VOV4.K’ho - Drim òr (30/09), UɃÑZ càr Dăk Nông bơyai lơh yal kơrnoăt bơh Thủ tướng Cíñ phủ, dờp ƀòn dờng Gia Nghĩa lơh gơs kơnòl bơ̆t bơtàu ƀòn lơgar pa mờ dờp huân cương Lao động khà pe bơh Củ tịc lơgar jào pà.

Pơrjum yal kơrnoăt bơh Thủ tướng Cíñ phủ dờp ƀòn dờng Gia Nghĩa lơh gơs kơnòl bơ̆t bơtàu ƀòn lơgar pa mờ dờp Huân cương Lao động khà pe

Bơh 10 nam bơ̆t bơtàu ƀòn lơgar pa, tus nam 2020, 2 xã tàm ƀòn dờng do neh geh Củ tịc càr Dăk Nông dờp geh khà ƀòn lơgar pa. Tàm kơrnoăt sồ 472 ngai 18/04/2022, Thủ tướng Cíñ phủ neh dờp ƀòn dờng Gia Nghĩa neh lơh gơs kơnòl bơ̆t bơtàu ƀòn lơgar pa. Đơs tàm dơ̆ pơrjum, ồng Đỗ Tấn Sương, Củ tịc UɃÑZ ƀòn dờng Gia Nghĩa pà git, tơnơ̆ mờ tŭ lơh gơs 19 tàm 19 khà broă ƀòn lơgar pa, muh măt ală xã tàm ƀòn dờng neh geh uă tam gơl niam, lơh sa gơguh uă, broă lơh sa geh tam gơl niam. Priă geh tơl nă cau tàm ală xã tŭ do geh rơlao 53 tơlăk đong tàm 1 nă 1 nam, gơguh 2,6 dơ̆ pơn drờm mờ nam 2011. Ƀòn dờng Gia Nghĩa tŭ do mìng gam 146 hìu rơƀah, geh 0,77%. Do là bơta niam nàng ƀòn dờng Gia Nghĩa pơn jăt tai tơnguh tàm tơngai tus.

VOV Tây Nguyên/Cau mblàng Ndong Brawl