Ồng Đinh Đăm, kra ƀòn ƀòn Kon Sơ Nglok, xã Hà Đông, kơnhoàl Đăk Đoa, càr Gia Lai yal wơl là: xã Hà Đông tàm rài tam lơh jơ gloh, rƀah lơ ời ngan, làng bol tàm do ờ geh tơl dùl bơngàn piang nàng sàu sơl. Mơya tŭ geh hòi jà tus bal tam lơh, cau lơi kung dùl nùs bal, pơgồp bal bơta pràn nàng ai kac màng lòt tus ngai jai pha. Tŭ hơ̆, làng bol tàm xã jơh nùs ngan lơh broă lơh sa nàng geh phe, geh poac dong kờl mpồl tam lơh in. Tơl hìu bơnhă tă pơgồp dùl bơngàn phe, hìu lơi geh uă den tă pơgồp uă rlau nàng dong kờl ai mpồl ling in. Làng bol he jơgloh pal sa bùm blàng, kơnuh tàm brê mơya kràñ cê ờ lời mpồl ling jơgloh. Ồng Đinh Đăm kah wơl: “Làng bol he klo yal geh kwang bàng tus tàm ƀòn bơyai lơh pơrjum, neh bal mờ gơp cribơyai gùng dà nàng tơngklàs dà lơgar, kờñ cèng wơl rài kis hờm ram, khat gơboh den làng bol lòt tus. Làng bol ờ bài kong kis tàm rài atbồ rồn bơklơn, pù pờng làng bol, kơp kờñ geh kis ring lơngai, hờm ram den tàng làng bol lòt jat kac màng, bal mờ gơp tam klac, dong kờl bal mờ gơp, ờ tam cah halà ờ rờm gơp. Lài do, bol sò tơm jàñ bơsak sùm jòi kai nàng kup krơ̆, pù pờng làng bol, tung kơñau sur, iar den tàng làng bol ờ kờñ, gơ jràñ ngan”.

Ơm tàm tiah thòng ngài bal mờ ală kal ke, Hà Đông mìng ngan ngồn geh ală tam gơl niam tŭ dờp geh bơta sền gròi bơh Đảng mờ dà lơgar dê lời ai tiah làng bol jơi bơtiàn kòn cau dùl êt nă cau in. Kơnờm bơh hơ̆, gơl gùng tơrbŏ bơh xã Đăk Sơ Mei tus xã Hà Đông tàm nam 2015 là dùl tàm ală bơta chul chồl dong Hà Đông in brồ guh. Mìng pơgap mờ do rlau 2 nam, bơh ală bơnah priă dong kờl bơh dà lơgar dê, rbàng yồng ing tàm ƀòn neh geh ala mờ rbàng bê tông jòng 100 thơk, ơnàng 3 thơk, tơrbŏ 5 ƀòn mờ gơp. Bi Đinh Nhưc ơm tàm ƀòn Ma Har, xã Hà Đông chờ hờp, đơs: “Lài do, gùng lòt, rbàng ờ geh den tàng broă lòt rê kal ke in. Tŭ do neh geh rbàng pa, broă lòt rê, pơndiang phan lơh gơs bơh suơn sre làng bol dê ƀuơn ngan, dong ƀuơn ƀuài tàm broă lơh sa, lòt rê làng bol dê. Ală sau dềt tàm ƀòn lòt bơsram ờ roh uă tŭ jơ tai, gùng lòt sàng goh, ưn ngài ngan Đảng mờ dà lơgar neh sền gròi tus tiah gam uă kal ke bè tàm do”.

Lài do, làng bol tàm xã Hà Đông mìng tam kòi mìr cồng nha tơnhàu ờ huan uă. Tŭ do, làng bol neh git tam kòi sre 2 kàl. Bal mờ hơ̆, làng bol lơh broă sa tàm xã neh git ngui ală sơntìl chi tam pa bè ƀời lời, kơphe, ngui bơta gơguh jak khoa họk kỹ thuật tàm broă lơh sa, ròng phan nàng bơtàu tơnguh lơh sa hìu bơnhă. Tŭ do, tŭ đơs tus cau pas geh priă tơlak cau Bahnar Đinh Hùng ơm tàm ƀòn Kon Sơ Nglok, làng bol tàm ƀòn ndrờm ki ngàm lơm tài bơh bi gam kơnòm să mơya lơh sa jak mờ gam dong kờl tơl nă cau tai. Tŭ do, Đinh Hùng gam geh 4 lồ kơphe neh tơnhàu, 5 lồ keo, 3 lồ tờm chi nha nhồng ai priă jền lơh geh rlau 300 tơlak đông pah nam. Bơh dùl hìu bơnhă gam rƀah kal ke, tus nam 2019, Đinh Hùng gơ gơs là cau lơh sa jak bơh ƀòn dê. Bi yal: “Lài do làng bol he mìng lơh sa suơn sre, mơya tơnơ̆ do geh bơsram bơta chài tam tờm keo, tam kơphe ngui khoa họk. Mìng is tờm chi nha nhồng den añ geh Đảng ủy xã mờ gơnoar atbồ xã sền gròi ai lòt bơsram mờng chài tàm xã Đăk Sơ Mei. Tơnơ̆ tŭ tam tờm chi do den gŏ gơ niam ngan mờ añ kung pơlam làng bol tàm ƀòn bơtàu tơnguh broă lơh do sơl”.

Sền gŏ ală tam gơl bơh xã Hà Đông dê jat pah nam, ồng Hoàng Cam, Ƀí thư Đảng ủy xã Hà Đông pà git: Rài kis bơh làng bol kòn cau Bahnar tàm xã Hà Đông tus tŭ do bulah gam kal ke mơya neh geh uă ngan bơta tam gơl pơndrờm mờ lài. Geh bơta sền gròi bơh ală kâp, gơnoar atbồ, ồs đèng, gùng lòt, hìu bơsram, hìu sơnơm neh geh lơh tơl làm, drơng jơnau kờñ kuơmàng làng bol dê. Bơta sơn đờm là xã uă kal ke den tàng tŭ lam lơh Broă lơh jơnau kờñ dà lơgar bè bơt bơtàu ƀòn lơgar pa, xã Hà Đồng tŭ do mìng lơh geh 9 tàm 19 broă geh jàu. Priă lơh geh kờp bal dùl nă cau tàm nam 2022 geh rlau 11 tơlak đông. Tơngai tus, nàng dong Hà Đông bơtàu tơnguh rlau, kâp ủy, gơnoar atbồ xã mờ kơnhoàl Đăk Đoa kung ai tơlik uă jơnau kờñ, gùng dà, broă rơndap lơh nàng ai Hà Đông in brồ guh: “Xã gam tơrgùm cih mat nàng lam lơh broă lơh jơnau kờñ dà lơgar bè bơtàu tơnguh lơh sa mpồl bơtiàn tiah jơi bơtiàn kòn cau dùl êt nă cau kung bè broă lơh jơnau kờñ dà lơgar tơrmù rƀah. Tĭ do, gam geh ală rơndap broă sap sèng kơ̆ kơljap làng bol ơm kis, ntrờn ƀà làng bol ai 5 thôn, ƀòn, rơndap tiah ơm kis pa. Tàm hơ̆ den geh lơh ồs đèng, gùng lòt, dà ngui sa nàng làng bol in ntrờn ƀà mờ khà rơnàng tơnơ̆ do geh ơm tàm hơ̆. Lơh gơlik dùl bơta pràn chul chồl bơtàu tơnguh ai xã in uă ngan, rài kis làng bol geh tơnguh niam, tơn jơh jơgloh tơrmù rƀah, dong làng bol bơtàu tơnguh”.

Tus Hà Đông tŭ do, geh sền gŏ bơta tam gơl tàm tiah pôs đồng kac màng do mờ ală hìu pa, ƀlàng sre gơs tơlir, ală dòr kơphe gơs niam ngan. Bal mờ bơta sền gròi bơh Đảng mờ dà lơgar dê bơh ală broă lơh jơnau kờñ dà lơgar bè tơrmù rƀah, làng bol tàm ù tiah khin cha jak chài geh pơn jat tai gàr kơ̆ bơhiàn bơh yau brồ guh tàm tŭ tơngai pa mờ ngai sơlơ bơtàu tơnguh rlau tai.