Jơh bal 2 nă cau kòp ndrờm gơrềng tus so, mèo kăp mơya ờ geh cĭt vaccine rcang gàr lài kòp sơn rang tơnơ̆ dơ̆ bơtờp. Cau dơ̆ 1 là oh klau K.S. (6  sơnam), ơm tàm ƀòn Đoàn Kết Ó-Kly, sàh Ia Tôr, càr Gia Lai. Cau dơ̆ 2 là oh ùr K.P.T (4 sơnam), ơm tàm thôn Ia Kênh, sàh Gào kung chơ̆t mờ ală tềl tơngŏ bơh kòp sơnrang dê.

Bè hơ̆, bơh bồ nam 2026 tus tŭ do, Gia Lai neh geh 5 nă cau chơ̆t tài bơh kòp sơnrang. Gah lơh sơnơm càr Gia Lai tơngkah lài, tŭ gơtìp so, mèo kăp, koah halà liăp tàm tiah gơtìp sồt, làng bol kờñ pal rào goh tiah sồt mờ sơbong tềng dà mbòr, lơh kloh khuẩn mờ tus mơ tàm gah lơh sơnơm nàng geh bơto pơlam, cĭt vaccine, huyết thanh sơn dră kòp sơn rang tŭ geh jơnau sồr.