Tus nggùl nhai 9 nam 2026, gah lơh sơnơm càr Lâm Đồng dờp geh rơlao 4 rơbô 200 nă cau gơtìp kòp jơng tê bơr, tàm hơ̆ geh 2 nă cau gơtìp chơ̆t tàm tiah Đức Trọng. Kòp mprơm gơlik mhàm kung dờp geh rơlao 4 rơbô 500 nă cau gơtìp kòp mờ 1 nă cau neh gơtìp chơ̆t. Tàm rơlao 1 poh pa do gah lơh sơnơm càr Lâm Đồng gŏ tai 5 tiah gơtìp kòp jơng tê bơr, tơnguh khà tiah gơtìp bơh bồ nam tus tŭ do tus 75 tiah gơtìp kòp. Ală tiah gơtìp kòp geh dờp tàm mpồl bơtiàn mờ tàm hìu bơsram. Di lah pơn drờm mờ tŭ do nam lài, khà cau gơtìp kòp jơng tê bơr tàm càr Lâm Đồng gơguh ni sơna mờ 2 rơbô 40 nă cau mờ kòp mprơm gơlik mhàm kung gơguh 240 nă.

Geh bơta lơh kòp jơng tê bơr mờ kòp mprơm gơlik mhàm tàm càr Lâm Đồng gơguh ni sơna là tài trồ tiah mìu uă, bơta sùh iò uă là bơta ƀuơn nàng sơmăc deh tăp mờ lơh gơtờp kòp. Nhai 9 kung là tŭ kơnòm bơsram sơn đờm lòt bơsram den tàng lơh kòp jơng tê bơr gơtòp uă, tàm hơ̆ uă ngan là kơnòm bơsram mầm non mờ kấp 1.

Sờh Lơh sơnơm càr Lâm Đồng tŭ do gam pơn jăt tai lơh uă gùng dà broă lơh nàng kơrian kòp jơng tê bơr mờ kòp mprơm gơlik mhàm gơtờp, tàm hơ̆ tơrgùm tàm broă kơrian tiah gơtờp; tơnguh uă bơta pràn rơcang kơrian lài kòp gơtờp ai mpồl cau lơh sơnơm, cau pơgru mờ cau lơh sơnơm tàm hìu bơsram in; dơ̆ lĕ bal lik pơs wàs kloh niam tiah kis, gơsơ̆t kih dà; hìu kham, sơm kòp tơnguh broă tam cah is, sền nàng git, sơm kòp; sền kwơ broă gŏ kòp gờñ geh tơngŏ jroă bơh cau kòp jơng tê bơr mờ kòp mprơm gơlik mhàm nàng kơrian di tŭ, tơrmù broă jun tus hìu sơnơm tŭ neh jơla...

Sờh Lơh sơnơm càr Lâm Đồng kung jào Anih tờm gròi sền kòp tê jê să càr jal mhar đal git di jơi virus lơh gơtờp kòp jơng tê bơr mờ kòp mprơm gơlik mhàm nàng pleh mờ bơta di gơlan gơtờp uă, yal lài gờñ bơta gơlik geh kòp kung bè bơ̆t bơtàu gùng dà broă lơh nàng rơcang kơrian lài di pal.