Tơnơ̆ tŭ geh kham mờ pơlam bơta chài sền gàr pràn kơldang să jan tàm kơ ƀàng kham, ồng Y Juôn Niê (mat mờng hòi là bèp H’Bluin dê) ơm tàm ƀòn Ea Nur, thị trấn Pơng Drang, kơnhoàl Krông Buk pơn jat tai geh pơlam tus ƀàng dờp sơnơm ờ sa priă. Ồng Y Juôn yal: bơh lài tus tŭ do kung sùm gơtìp glar să mơya sền gŏ ờ geh bơta lơi gơ rềng uă den tàng ờ lòt kham. Di dơ̆ geh mpồl ƀák sĩ lơh broă dong kờl is rê kham tàm ƀòn lơgar den tàng ồng lòt kham sền gròi pràn kơldang să jan mờ geh pơlam mùl màl bè bơta pràn să jan ồng dê. Ồng Y Juôn gŏ ală ƀák sĩ lơh broă dong kờl is lơh broă jơh nùs ngan mờ ală bơta sơnơm geh ai kung wil tơl bal mờ ală bơta kòp ờs mờng: “Lam lơh kham pràn kơldang să jan làng bol in bè do là niam ngan, tŭ geh ală broă lơh bè do den làng bol geh pràn kơldang să jan ờ niam geh lòt kham tus tàm xã, làng bol geh sền gàr pràn kơldang să jan, geh pràn kơldang den tơl nă cau ndrờm chờ hờp mờ geh nùs nhơm niam”.

Broă lơh kham sơm kòp ai làng bol in tàm thị trấn Pơng Drang gơ wèt broă lơh dong kờl is bơh Mpồl cau lơh sơnơm kơnòm să càr Dăk Lăk pơgồp bal mờ Tỉñ đoàn càr lam lơh, mờ mờr 20 nă y, ƀák sĩ lơh broă dong kờl is tus bal. Tàm dùl ƀùi drim, neh geh mờr 500 dơ̆ làng bol geh kham mờ pà sơnơm ờ sa priă. Bàr, pe nă cau kòp geh tềl tơnggŏ kòp kơn jơ̆ den geh ală ƀák sĩ sồr lòt kham tàm ală hìu sơnơm kâp hơ đang. Tus bal broă lơh, ƀák sĩ H’Luốc Niê, gam lơh broă tàm Hìu sơnơm kơnhoàl Krông Buk đơs: “Chờ hờp ngan mờ pơn iờ să ngan geh lòt bal mờ mpồl tus bal sền gàr pràn kơldang să jan làng bol in. Bơyai lơh broă lơh bè do den bơdìh mờ jơnau gơtha tơn là kham, sền gàr pràn kơldang să jan làng bol in den gam dong mpồl y, ƀák sĩ bơh hìu sơnơm dê geh bơsram, đòm jat kung bè tơnguh mờng chài lơh broă tơl nă cau dê”.

Mờ 16 ci hội gơ wèt, mờr 1 rbô nă cau tàm mpồl là ală y, ƀák sĩ kơnòm să, tơngai lài, Mpồl cau lơh sơnơm kơnòm să càr Dăk Lăk neh lam lơh uă broă lơh niam, kham, sền gàr tơn pràn kơldang să jan làng bol in. Ală broă lơh bè “Gùng lòt kờñ gơboh bal kòn bơnus tài pràn kơldang să jan mpồl bơtiàn”, “Nam pa lơh broă dong kờl is chờ hờp sa tềp dà lơgar bal mờ cau rƀah”, broă lơh “Ơruh pơnu lơh broă dong kờl is kàl rbô bơkang”, “Nhai ơruh pơnu”,.. geh ală cau tàm mpồl jơh nùs tus bal.

Tàm 5 nam do, Mpồl cau lơh sơnơm kơnòm să càr Dăk Lăk neh bơyai lơh 120 dơ̆ kham kòp, pơlam sền gàr pràn kơldang să jan, pà sơnơm ờ sa priă ai 86 rbô dơ̆ làng bol tàm tiah sar lơgar ngài, tiah jơi bơtiàn dồ êt nă cau in mờ khà priă rlau 4 tơmàn 200 tơlak đông. Tàm ală dơ̆ lòt, Mpồl gam pơgồp bal mờ ală cay dong kờl pà 2 rbô 400 bơnah phan là phan ngui sa pal geh, àu mpha ai làng bol geh rài kis kal ke in; pà git nđờ rhiang bơnah priă dong kờl bơsram, phan ngui bơsram, rơndeh cih ai kơnòm bơsram rƀah, kòn đời, kơnòm bơsram jơi bơtiàn dồ êt nă cau sơrlèt gan kal ke bơsram jak in.

Lam lơh bơto pơlam ală broă lơh dong kờl, kâp kứu ai git nđờ rbô nă cau pơgru ală hìu bơsram mầm non, kâp 1 in; mblàng yal, bơto bơtê pràn kơldang deh dùh ai kơnòm pa tàu in, rơcang sơndră kòp bơtờp ai git nđờ rbô nă kơnòm bơsram, cau bơsram dờng in.

Bi Y Lê Pas Tơ, Phó Ƀí thư Duh broă sùm Tỉñ đoàn càr, Củ tịc Mpồl tam klac ơruh pơnu Việt Nam càr Dăk Lăk pà git, broă lơh bơh Mpồl cau lơh sơnơm kơnòm să dê neh pơgồp bơnah lơh li la, niam rlau tai ală mpồl dong kờl is tài lơngăp lơngai rài kis mpồl bơtiàn, pơn jờng nùs nhơm kis niam tài mpồl bơtiàn tàm đoàn viên ơruh pơnu Dăk Lăk: “Ală oh mi lơh sơnơm kơnòm să neh đòm jat nùs nhơm lơh broă dong kờl is tài rài kis, tài mpồl bơtiàn mờ gơtùi ngui prà jak mờng chài lơh broă he dê nàng tus bal tàm ală srơh bal bơh cau kơnòm să càr he dê, pơgồp bơnah tơnguh pràn kơldang să jan ai làng bol in tàm ală tiah kal ke, tiah sar lơgar ngài, tiah nhàr dà lơgar”.

Jat ƀák sĩ Phan Thành Trinh, Củ tịc Mpồl cau lơh sơnơm kơnòm să càr Dăk Lăk pà git, mờ jơnau đơs lơh broă “Cau lơh sơnơm kơnòm să Dăk Lăk lơh jat jơnau bơto sồr Wa Hồ, lơh broă dong kờl is tài pràn kơldang să jan mpồl bơtiàn”, ală cau tàm mpồl sùm jơh nùs tus bal ală broă lơh nàng tơrgùm tai jơnau git wă, mờng chài, tơnguh mờng chài lơh broă, bơh hơ̆ drơng cau kòp in ngai sơlơ niam rlau: “Mpồl cau lơh sơnơm kơnòm să pơn jat tai lam lơh srơh Cau lơh sơnơm kơnòm să lơh jat jơnau bơto sồr wa Hồ dê, lơh broă dong kờl is tài pràn kơldang să jan mpồl bơtiàn. Kuơmàng, tơl nă cau tàm mpồl rơp tơnguh nùs nhơm lam lài he dê tàm tơl tiah mờ drơng lơh tài lơngăp lơngai rài kis mpồl bơtiàn”.

Ờ ngòt bòl glar, kal ke, mpồl cau lơh sơnơm kơnòm să càr Dăk Lăk neh lam lài lơh broă dong kờl is tus ală ƀòn tiah sar lơgar ngài nàng kham, sơm kòp ai làng bol in. Ală dơ̆ lòt lơh broă ờ mìng dong khi pơlam tàp nùs nhơm lơh sơnơm, tơnguh bơta chài lơh sơnơm mờ gam ai tơnggŏ nùs nhơm geh kơnòl, ngui niam bơta pràn cau kơnòm să, tă pơgồp tàp pràn kơldang să jan mpồl bơtiàn.