Bơh nam 2022 tus tŭ do, gùt lơgar dờp geh rơlao 90 rơbô nă cau gơtìp so, mèo kăp, kwàs, tàm hơ̆ geh 365 nă cau gơtìp chơ̆t. Priă cit rơcang pleh mờ sơm cau gơtìp so, mèo kăp tus mờr 1 rơbô tơmàn đong. Mìng is tàm càr Dăk Lăk tàm tơngai do geh git nđờ rơhiang nă cau gơtìp so, mèo kăp, tàm hơ̆ neh geh 7 nă cau gơtìp chơ̆t.

Tàm pơrjum, ală cau ala măt đơs, gam uă ngan kal ke tàm broă atbồ so, mèo, cit vaccine mờ jăt sền, bơsong cau gơtìp kòp. Uă jơnau đơs là, broă rơcang pleh mờ kòp Sơnrang ờ hềt geh sền gròi di pal; broă atbồ phan ròng uă tŭ gam ờ nền nòn.

Tơngai bơh nam 2026 tus 2030, ală cau ala măt ring bal pal tơnguh broă mblàng yal, tơnguh uă jơnau git wă bơh làng bol dê, tàm hơ̆ pal bơsong di broă lơh tŭ gơtìp so, mèo kăp, kwàs mờ tus hìu sơnơm nàng geh bơto pơlam, cit vaccine di tŭ. Broă rơcang pleh mờ kòp Sơnrang pal geh lơh sùm, mờ broă pơgồp bal nền nòn đah gah lơh sơnơm, đah lơh sơnơm phan ròng, gơnoar atbồ mờ mpồl bơtiàn, wèt tus jơnau kờñ ờ gam geh cau gơtìp chơ̆t tài kòp Sơnrang tàm nam 2030. Ồng Võ Hải Sơn, Phó Lam bồ Kuk Rơcang kơryan lài kòp Gơwèt Bộ Lơh sơnơm yal lài: “Bol añ bơto sồr mpồl bơtiàn là, di lah ală cau ờ gơtìp bơtoah so, mèo kăp den pal tus mơ hìu sơnơm nàng geh kham, cit huyết thanh rơcang pleh mờ kòp. Gơwèt mờ ală hìu nhă geh phan ròng, pal cit sơnơm rơcang pleh kòp ai so, mèo in. Gơwèt mờ ală tiah, pal tơnguh broă jăt sền broă geh cit vaccine ai so, mèo in; mờ sùm gàr lài sùm geh vaccine, huyết thanh nàng tŭ làng bol kờñ den geh nàng cit rơcăng pleh mờ kòp sơnrang ai làng bol in”.

Càr Dăk Lăk kung neh bơyai lơh Lik lòt mờ bơsram tàp ală gah lơh broă tàm broă rơcang pleh kòp Sơnrang kấp Dà lơgar nam 2026. Broă lơh geh broă tus bal bơh rơlao 1 rơbô nă cau tus bal, mờ ală broă lơh pơrjum, lòt tàm gùng mblàng yal mờ bơsram tàp mùl màl bè jăt sền, cit vaccine ai so, mèo in mờ broă lơh kloh tiah gơtìp kòp.

Bơta pal kah ngan là kòp Sơnrang ờ gơtùi sơm bời tŭ neh gơtìp kòp, mơya gơtùi rơcang pleh di lah cau gơtìp kòp neh geh lơh kloh sồt di mờ cit vaccine, huyết thanh di tŭ. Mơya, broă atbồ mpồl so, mèo mờ cit sơnơm rơcang pleh kòp tàm càr Dăk Lăk kung gam uă tiah ờ hềt geh lơh. Tus nhai 7 nam do, khà cit vaccine kòp Sơnrang ai so, mèo tàm càr in mìng rơ̆p geh 28,3%, ờ uă rơlao mờ khà kờñ nàng ai geh tiah kơrian kòp tàm mpồl bơtiàn. Tàm tŭ hơ̆, virus kòp Sơnrang kung gam geh tàm uă tiah mờ uă tiah kòp gơtờp tàm phan ròng pơn jăt tai geh gŏ.

Rơcang pleh mờ kòp Sơnrang, tài bè hơ̆, pal sơn đờm bơh ală broă lơh mùl màl: tơl hìu nhă atbồ niam so, mèo ròng mờ cit vaccine tơl; bañ ting lềng phan ròng; tŭ gơtìp so, mèo kăp, kwàs pal rào kloh sồt di mờ tus mơ hìu sơnơm nàng geh pơlam, cit vaccine. Tŭ tơl nă làng bol rơcang lài, gơnoar atbồ ƀòn lơgar rơcang lài mờ ală gah lơh broă pơgồp bal nền nòn rơlao, jơnau kờñ ờ gam cau gơtìp chơ̆t tài kòp Sơnrang tàm nam 2030 hơ̆ sồng gơtùi tus rềp rơlao mờ mùl màl.