Tơnơ̆ tŭ geh jơnau sồr bơh Mpồl Tam klăc cau ùr kơnhoàl dê, Mpồl Tam klăc cau ùr xã Cốc Lẩu, kơnhoàl Bắc Hà neh rwah bơ̆t bơtàu broă lơh gùng bơkàu ala ñhơ̆t hòn lềng gơ jăt bal mờ kơnòl broă bơ̆t bơtàu ƀòn lơgar pa. Gùng ƀòn, thôn, ƀòn geh tam bềng ală bơkàu bềng rùp să bè bơkàu jơ̆t jiơ, bơkàu sam, kuk nđar kung kìm, mho dum luañ...Jơh ală lơh gơlik gơs bơta niam bơh ƀòn lơgar tiah kơh bơnơm lơngăp lơngai niam bơnĕ dê. Bi Lùng Thị Hà ơm tàm xã Cốc Lẩu, kơnhoàl Bắc Hà, càr Lào Cai pà gĭt: Oh mi tàm thôn cau lơi kung jơh nùs lơm, lơh jăt srơh do. Đơs bal cau lơi kung jơh nùs tàm broă, jàu kơnòl bal nàng tam bơkàu, sền gàr jơh nùs jơh tồr ngan. Broă bơ̆t bơtàu tàm bơ̆t bơtàu ƀòn lơgar pa do gơwèt mờ bol añ den là niam ngan. Tàm ală gơl gùng cau lơi kung tơryăng tơryồng lòt ai bơkàu cèng rê tam nàng gơl gùng ngai sơlơ niam rlau.

Do mìng là dùl êt tàm gĭt nđờ rhiang kơi sồ gùng ƀòn lơgar pa geh gàr sùm mờ rề ơnàng lơh uă broă lơh gơl gùng 3 sàng goh, gơl gùng ƀòn lơgar pa tàm ù tiah càr Lào Cai dê. Bơtơl dùl nơm bơkàu, tơrmù tĕ dùl kơldung sồ siă lơh mrềt niam ală ngai trồ tơngai duh tơrồ ngan, nàng gùng ƀòn in sơlơ sàng goh niam bơnĕ. Ờ mìng là srơh, mờ broă lơh do neh gơ gơs là jơnau gĭt wă bal, lơh is bơh oh mi cau ùr tiah do dê. Ƀòn Tổng Kim là dùl tàm ală ƀòn kal ke ngan rlau jơh bơh xã Vĩnh Yên, kơnhoàl Bảo Yên dê bal mờ 100% làng bol kòn cau Mông ơm kis. Mpồl Cau ùr kơnhoàl mờ càr neh lòt tus tơn tàm hìu mblàng yal, hòi jà ală oh mi cau ùr tàm xã lơh sàng goh is hìu đam he dê lài, tơnơ̆ hơ̆ tus gùng thôn, gùng ƀòn. Tŭ do, srơh tam mờ sền gàr ală gơl gùng bơkàu gơ gơs là broă lơh sùm bơh oh mi cau ùr tàm xã dê. Tŭ do, ờ gam tai jơnau sơrbì sồ siă khăt gơboh tềng gah gùng. Bi Sùng Thị May, pà gĭt: Tàm thôn añ dê pal lơh sàng goh gơ in sền gàr sàng goh là sền gàr ai să tờm he dê in, ai ƀòn lơgar he dê in, là sền gàr ai Đảng mờ Dà lơgar in.

Tŭ do, càr Lào Cai geh rlau 250 gơl gùng bơkàu cau ùr rùp să pa thôn ƀòn, gùng bơkàu ƀòn lơgar pa, gùng drà đèng gùng bơkàu mờ kờp jơh priă tă lơh mờr 3 tơmàn đong ờ gŏ kờp tơngai lơh broă bơh ală kâp mpồl cau ùr tàm jơh gùt càr dê lơh. Do là cồng nha bơh bơta bơceh lơh tàm broă lơh jăt broă jàu 3 sàng goh gơ jăt bal mờ broă sền gàr tiah ơm kis mpồl cau ùr ală kâp. Srơh tam bơkàu kềng gah gùng neh lơh gơrề tus tơl thôn, ƀòn. Broă lơh gơs ală gơl gùng bơkàu neh lơh tam gơl bơta gĭt wă bơh làng bol dê sàng goh tiah ơm kis, gĭt wă lơh niam bơnĕ ù tiah thôn ƀòn geh tơnguh tai loh làng ngan. Mò Hà Thị Khánh Nguyệt, Củ tịc Mpồl Tam klăc cau ùr càr Lào Cai, pà gĭt: Bal mờ dơ̆ hòi jà bơ̆t bơtàu hìu bơnhă “5 ờ 3 sàng goh”, Mpồl Tam klăc cau ùr ală kâp kung neh sơlơ mblàng yal tai, hòi jà cau ùr tàm mpồl nàng lơh jăt ală broă jàu tàm dơ̆ hòi jà do. Dơ̆ hòi jà do kung geh gal ngan cau ùr tàm mpồl tus bal jơh nùs ngan, gơ jăt bal mờ broă bơ̆t bơtàu ƀòn lơgar pa, kwơmàng mờ xã bơ̆t bơtàu ƀòn lơgar pa gơguh uă, lơh krơh lài.

Tam bơkàu kềng gah gùng ƀòn lơgar gam là broă lơh geh kwơ ngan, pơgồp bơnah sền gàr kềng gah gùng lơngăp lơngai lòt rê, sền gàr tiah ơm kis, lơh sàng goh niam bơnĕ ù tiah ƀòn lơgar. Mờ jơnau đơs, ờ gŏ di pal lòt jòi tiah lơi ngài, bơta niam sùm gơtùi tus bơh ală bơta ƀươn soh ngan rlau jơh, rềp mềl ngan rlau jơh tàm rài kis, ală gơl gùng bơkàu ƀòn lơgar cèng bơta kwơ ƀươn soh ngan, là cơng tàng tơngŏ ai bơta tam gơl pa, bơtàu tơnguh in mờ broă lơh bơ̆t bơtàu ƀòn lơgar pa neh cèng wơl. Bơh sơnrờp mìng là tam tơrlòng lài tàm bàr pe tiah làng bol ơm kis lơh krơh lài, tŭ do broă lơh tam bơkàu jăt kềng ală gah gùng lòt ƀòn lơgar tiah kơh bơnơm neh geh rề ơnàng lơh uă tàm uă tiah. Tàm uă tiah, broă tam mờ sền gàr bơkàu gam gơ jăt bal mờ broă pơs wàs, lơh sàng goh gùng ƀòn gùng thôn. Bơh hơ̆, pơgồp bơnah dong ală tiah lơh jăt niam broă jàu bè tiah ơm kis tàm broă lơh bơ̆t bơtàu ƀòn lơgar pa tàm tiah ƀòn lơgar mờ tiah kơh bơnơm.