh ngai geh crap camera den gŏ neh tam gơl bơh 70 tus 80%, ndrờm bè tŭ do ờ gam bơta tuh sang sồ siă tàm hơ̆ tai. Lơh bè lơi nàng tiah ơm kis, gùng lòt sàng goh den he kờñ tus bal jơh, tài hơ̆ là broă drơng bơta kuơ bơh mpồl bơtiàn dê in”.

Nàng tơn jơh anih tuh sang sồ siă tàm tiah rềp bal, đoàn viên, ơruh pơnu 2 xã Dăk Liêng mờ Dăk Nuê gam tam tờm  nhơt khoah phòng ai gơl gùng in. Tus tŭ do, tiah do neh sơn đờm lì bơkàu niam ngan tàm ală nha nhơt tơlir.

Jat bi Phạm Ngọc Thắng, Ƀí thư Huyện đoàn kơnhoàl Lăk pà git, crap camera mờ tam bơkàu nàng tơn jơh anih tơrgùm tuh sang sồ siă là broă lơh pa, bơceh pa, di mờ bơta geh ngan tàm do. Bơh hơ̆ pơgồp bơnah tơnguh gơnoar broă bơh ơruh pơnu dê tàm broă lơh sền gàr tiah ơm kis, bơdìh mờ ală broă lơh ai cau lơh broă at tê bal sền gàr tiah ơm kis, Ngai dơ̆ 7 lơh broă dong kờl is halà Ngai rlô rơlir neh geh lam lơh bơh lài tus tŭ do. Broă crap camera mờ ngui ală kơrnuat lơh glài ờ di nàng kờñ ai priă lơh glài, mơua bơh broă lơh glài 2, 3 nă cau lơh glài nàng lơh krơh cau ndai in đòm jat den rơp lơh gơlik bơta gơ rề tàm làng bol, dong khi git wă rlau tàm broă khòm, tơrgùm sồ siă: “Bơh broă lơh bè do den niam ngan mờ di ngan, đoàn viên ơruh pơnu gơtùi dong kờl tàm broă sền gàr tiah ơm kis. Tàm tơngai tus, Mpồl lơh kơnòl broă sùm Huyện đoàn kơnhoàl kờp dŭ rơp lam lơh uă dồ ròt tàm 11 xã, thị trấn, tơl xã rơp lơh dùl tiah. Tơnơ̆ hơ̆, ală xã rơp tàm pơgồp is mờ Mpồl atbồ is ală thôn, ƀòn, lam lơh uă is broă lơh do. Crap camera do là ală broă lơh sơn rờp nàng gơtùi dong tơnguh jơnau git wă làng bol dê, mờ kung rơp ngui kơrnuat lơh glài, bơh hơ̆ den làng bol rơp git wă rlau. Kung kơp kờñ ngan là hòi jà ală đoàn viên, ơruh pơnu lơh ală hợp ták xã khòm tơrgùm sồ siă, dilah geh bơta ring bal bơh làng bol dê tus bal tă pơgồp den là niam ngan”.

Kung jat bi Phạm Ngọc Thắng đơs, jơnau bơceh lơh crap camera mờ tam bơkàu nàng kơryan bơta tuh sang sồ siă bulah neh lơh geh cồng nha niam, mơya ờ gơtùi tơn jơh bơta tờm bơh broă do dê. Ờ tuh sang sồ siă tiah do den làng bol gơtùi tuh sang tàm tiah ndai, tài tŭ do, uă ƀòn, xã tàm kơnhoàl ờ hềt geh ƀlàng tơrgùm tuh sang sồ siă mờ ờ hềt geh broă drơng ala khồm tơrgùm sồ siă. Mìng tŭ lơi broă khòm tơrgùm, lơh niam sồ siă geh bơsong ndrờm bal, ală camera, suơn bơkàu, nhơt tam kơryan sồ siă hơ̆ sồng rơp gơtùi lơh geh cồng nha jŏ jòng.