Bol añ tus kơnhoàl Lâm Hà di dơ̆ làng bol jơi bơtiàn kòn cau tiah do gam hô hơng tàm Ngai chờ tam klăc dờng- gờm chờ Kơnhoàl tơl khà ƀòn lơgar pa. Tơmŭt bồp tàm yăng tơrnờm “Dà Mpao”, ồng Kră Jañ Nhang- Kra ƀòn thôn Dà Mpao, xã Dà Dờng, kơnhoàl Lâm Hà pơn yờ să yal: hơ̆ là phan bơna OCOP bơh xã dê, geh ai ngui nàng yal tơngĭt tàm ngai chờ do. Kra ƀòn gam blàng tai là sơnđan mat tơrnờm là “Dà Mpao” là dà kòn cau K’Ho dê, jat dà yoan mblàng là “Suối Mơ”.

Ồng Kră Jañ Nhang- Kra ƀòn thôn Dà Mpao đơs: Làng bol tus bal Ngai chờ tam klăc jơh gùt làng bol chờ hờp ngan, Đảng, Dà lơgar jŏ jŏ bơyai lơh Ngai chờ tam klăc dờng jơi bơtiàn kòn cau bè do, jơh tơl nă cau tus bal ală broă lơh tàm ngai chờ dê chờ hờp mờ chờ hờñ ngan. Làng bol tă pơgồp bal ngai lơh broă, tă pơgồp bal phan bơna, pà is ù nàng bơtàu tơnguh ƀòn lơgar, bè: lơh gùng, pơs wàs sàng goh thôn, ƀòn kloh niam, lơh sa ngai sơlơ bơtàu tơnguh. Làng bol kung prap gàr bơhiàn niam chài jơi bơtiàn kòn cau tàm do, tàm hơ̆ geh dròng cing jañ mồng, tàñ ồi kòn cau... Bè bơtàu tơnguh lơh sa den tơl nă cau ndrờm bơcri priă ròng phan poan jơng, iar ada, tam kơphê, lơh kòi sre. Kơnờm bơh hơ̆ rài kis làng bol ngai sơlơ bơtàu tơnguh.

Gùng lòt tus ală xã bơh thị trấn Đinh Văn tus ală xã geh pờ ơnàng, lòt gan uă mìr kơphê dờng ơning ơnàng tàm bơrlŭ bal mờ tờm sầu riêng mờ ală bơta tờm chi sa plai. Tus dùl tiah làng bol ơm kis pas gơs ngan, geh uă hìu kwơ̆ dờng niam ngan, làng bol gam sơng ka sền gàr khàp bơkào, khàp tờm chi bơka niam jat kềng 2 gah gùng mờ pơs wàs sàng goh tiah ơm kis nàng wă rò nam pa. Ồng K’ Brối- Củ tịc Ủy ƀan Mặt trận Dà lơgar Việt Nam xã Liên Hà yal: “Liên Hà” là mat sơnđan bơh dùl xã tàm kơnhoàl Đan Phượng, ƀòn dờng Hà Nội dê, tŭ làng bol mŭt tàm càr Lâm Đồng  bơt bơtàu lơh sa pa. Jơh gùt xã geh rlau 2 rơbô hìu bơnhă làng bol mờ pơgap 9 rơbô nă cau. Tơnơ̆ tŭ geh dờp “Xã ƀòn lơgar pa” bơh nam 2019, jơh gùt làng bol pơn jat tai pơnđơl pràn lơh ngan nàng bơt bơtàu lơh sir broă lơh ƀòn lơgar pa tơnguh uă.

Ồng K’ Brối đơs: Tơnơ̆ tŭ xã Liên Hà geh dờp là xã ƀòn lơgar pa den geh Nghị quyết mìng dùl tơngume đah Ủy ƀan Ñân zân zã mờ Ủy ƀan Mặt trận Dà lơgar, pơn jat tai lơh jat nùs nhơm tam klăc bal pơnđơl pràn lơh ngan lơh geh ală broă jàu uă rlau bơh broă lơh ƀòn lơgar pa dê. Pah nam, Mặt trân dà lơgar hòi jà ală mpồl lơh broă bal, ngan là ală kra ƀòn, kwang atbồ ƀòn ală jơi bơtiàn kòn cau dùl ết nă cau, dùl nùs dùl tồr bal tơnguh uă ală broă jàu bơt bơtàu ƀòn lơgar pa tàm ală thôn, ƀòn, lơh tus bơt bơtàu xã ƀòn lơgar pa sơlơ bơtàu tơnguh.

Jat jơnau yal bơh Ủy ƀan Ñân zân kơnhoàl Lâm Hà, càr Lâm Đồng, neh 35 nam bơt bơtàu, bơtàu tơnguh mờ 10 nam lam lơh jat Broă lơh jơnau kờñ Dà lơgar bơt bơtàu ƀòn lơgar pa, kơnhoàl Lâm Hà neh geh broă lơh bơtàu tơnguh tơl làm, lơh geh ală cồng nha uă ngan tàm jơh ală gah. Tàm tơngai bơh nam 2015– 2020, bơta gơguh lơh sa kờp bal pah nam bơh kơnhoàl Lâm Hà lơh geh 7,6%/ dùl nam. Mìng is nam 2022 pa do, khà gơguh lơh sa kơnhoàl Lâm Hà lơh geh pơgap 8,5%, priă lơh geh kờp bal tơl nă cau geh mờr 57 tơlak đong. Ală nam pa do, kờp jơh priă bơcri hòi jà bơt bơtàu ƀòn lơgar pa tàm ù tiah kơnhoàl dê lơh geh rlau 5 rơbô 300 tơmàn đong. Tus tŭ do, phan bơna bơt bơtàu geh sền gròi bơcri lơh dùl ròt bal mờ tơl khà.

Mờ ală cồng nha neh lơh geh, ngai 12/7/2022, Thủ tướng Cíñ phủ neh ai lơh jat Quyết địñ dờp kơnhoàl Lâm Hà, càr Lâm Đồng tơl khà kơnhoàl ƀòn lơgar pa. Ngai 19/10/2022, Củ tịc lơgar ai lơh jat Quyết địñ pà Huân chương Lơh broă khà 3 ai Đảng ƀộ, gơnoar atbồ mờ làng bol kơnhoàl Lâm Hà neh geh cồng nha jak ngan tàm srơh tàm pơrlòng “Jơh gùt lơgar sơm bat tê bal bơt bơtàu ƀòn lơgar pa. Ồng K'Tân- Phó Củ tịc Ủy ƀan Mặt trận Dà lơgar Việt Nam kơnhoàl Lâm Hà, càr Lâm Đồng đơs nền, lơh geh cồng hơ̆, bơdìh mờ bơta sền gròi bơh Đảng mờ Dà lơgar dê gam tơngŏ bơta pràn tam klăc bal ală jơi bơtiàn kòn cau tàm ù tiah kơnhoàl dê.

Ồng K'Tân, đơs: Mặt trận Dà lơgar Việt Nam kơnhoàl Lâm Hà geh kơnòl broă jat sền ală broă lơh, tam klăc bal, tơrgùm bal ală rơnàng làng bol. Di dơ̆ tòm 35 nam crơng gơs kơnhoàl Lâm Hà, pa do kơnhoàl neh bơyai lơh dơ̆ dờp Kơnhoàl ƀòn lơgar pa. Ală rơnàng làng bol ală jơi bơtiàn kòn cau tàm ù tiah kơnhoàl dê chờ hờp ngan. Tàm hơ̆ geh bơta tă pơgồp uă ngan bơh Mặt trận ală kấp, jat sền tơl broă jàu. Mìng is Ủy ƀan Mặt trận Dà lơgar geh 10 broă jàu, 10 broă lơh tơl khà nàng sền sơ wì mờ dờp ƀòn lơgar pa, ƀòn lơgar pơn rơ jak, ƀòn lơgar lam lài, mờ geh bal broă sền gròi rài kis làng bol dê.

Nam pa 2023 neh tus, làng bol kòn cau kơnhoàl Lâm Hà, càr Lâm Đồng geh tai uă bơta chờ hờp pa. Hơ̆ là  bơta gơn kơnờm nàng Đảng ƀộ, Gơnoar atbồ mờ Làng bol ală jơi bơtiàn kòn cau kơnhoàl pơn jat tai lơh jat niam bơhiàn tam klăc bal, sơm bat tê bal, dùl nùs bal, pơn đơl pràn lơh ngan bơt bơtàu kơnhoàl Lâm Hà ngai sơlơ pas sơm mờ pràn kơl dang.