Jat jơnau yal bơh Anih tờm Gròi sền kòp tê jê să càr Dăk Lăk (CDC Dăk Lăk), kờp tus tŭ do, gùt càr cih dờp 8 rơbô 433 nă cau bơtờp kòp mprơm gơlik mhàm, gơguh 25% pơndrờm dùl tŭ bal mờ nam lài. Mìng is ală ngai pa do, pah nhai cih dờp rlau 100 nă cau. Neh geh 2 nă cau chơ̆t tàm sơnah ƀòn Tân An mờ sàh Quảng Phú. Ală tiah geh pơhìn bơtờp kòp uă ngan mờ uă cau kòp, geh sơnah ƀòn Buôn Ma Thuột, Tân Lập, Tân An, Ea Kao mờ ală sàh Ea H’leo, Hòa Phú, Tân Tiến, Krông Pắk, Ea Tul, Cư M’gar. Sơnah ƀòn Thành Nhất mờ ală sàh Ea Knuếch, Pơng Đrang, Ea Đrông, Ea Na, Ea Drăng gơwèt mpồl pơhìn bơtờp kòp uă.

Khà cau bơtờp kòp gơguh mhar tàm ală ngai pa do geh đơs là geh gơrềng tus mìu jŏ jòng, ƀuơn ngan ai sơmăc jơng jòng deh dùh mờ bơtờp kòp. Tàm tŭ hơ̆, broă lơh rcang lài kơryan kòp tàm bàr pe tiah ờ hềt geh cồng nha, làng bol gam sền ờ sơ̆p.

Bák sìh Hoàng Hải Phúc, Kwang lam bồ CDC Dăk Lăk pà gĭt, mpồl cau kòp gơguh uă lơh Gah sơm mhar kơnòm dềt mờ Kơnòm pa deh, Hìu sơnơm Uă gah tiah Tây Nguyên sùm uă ir; uă hìu sơnơm dà lơgar mờ bơdìh dà lơgar tàm tiah đah mat tơngai mut càr Dăk Lăk kung kong bơta kơn jơ̆ ndrờm bè hơ̆ sơl. CDC Dăk Lăk gam mhar ngan lam lơh ală broă lơh tơrmù ƀà cau bơtờp kòp pa, gròi sền tiah kòp, ờ gŏ di lời kòp bơtờp uă tiah.

“Anih tờm gròi sền kòp tê jê să càr Dăk Lăk tă pơgồp jơnau đơs tus mờ Sờh Lơh sơnơm, Anih duh broă Làng bol càr Dăk Lăk ai lơh jat sră nggal sồr Anih duh broă Làng bol ală sàh, sơnah ƀòn pal lơh pràn broă lơh rcang lài kơryan kòp lơh tờm mờ broă lam lơh ală dơ̆ pơs wàs tiah ơm kis; gơwèt mờ làng bol pal sền gàr is să tờm he dê. Mìng is mờ gah lơh sơnơm, bol añ ai kwang bàng lòt tus ală tiah kòp nàng sền gròi sền sơ wì sơñio khà véc-tơ, sơñio khà kih dà nàng ai rơndeh rơndồ măi mok, ngui ƀồm dà sơnơm mờ rơndeh ôtô nàng gơ sơ̆t sơmăc, kih dà”.

Jat Anih tờm gròi sền kòp tê jê să, bơh bồ nam tus tŭ do, gùt càr Gia Lai cih dờp rlau 7 rơbô 600 nă cau kòp mprơm gơlik mhàm mờ 1 nă cau chơ̆t. Pơndrờm dùl tŭ bal mờ nam 2025, khà cau bơtờp kòp gơguh 5 rơbô 059 nă cau. Gùt càr cih dờp 393 tiah kòp, gơguh 28 tiah kòp pơn drờm mờ dùl tŭ bal mờ nam 2025. Gah lơh sơnơm tơngkah rcang lài kơryan kòp mprơm gơlik mhàm là kơnòl broă kờñ geh lơh sùm, sùm sùm, ngan là tàm kàl mìu, tơngai ƀuơn ngan ai sơmac bơtờp kòp deh dùh mờ rơ̆ rài. Bơta pơgồp bal niam đah Gah lơh sơnơm, gơnoar atbồ ală tiah mờ làng bol, is ồn là broă lơh bơsong ală tiah bơtờp kòp tàm hìu bơnhă tơn rơ̆p dong pơgồp bơnah gròi sền kòp bơtờp uă, tơrmù ƀà khà cau bơtờp kòp mờ pơhìn kòp bơtờp uă tiah, bơh hơ̆ sền gàr pràn kơl dang să jan mpồl bơtiàn dê.