Ồng Y Tong Bkrông, 47 sơnam, kòn cau Rơđê, tàm sàh Ea Na, tus Anih tờm lơh sơnơm Krông Ana nàng kham, sền gròi bơta pràn kơl dang să jan. Tàm Kiosk ngăc ngar, ồng geh bơto sồr tơmŭt jơnau yal tơngit dan cih măt kham, jòi sền jơnau yal tơngit mờ ai sồ mìng tàm 2, 3 phút. Bơh tŭ dan cih măt tus tàm tŭ kham mìng roh ờ hềt tus 20 phút. Ồng Y Tong Bkrông pà git: “Lòt kham tàm do tŭ do gŏ gơlơh ƀuơn ngan. Lài do, lòt kham pal rơcang uă bơta ngan, mơya tŭ do mìng kờñ geh căn cước công dân, kŭp rùp màh sồ hơ̆ sồng cih jơnau là gơs. Ƀuơn ngan. Do là cồng nha bơh broă tam gơl sồ tàm gah lơh sơnơm mờ ală gah tàm rài kis làng bol gùt lơgar dê”.

Ờ mìng lơh ñjrong Kiosk ngăc ngar, Anih tờm Lơh sơnơm Krông Ana neh ai broă lơh sră nggal cau kòp điện tử tàm broă ngui bơh ngai 9 nam 2025, rơhời ala mờ sră pơ-àr. Phan atbồ jơh bơh jơnau yal tơngit sră nggal, dơ̆ kham sơm kòp, sền nàng git kòp, xét nghiệm, rùp tus mờ sră sơnơm bal mờ broă sơm kòp. Cau kòp gơtùi dan cih măt mờ CCCD, VNeID ha là VssID, dong kờl tơrmù ờ jŏ tơngai lơh sră nggal, tơngai kơ̆p mờ tơnguh uă cồng nha atbồ. Bác sĩ Hồ Văn Lập, Phó Kwang Lam bồ drơng broă lơh Anih tờm lơh sơnơm Krông Ana pà git, anih do gam tam gơl sồ jăt tơngai sồr bơh Bộ Lơh sơnơm dê mờ kờp dŭ geh lơh gơs tàm nhai 11 nam 2026. “Tàm bơta kal ke, anih lơh broă ngui ngui gùt mpồl bơtiàn mờ geh dong kờl dùl ñjrong Kiosk ngăc ngar, bơh tŭ hơ̆ gơtùi ngui broă lơh sră nggal cau kòp điện tử nàng tam gơl sồ. Jăt tơngai tus nhai 11 nam 2026 bơh Bộ Lơh sơnơm sồr, Anih lơh broă do rơ̆p rơcang sơrbì jơh broă lơh sră nggal mờ pơ-àr ờs mờng bè lài do”.

Kung bè tàm mpồl Lơh sơnơm dà lơgar lơh, tam gơl sồ gam geh lơh pràn tàm mpồl lơh sơnơm cau dùl nă să lơh is càr Dăk Lăk dê. Bè Hìu sơnơm Đại học Y Dược Buôn Ma Thuột neh lơh 100% Kiosk dan cih măt kham, mpồl măi vi tính ai gah lơh sơnơm in, tơrbŏ niam đah ală gah, cơl dŭ lơh broă, dong kờl prăp, ai tơlik mờ tam pà rùp sền nàng git kòp. bơdìh hơ̆ tai, mpồl phan nội soi geh tơmŭt bal mờ AI mờ cơl dŭ xét nghiệm geh lơh broă mờ măi mok pa, pơgồp bal tàm broă tơnguh uă bơta niam mờ geh cồng nha kham sơm kòp. Bác sĩ Võ Minh Thành, Kwang Lam bồ Hìu sơnơm pà git, gơwèt mờ broă tam gơl sồ nền nòn, ờ mìng broă geh tus bal mờ sơm kòp geh bơyai lơh sùm, mờ cau kòp kung ƀuơn tàm broă jòi sền bơta pràn kơl dang să jan bơh să tờm dê sơl. “Tơn jơh dơ̆ kham, sơm kòp, cau kòp geh ai dùl màh QR geh tơrgùm bal gùng link, mờ tŭ kŭp rùp, jòi sền den rơ̆p pờ geh dùl pang tơrgùm jơh jơnau yal tơngit cồng nha xét nghiệp, sền nàng git kòp bơh rùp CT, MRI mờ gơtùi prăp tàm măi vi tính ha là điện thoại bơh să tờm dê. Ƀuơn ngan tài cau kòp ờ pal cèng bal sră pơ-àr bè lài do tai”.

Jăt jơnau kờp bơh Sờh Lơh sơnơm càr Dăk Lăk dê, 100% hìu kham, sơm kòp tàm càr do neh ngui Căn cước Công dân, Căn cước Công dân điện tử (VNeID) mờ sră kham sơm kòp điện tử (VssID) nàng jòi sên jơnau yal tơngit kham, sơm kòp, ala mờ broă ngui sră sơm sơm kòp ờ sa priă geh lơh mờ pơ-àr; mờ lơh jăt broă tơm priă piam kòp tàm hìu sơnơm ờ ngui priă ngan. rơlao 771 rơbô nă làng bol neh geh sră pràn kơl dang să jan điện tử. Uă hìu sơnơm neh lơh jăt broă lơh sră nggal cau kòp điện tử, tàm hơ̆ geh 8 hìu sơnơm neh ala jơh broă lơh sră nggal cau kòp mờ pơ-àr.

Ồng Phạm Minh Hữu, Phó Kwang Lam bồ Sờh Lơh sơnơm càr Dăk Lăk pà git, jăt tơngai geh ai bơh Bộ Lơh sơnơm dê, tus jơh nhai 11 nam 2026, jơh ală hìu sơnơm tàm càr Dăk Lăk pal lơh jăt broă dan cih măt kham mờ ñjrong Kiosk, ngui broă lơh sră nggal cau kòp điện tử ala pang sră mờ tơrgùm jơnau yal tơngit làng bol dê bè pràn kơl dang să jan. “Bol añ gam bơyai lơh lòt sền wơl jơh tàm ală hìu sơnơm bè măi mok ngăc ngar, gùng che nàng git bè sră nggal pràn kơl dang să jan điện tử bơh làng bol dê. Tŭ do geh 12 mpồl yal tơngit làng bol gơrềng tus mờ lơh sơnơm gam geh lơh tàm broă lik lơh broă 90 ngai jăt jơnau sồr bơh Bộ Lơh sơnơm dê mờ rơ̆p lơh gơs tàm tơngai tus. Bơh tŭ hơ̆, geh tơl jơnau yal tơngit làng bol dê bè pràn kơl dang să jan tàm càr Dăk Lăk”.

Tàm gơl sồ jăt Jơnau lơh nền tàm Pơrjum sồ 57 bơh Bộ Chính trị dê gam rơhời ala gùng dà broă lơh bơh gah Lơh sơnơm càr Dăk Lăk dê, bơh dan cih măt kham, atbồ sră nggal, sền nàng git kòp tus mờ tơm priă piam kòp tàm hìu sơnơm. Broă lơh ndrờm bal jơnau yal tơngit mờ lơh pràn broă ngui măi mok ờ mìng tơnguh uă cồng nha atbồ, mờ kwơ màng rơlao là tơrmù tơngai, tơrmù sră nggal mờ ai bơta ƀuơn nàng cau kòp in. Do kung là bơta tờm nàng gah Lơh sơnơm càr Dăk Lăk pơn jăt tai bơ̆t bơtàu mpồl lơh sơnơm pa, ai làng bol lơh tờm nàng drơng lơh.