VOV4.K’ho - Tàm broă bơ̆t bơtàu ƀòn lơgar pa, broă bơyai lơh sa, pơgồp bal lơh sa, tăc phan lơh geh, ai geh broă lơh, tơnguh uă priă geh ai làng bol in geh kwơ màng ngan. Tàm xã tiah ngài Dà Knàng, kơnhoàl Dam Rông, càr Lâm Đồng, làng bol kòn cau neh lơh bal mờ Hợp ták xã Laba Banana tam prìt bơkah Laba geh cồng nha ngan. Do kung là phan OCOP 4 sơrmañ geh tăc tus ală drà kă bro tàm ală lơgar Đông Nam Á, Lo, Nhờk, Mỹ mờ ală lơgar tàm Trung Đông.

Lŏ Ka Huệ, kòn cau K’ Ho kis tàm ƀòn Bun, xã Dà Knàng, kơnhoàl Dam Rông, càr Lâm Đồng là cau tàm mpồl Hợp ták xã Laba Banana Dà Knàng. Broă lơh pah ngai lŏ dê là rào prìt, kĭ prìt mờ klơm. Broă lơh ờ kal ke mơya priă geh kơ̆ kơl jăp pah nhai rơlao 7 tơlăk đong.

Lŏ Đặng Thị Phương geh rơlao 1 lồ ù suơn tam prìt lơh broă bal mờ Hợp ták xã

Lŏ Ka Huệ yal: “Bơh tŭ mŭt lơh broă tàm Hợp ták xã Laba den priă geh sùm. Lài do, tŭ ờ hềt mŭt lơh broă tàm hợp ták xã den geh uă  ngan làng bol kis tàm do mờng càn kơphe lài, lòt càn priă sa priă cồng uă hờ bơdìh. Bơh tŭ geh hợp ták xã den bơta do neh gơmù, cau lơh broă geh sa priă nhai pah nhai den tàng rài kis geh kơ̆ kơl jăp rơlao. Tàm do geh uă ngan làng bol kis tàm tiah Pang Bah mờ Pang Dung tus bal tam prìt mờ hợp ták xã. Lơh broă mờ hợp ták xã den geh priă ngui tàm rài kis. Tài pah nhai hợp ták xã ai cau lòt sreh mờ blơi mờ pơn diang prìt bơh làng bol bal mờ priă geh ai tơn. Lơh kơphe pah nam mìng geh tơnhào dùl dơ̆, gam tam prìt den geh priă sùm pah nhai”.

Tàm ƀòn Pang Bah, xã Dà Knàng, prìt Laba geh tam uă ngan tàm dòr bơnơm. Hìu nhă lŏ Đặng Thị Phương, kòn cau Dao bơh càr Lạng Sơn tus tàm do bơh nam 1995, mìng tam phan ờ jŏ tơngai bal mờ kơphe, den tàng rài kis gơtìp kal ke. Mơya tàm 2 nam pa do, hìu nhă lŏ neh pơgồp bal mờ Hợp ták xã Laba Banana Dà Knàng nàng tam rơlao 1 lồ prìt bơkah Laba, den tàng rài kis neh rơhời kơ̆ kơl jăp mờ tơnguh bơtàu. Lŏ Đặng Thị Phương mblàng: “Gŏ Hợp ták xã lơh kung uă, priă geh kung kơ̆ kơl jăp. Hợp ták xã bơcri priă ai 50% priă sơntìl. Hìu nhă añ tŭ do tam rơlao 1 lồ. Lài do tam kơphe den pah nam mìng tơnhào geh dùl dơ̆; tơnơ̆ mờ tŭ neh kờp jơh priă phơng sih bal mờ ngai lơh broă den kung geh ờ uă sơl. Mơya bơh tŭ tam prìt den ờ jŏ tơngai, pah nhai geh priă bơh tờm prìt. Tờm lơi dùh lài den geh priă lài, geh sùm rah rài gùt nam. Añ gŏ priă geh kơl jăp rơlao mờ ală phan tam ndai”.

Lơh broă tàm hìu klơm prìt Hợp ták xã dê, lŏ Ka Huệ geh priă nhai kơ̆ kơl jăp rơlao 7 tơlăk đong

Ồng Nguyễn Huy Phương, Kwang atbồ Hợp ták xã Laba Banana Dà Knàng pà git: tŭ do, Hợp ták xã gam pơgồp bal mờ mờr 100 hìu làng bol nàng tam rơlao 300 lồ prìt Laba, tàm hơ̆, rơlao nggùl là làng bol kòn cau. Nàng làng bol kis đềt mềr mờ tờm prìt, Hợp ták xã geh lơh broă bal nền nòn, bơcri priă 50% priă blơi sơntìl mờ phơng sih, dong kờl kỹ thuật. Mờ Hợp ták xã kung hơ geh blơi tus tàm suơn mờ khà priă kơl jăp 5 rơbô 500 đong tàm 1 kĭ plai prìt ris tàm 1 tơngai 5 nam. Tơngai lơh broă bơh Hợp ták xã tus tàm suơn tơnhào, làng bol mìng kờp bơta ñjơ̆ mờ dờp priă. “Gơwèt mờ ală hìu lơh broă bal mờ Hợp ták xã geh bơcri priă 50% priă blơi phơng sih bal mờ sơntìl phan tam. Bè kỹ thuật den geh cau tus tơn tàm hìu nàng bơto sồr làng bol tàm broă tam geh khà niam tăc mờ lơgar bơdìh. Làng bol gŏ priă geh geh kwơ rơlao mờ tờm kơphe, den làng bol tus mờ Hợp ták xã kĭ sră nàng lơh broă bal, geh hìu 2, 3 sào ù, geh hìu 5 sào ù, geh hìu 1 lồ, 2 lồ ù... bơta pràn bơh Hợp ták xã tŭ do gam kờñ pờ ơnàng tai ù lơh sa bơh 1 rơbô, 2 rơbô lồ tai” .

Mò Mbon K’ Thơm, Phó Củ tịc UɃÑZ xã Dà Knàng, kơnhoàl Dam Rông, càr Lâm Đồng pà git, lài do làng bol kis tàm xã do mìng tam kơphe mờ ală phan tam ờ jŏ tơngai, den tàng priă geh ờ kơ̆ kơl jăp. Bơh tŭ geh Hợp ták xã Laba Banana Dà Knàng, làng bol neh lơh broă bal nàng tam prìt Laba tăc mờ lơgar bơdìh mờ lơh kông ñân tàm hìu klơm, den tàng priă geh kơl jăp rơlao. Broă lơh do geh kwơ màng tàm broă bơ̆t bơtàu ƀòn lơgar pa tàm xã dê. Bơh broă pơgồp bal lơh sa, neh pơgồp bal bơnah tàm broă tơnguh priă geh ai làng bol in. Tàm hơ̆ uă ngan là prìt Laba bơh Hợp ták xã Laba Banana Dà Knàng neh geh dờp phan OCOP 4 sơrmañ kấp càr, kung là bơtachờp hờp ngan gơwèt mờ xã Dà Knàng, kơnhoàl Dam Rông dê. Mò Mbon K’ Thơm, Phó Củ tịc UɃÑZ xã Dà Knàng đơs tờm: “Hợp ták xã Prìt Laba Dà Knàng ai geh phan lơh gơs tàm broă geh ai bơ̆t bơtàu ƀòn lơgar pa xã dê, hơ̆ là wèt tus ai geh phan geh lơh kơl jăp, tơl xã tơl bơta phan OCOP. Mờ phan geh lơh bơh Hợp ták xã dê neh geh sră dờp OCOP 4 sơrmañ kấp càr. Do là bơta chờ hờp ngan ờ mìng ai is hợp ták xã mờ gam là bơta chờ hờp ngan xã dê tai. Tài phan geh lơh bơh hợp ták xã lơh geh geh nùs nhơm kơ̆ kơl jăp tàm xã dê. Jơh ală broă hơ̆ là broă lơh ngan bal bơh hợp ták xã kung bè gơnoar atbồ xã dê”.

Cau cih Quốc Học, Lơ Mu K’ Yến - Cau mblàng Ndong Brawl