Hìu sơnơm kơnhoàl Mdrăk, càr Dăk Lăk geh 12 Khoa mờ 13 hìu sơnơm xã, thị trấn, mơya mìng geh 43 nă ƀák sĩ mờ 11 nă ƀák sĩ CKI lơh broă. Jăt mò Lê Thị Thuỷ, Kwang atbồ Hìu sơnơm kơnhoàl Mdrăk yal, tơnơ̆ nam 2019 mờ broă lơh jăt ală Thông tư sồ 37 mờ Thông tư sồ 07 bơh Ƀộ Y tế dê bè broă tơrgùm bal ală Hìu sơnơm uă gơnoar broă tàm ală xã dờp tai uă kơnòl broă bè: kham sơm kòp, lơh sơnơm rơcang gàr lài, khà kờp làng bol mờ deh dùh di kơrhia tàm hìu nhă, lơh jăt ală broă lơh jơnau kờñ dà lơgar bè lơh sơnơm...

Dùl nă kwang bàng lơh broă pal dờp uă ngan broă lơh, tàm tŭ khà broă lơh geh uă. Bơta do lơh mpồl cau lơh sơnơm tàm ală hìu sơnơm xã, thị trấn pal lơh ngan uă rơlao bơh 2 tus 3 dơ̆ hơ̆ sồng lơh gơs kơnòl geh jào. Broă uă, cau lơh broă ờ tơl neh lơh mpồl cau lơh sơnơm tàm kấp xã, thị trấn geh tŭ gơtìp uă ir. Mò Lê Thị Thuỷ pà git: “Bŭ lah he kờñ rơwah cau mŭt lơh broă mờ kung geh uă broă dong kờl bơh Hìu sơnơm dê kung bè hòi jà Nghị quyết bơh HĐÑZ càr dê, mơya kung ờ geh ƀák sĩ tus lơh broă sơl bơh uă dơ̆ rơwah. Den tàng gơwèt mờ Hìu sơnơm dê, bơdìh mờ broă rơcang bơto tơnguh kwang bàng tàm tiah do tơn, kung kơ̆p kờñ geh dùl broă dong kờl nàng tơl niam bè broă ai lài, hòi jà krơi is ai kwang bàng in, tàm hơ̆ uă ngan là ƀák sĩ hơ̆ sồng kwang bàng geh bơta niam uă tus lơh broă tàm hìu sơnơm xã”.

Bŭ lah jơnờng piam kòp, phan lơh sơnơm geh tơl, mơya tài ờ rơwah geh ƀák sĩ tus lơh broă, den tàng ală nam do Hìu sơnơm kơnhoàl Krông Buk, càr Dăk Lăk ờ gơtùi lơh gơs ală khoa is kung bè lơh jăt ală bơta chài pa. Jăt ồng Trần Anh Hùng, Phó Kwang atbồ Hìu sơnơm kơnhoàl Krông Buk yal, do là bơta tờm lơh gơrềng ờ niam ngan tus mờ broă kham, sơm kòp, kung bè bơta niam broă lơh sơnơm tàm hìu sơnơm do dê. “Ƀák sĩ ờ tơl uă ngan, tŭ do ală ƀák sĩ gam lơh broă tàm kơnhoàl Krông Búk ndrờm pa jơh bơsram, ờ hềt geh sră dờp lơh broă, ờ hềt geh broă mờng chài. Tàm hơ̆ uă ngan là ờ tơl ƀák sĩ khoa ngoại, khoa cau ùr deh kòn mờ khoa gây mê hồi sứk bal mờ ală ƀák sĩ khoa is den tàng broă kờñ geh tơl kham, sơm kòp bè gah bơdìh cau ùr deh kòn mìng geh sơm di mơ hơ̆ sồng jun tam gơl hìu sơnơm. Gam broă reh kung ờ gơtùi lơh jăt sơl tài ờ geh ƀák sĩ gây mê, ƀák sĩ reh. Bè broă kham kòp den Hìu sơnơm ờ geh ƀák sĩ khoa is den kung ờ gơtùi kham bơta pràn kơl dang să jan mờ ai sră kham bơta pràn kơl dang să jan làng bol in sơl”.

Jăt Sở Y tế càr Dăk Lăk yal, gùt càr gam ờ tơl rơlao 1 rơbô 700 nă cau lơh sơnơm, mờ mìng geh khà 7,15 nă ƀák sĩ tàm jơ̆t rơbô nă làng bol mờ kơrnoăt geh ai là 8 nă ƀák sĩ tàm jơ̆t rơbô nă làng bol. Bơta gal ir cau kòp gam gơlik geh tàm uă hìu sơnơm tàm càr, mờ bơta geh jơnờng piam kòp tàm geh bơh 110% tus 130%. Bơta tờm lơh gơtìp ờ tơl ƀák sĩ tàm hìu sơnơm kơnhoàl là tài tiah lơh broă gơtìp glar, kal ke. Tàm tŭ hơ̆, priă nhai geh dờp jăt mờ gơnoar broă lơh mờ ală priă dong kờl ndai kờp jăt priă nhai ờ uă ngan tơrgùm bal gam ờ uă, ờ pal mờ broă lơh.

Nàng tơmù bơta kal ke do, gah lơh sơnơm càr Dăk Lăk neh pơlam UɃÑZ càr gùng dà tam jào mpồl Lơh sơnơm rơcang gàr lài tus ală kơnhoàl in atbồ tơn mờ bơcri priă. Mờ gah lơh sơnơm kung geh lơh dùl Rơndăp broă ngui ƀák sĩ bơh bơdìh mŭt kham sơm kòp tàm hìu sơnơm dà lơgar mờ tơm priă jăt ală broă dong kờl di pal. Broă rơwah ală y, ƀák sĩ tàm tiah hơ̆ tơn kung geh ai lài nàng lơh tàm tơngai tus. Ồng Nay Phi La, Kwang atbồ Sở Y tế càr Dăk Lăk pà git: “Tŭ do den Sở Y tế neh ai geh uă broă lơh, broă lơh bè ală cau deh, kis tàm tiah lơi den geh dờp lơh broă tơn tàm tiah hơ̆. Nam 2023 geh pơn jăt tai rơwah, tàm hơ̆ ai lài ngan cau bơsram dờng bơh Đại họk Tây Nguyên, Đại họk Buôn Ma Thuột kung bè ală cau bơsram dờng bơh hìu bơsram ndai kờñ lơh broă tàm càr”.

Ờ tơl cau lơh broă, tàm hơ̆ uă ngan là mpồl y ƀák sĩ gam là bơta lòng uă ngan gơwèt mờ gah lơh sơnơm càr Dăk Lăk dê. Bŭ lah tàm tơngai do, càr neh lơh uă broă nàng hòi jà ƀák sĩ kung bè sền gròi tus mờ broă ai kwang bàng lơh sơnơm lòt bơsram nàng tơnguh bơta ngăc ngar tàm broă lơh, mơya kung gam ờ hềt tơl mờ bơta kờñ tàm mùl màl. Nàng pơn jăt tai gàr cau lơh broă mờ hòi jà geh ƀák sĩ tus lơh broă tàm ală hìu sơnơm dà lơgar lơh, bơdìh mờ broă dong kờl hòi jà, pal geh tai ală broă lơh geh cồng nha ndai nàng nàng ală cau lơh sơnơm iang nùs, đềt mềr mờ lơh broă.