Pe nam pa do, kơnờm mờ broă tam gơl dùl bơnah bă ù tam kơphe neh kra, ai cồng nha ờ uă nàng tam tờm jơu ròng tu, broă lơh sa hìu ồng K’ Bát, kis tàm thôn Păng Dung, xã Dà K’Nàng, kơnhoàl Dam Rong neh gơguh loh làng ngan. Ồng K’ Bát pà git, lài do mìng tam kơphe den tàng pah nam priă geh mìng dùl dơ̆, bơh ngai tam tờm jơu ròng tu den nhai lơi kung geh priă sùm. Ờ mìng hìu ồng mờ geh uă làng bol kis tàm do ndrờm tam gơl phan tam jăt jơnau bơto sồr bơh gơnoar atbồ tàm xã, bơh tŭ hơ̆ rài kis làng bol neh bơtàu tơnguh uă ngan pơn drờm mờ lài do. “Lài do, tŭ ờ hềt git ngui bơta chài tàm broă tam kơphe den khà tơnhào geh ờ hềt uă, rài kis làng bol kal ke ngan. Bơh ngai neh git ngui bơta chài tàm broă sơnka sền gàr, tam gơl phan tam, tam gơl dùl bơnah bă ù suơn tam kơphe nàng tam tờm jơu ròng tu mờ ờ uă bơta tờm chi sa plai den priă geh bơh làng bol dê neh gơguh. Tŭ do lơh sa hìu nhă añ đơs is mờ làng bol kis tàm ƀòn đơs bal neh bơtàu tơnguh uă rơlao mờ lài ngan”.

Kung ndrờm bè hơ̆ sơl, ồng Lơ Mu Ha Bình, kis tàm thôn Dà Mun, xã Dà K’ Nàng neh ai broă lơh sa hìu nhă gơguh pa tài bơh broă tam tơl 2 lồ ù tam kơphe neh kra nàng tam tờm măk ka. Ồng Bình pà git, lài ngan kung ờ sŭk sơl, mơya kung kơnờm geh kwang bàng bơto pơlam tàm broă sơnka sền gàr den tàng suơn tam phan sùm geh hòn gơs niam. Tàm kàl tơnhào lài do, suơn tờm măk ka hìu ồng neh tơnhào geh 2 tấn plai, hìu ồng geh priă cồng mờr 200 tơlăk đong. Ồng Lơ Mu Ha Bình đơs: “Tam tờm măk ka geh cồng nha uă, priă lơh geh sùm, ƀuơn tam, sền gàr ờ gơtìp kal ke mờ ờ hoan roh tơngai, priă tă ờ uă rơlao mờ sơnka sền gàr suơn kơphe dê. Bơh ngai tam gơl tam tờm chi do, lơh sa hìu nhă añ neh gơguh loh làng ngan. Ưn ngài Đảng mờ Dà lơgar neh ai geh gùng dà broă lơh, dong kờl làng bol tam gơl phan tam, cèng geh cồng nha lơh sa hìu nhă in”.

Tŭ do bơdìh mờ bă ù ơnàng 3 rơbô 200 lồ ù tam kơphe, xã Dà K’ Nàng neh tam bơrlŭ bal geh 885 lồ tờm măk ka, git nđờ rơhiang lồ ù tam tờm chi sa plai mờ tờm jơu ròng tu, 60 lồ ù tam biăp, bơkào ală bơta jăt gùng dà broă lơh sa suơn sre kông nghệ kao. Bơdìh hơ̆ tai, gam geh ờ uă bă ù tam tơrlòng phan lơh sơnơm, tờm sơnơm brê mờ lài ngan pà gŏ geh bơta di pal. Pal kah ngan, phan geh bơh prìt laba xã Dà K’ Nàng dê neh geh dờp khà phan OCOP mờ tăc tus drà kă bro ală lơgar tàm tiah do. Lơh sa bơtàu tơnguh den tàng priă geh tơl nă làng bol kung gơguh sơl 45 tơlăk đong tàm 1 nă 1 nam; khà hìu rơƀah tàm xã Dà K’ Nàng kung neh mhar gơmù bơh 17% gam 5% jăt khà rơƀah pa uă bơta dê.

Ồng Kon Sơ Ha Wớp, kis tàm thôn Dà K’ Nàng, xã Dà K’ Nàng pà git, lơh sa gơguh den nùs nhơm git wă bơh làng bol dê kung rơhời gơguh sơl. Cau lơi kung rơcang tàm broă lơh sa, ờ gam geh nùs nhơm kơ̆p gơn tus mờ broă dong kờl bơh Dà lơgar dê tai. Bơh tŭ hơ̆, mpồl tam jlăc jơi bơtiàn kòn cau ngai sơlơ geh gơguh, bơta lơngăp lơngai cíñ trị mờ niam mpồl bơtiàn geh gàr kơl jăp. Làng bol ndrờm git tus bal tàm broă bơ̆t bơtàu ƀòn lơgar pas gơs pràn kơl dang. “Lài do ờ hềt geh gùng lòt, hìu bơsram, hìu sơnơm, den tŭ do neh geh tơl, niam rơlao mờ lài do uă ngan bloh. Gùt xã lài do mìng tam kơphe lơm, ờ geh tam bơrlŭ bal ală bơta phan tam ndai, den tŭ do neh geh tam gơl, tam tờm jơu ròng tu. Bè tơl hìu ròng 1 dra tu den priă geh 12 tơlăk đong tàm 1 nhai, is ngan mờ broă lơh kơphe. Đơs bal lài do làng bol kis tàm do ờ git tàm broă lơh sa, tàm 2, 3 nam do den neh is ngan, geh nùs nhơm lơh is. Ờ geh nùs nhơm kơ̆p gơm tai, sơbì bơta ờ niam mờ bơyai lơh uă broă tam gơl pa”.

Xã Dà K’ Nàng geh mờr 2 rơbô hìu làng bol, tàm hơ̆ làng bol kòn cau geh rơlao 45%. Jăt ồng Nguyễn Bá Nhân, Củ tịc UɃÑZ xã Dà K’ Nàng yal, kơnờm mờ gùng dà broă lơh di pal bơh kấp ủy mờ gơnoar atbồ xã tàm broă tam gơl phan tam jăt gùng dà tơnguh uă bơta kwơ phan ka bro, xã Dà K’ Nàng neh lơh gơs ală tiah tam phan tờm mờ di pal. Kơnờm hơ̆, tàm tŭ gùt lơgar gam gơtìp kal ke tài kòp Kovid-19 den xã Dà K’ Nàng kung gam lơh gơs jăt khà ƀòn lơgar pa tàm nam 2021. Ồng Nguyễn Bá Nhân đơs: “Dà K’ Nàng  5, 7 nam lài là mìng tam tờm kơphe, xã neh lơh jăt broă tam gơl uă bơta phan tam, cèng geh cồng nha lơh sa uă loh làng. Priă geh tơl nă cau neh gơguh uă; bơh khà hìu rơƀah 17% tŭ do mìng gam 5,03% jăt khà rơƀah pa uă bơta dê. Làng bol kòn cau den geh uă hìu brồ guh tơl ngui tơl sa mờ geh tŭ lơh pas. Tŭ do xã bol añ gam pơn jăt tai bơ̆t bơtàu ƀòn lơgar pa tơnguh uă, ai xã Dà K’ Nàng ngai sơlơ bơtàu tơnguh”.

Bal mờ broă tam gơl phan tam, bơ̆t bơtàu ală tiah tam phan tơrgùm bal mờ tơl bơta phan tam gơdờp bal, xã Dà K’ Nàng gam lơh ngan lơh pràn broă bơ̆t bơtàu ală mpồl pơgồp bal lơh sa mờ blơi lài phan geh lơh, gàr niam broă tăc ai phan geh lơh bơh broă lơh sa suơn sre xã in. Mờ gùng dà broă lơh do, pin dờn xã Dà K’ nàng geh lơh gơs xã ƀòn lơgar pa tơnguh uă tàm nam 2024 bè jơnau neh geh ai.