Lòt tàm gơl gùng tuh mờ bê tông sàng goh bal mờ bềng bơkàu gam lì niam ngan, tơrbŏ ƀòn Ia Nueng lòt tus ù tiah niam tiơng pơn rơ Biển Hồ, kra ƀòn Hmrick chờ hờp pà git, do là dùl tàm ală broă lơh geh lơh bơh srơh bơt bơtàu ƀòn lơgar pa, geh dà lơgar bơcri priă lơh, ai làng bol den tă pơgồp ngai lơh gùng. Gùng lòt tàm ƀòn sàng goh ờ mìng dong ƀòn Ia Nueng hàng niam rlau mờ gam dong làng bol pơndiang phan lơh gơs bơh suơn sre ƀuơn rlau mờ lài uă ngan.

Tŭ do, tàm ƀòn, hìu lơi kung lơh hìu jă brê sàng goh, ờ gam bơta phan 4 jơng ròng hơ đơm rồm hìu rơng bè uă nam lài tai. Kra ƀòn sùm nting tơngkah kòn sau pal lơh jat niam ală gùng dà, broă lơh bơh Đảng mờ Dà lơgar dê: "Xã Biển Hồ lơh ngan bơt bơtàu ƀòn lơgar pa gơguh jơnhua bè ală broă jàu neh ai tơlik. Tàm nam 2024 do den bol hi rơp lơh ngan hòi jà làng bol nàng làng bol git mờ at tê bal bơt bơtàu xã ƀòn lơgar pa gơguh jơnhua. Làng bol tàm ƀòn kung pal lơh ngan bal mờ gơnoar atbồ xã, thôn, mblàng yal làng bol in git loh nàng làng bol dùl nùs bal, lơh bal mờ gơnoar atbồ tàm ƀòn lơgar, lơh di bè ală broă jàu neh ai tơlik.”

Rềp ƀòn Ia Nueng, ƀòn Phung kung geh uă bơta tam gơl pa sơl. Ờ mìng gùng bê tông pa, hìu pơrjum ƀòn dờng niam, mờ hìu niam chài ờs mờng bơh làng bol dê kung ngai sơlơ geh ngui uă sơl. Ồng Đưk, atbồ ƀòn Phung pà git, cau ùr tàm ƀòn neh crơng gơs hợp ták xã tàñ ồi kòn cau, rơhời lơh kwèng mờ broă lơh gơlik, tac ală phan mòn mờ tê bơh yau, gơ jat bal mờ bơtàu tơnguh lòt nhơl. Tàm ƀòn kung geh mpồl cing mồng geh 43 nă cau, là anih pơrjum niam chài chờ hờp, niam bơnĕ bơh ơruh pơnu dê. Ồng Đưk pà git, nam 2024, làng bol ƀòn Phung pơn jat tai lơh ngan lơh sir ală broă jàu ờ hềt lơh gơs: “Pa do, ƀòn Phung pa geh dờp là ƀòn lơgar pa, bơta do lơh làng bol tàm ƀòn chờ hờp ngan tài geh Đảng, dà lơgar sền gròi, tŭ do làng bol tàm ƀòn lơh ngan blơi ƀảo hiểm y tế. Bơh broă lơh hòi jà, mblàng yal den làng bol kung neh git bè bơta kuơ, tài tŭ kòp tê jê să den broă sơm kòp rơp geh dong kờl dùl bơnah, dong tơrmù ƀà bơta kal ke bè priă jền. Dơ̆ 2 tai là ală hìu bơnhă kung lơh ngan tàm broă lơh niam ù tiah ơm kis, lơh dờng gùng lòt, gàr sàng goh ƀòn lơgar, lơh ngan lơh broă bơtàu tơnguh lơh sa hìu bơnhă, pơn jat hơ̆ lơh broă yal sồ mat làng bol tàm điện tử bol hi rơp lơh ngan dong kờl nàng gàr 100% khà kờp làng bol lơh gơs broă yal sồ mat làng bol điện tử”.

Jat mò Đinh Thị Hoa – Phó Củ tịc Ủy ƀan Ñân zân xã Biển Hồ pà git, tus tŭ do xã neh lơh gơs 16 tàm 19 broă jàu bơh bơt bơtàu ƀòn lơgar pa gơguh jơnhua dê. Jat hơ̆, jơh ală gùng lòt ală thôn jòng 20 kơi sồ neh geh tuh bê tông jơh, rlau 17 kơi sồ gùng lòt tàm ƀlàng sre geh lơh kơ̆ kơljap. Ală broă lơh niam chài bè hìu rông, hìu pơrjum ƀòn geh lơh dờng niam. Tàm tơl ƀòn, làng bol neh rơhời lơh kwèng mờ broă lơh sa suơn sre jat tơl khà, rlau 90% bă ù lơh sa suơn sre neh geh ngui măi mok, ƀồm dà mờ măi ƀồm is mờ tềm pềr. Ală bơta tàm rài kis bè ngui dà sàng goh, geh sền gàr tàm gah lơh sơnơm, geh anih nhơl ñŏ, lơh prài bồ tơngoh bơh làng bol dê ndrờm geh gàr niam. Bulah bè hơ̆, tài bơta krơi is bè bơhiàn bơh yau den tàng 2, 3 broă jàu bè 3% khà cau sang rài geh chu ƀồc halà broă jàu bè lơh sồ yal mat làng bol điện tử, rơndap lơh sa, pal pơn jat tai lơh sir tàm ală nam pơn jat tai: “Nam do priă lơh geh kờp bal tàm dùl nă cau là 57 tơlak 600 rbô đông dùl nă cau dùl nam là sơrlèt rlau mờ broă jàu ai tơlik. Dơ̆ 2 là phan bơna xã dê geh lơh niam, gùng lòt ƀòn lơgar geh tuh mờ bê tông geh 97% mờ gam lam lơh nàng lơh gơs kơnòl broă nam 2023. Rài kis bơh làng bol dê geh tơnguh loh làng, priă lơh geh uă. Broă bơt bơtàu ƀòn lơgar pa gơguh jơnhua cèng wơl uă cồng nha mờ bơta kuơ di mờ jơnau đơs “Làng bol geh git, geh lơh mờ geh dờp kuơ”.

Mờ bơta dùl nùs bal bơsong kal ke, gơnoar atbồ mờ làng bol xã Biển Hồ, ƀòn dờng Pleiku gam pơn jat tai lơh ngan bơt bơtàu ƀòn lơgar pa gơguh jơnhua ngai sơlơ bơtàu tơnguh rlau tàm ù tiah kơh bơnơm Gia Lai.