Dơ̆ 3 jun kòn dềt tus Hìu sơnơm nàng cĭt vaccine 5 tàm 1, mơya bi H’Cuôn Ksor, ơm tàm xã Krông Jing, kơnhoàl Mdrak kung gam pal rê wơl tài bơh ờ hềt geh vaccine. Bi H’Cuôn pà gĭt, bi kơno jơnau yal tàm rơdio, sră ƀăo den gĭt pa do geh uă bơta kòp gam bơtờp uă wơl tai, mơya tŭ jun kòn lòt cĭt den ờ geh vaccine den bi kơlôi sơnơng ngan. Bi H’Cuôn, đơs:“Kòn añ dê neh 4 nhai rao mờ ờ hềt cĭt vaccine 5 tàm 1. Tŭ do añ lam kòn lòt cĭt nàng crang sơndră kòp jê mờ kung ờ geh vaccine sơl. Añ kờñ gờñ geh vaccine nàng cĭt ai kòn in”.

Bi H’Yên Niê, Kwang atbồ Hìu sơnơm xã Krông Jing, kơnhoàl M’Drak pà gĭt, tŭ do gùt xã geh rlau 220 nă kơnòm dềt rlau 2 nhai pal cĭt vaccine 5 tàm 1 mơya ờ hềt geh vaccine nàng cĭt sơl. Jat bi H’ Yên, broă ờ tơl vaccine jŏ jòng ờ mìng lơh ờ pràn să jan kòn in lơm, mờ gam lơh kơryan tus broă hòi jà làng bol jun kòn lòt cĭt vaccine tơnơ̆ do tai. Bi H’Yên Niê, đơs: “Tŭ do, ờ tơl vaccine uă ngan, ngan là vaccine 5 tàm 1 neh rlau 6 nhai do ờ geh rau, bơdìh hơ̆ là vaccine sởi ding dơ̆ 1 den vaccine DPT kung ờ geh nàng cĭt ai ală kơnòm dềt in sơl. Hời rơ hời là kung kal ke ngan tàm broă mblàng yal tus mờ ală mè  lam kòn lòt cĭt sơnơm. Pơn yơu bè khi tus dơ̆ 1 ờ geh, dơ̆ 2 ờ geh, dơ̆ 3 ờ geh den tơnơ̆ do he mblàng yal hòi jà làng bol là kal ke ngan”.

Jat mò Lê Thị Thủy, Kwang atbồ Hìu sơnơm kơnhoàl M’Drak là dùl tàm ală kơnhoàl geh uă xã gơwèt tiah kal ke cĭt sơnơm vaccine ai kơnòm dềt in. Tàm ală nam do, gah lơh sơnơm kơnhoàl sùm gơtìp kal ke tàm broă hòi jà mè bèp jun kòn dềt lòt cĭt vaccine di mờ tơl. Tŭ do den ờ tơl vaccine den bơta pơhìn lơh gơlik geh bơta ờ niam sơndră kòp tàm mpồl bơtiàn là uă ngan. Jat mò Lê Thị Thủy, đơs: “Lài do, bulah geh pà vaccine bơh Ƀộ Y tế dê den kơnhoàl M’Drak mờ bàr pe kơnhoàl rƀah kung neh gơtìp kal ke bè broă lơh cĭt sơnơm vaccine rau ngan là ală xã tiah tiah sar lơgar ngài, tiah làng bol kòn cau dùl ết nă cau, tŭ do vaccine ờ tơl bè do tai den sơlơ kal ke rlau tai. Broă vaccine cĭt ai kơnòm dềt in pal geh sùm jat tŭ tơngai mờ jat broă lơh, dilah lơyài mờ ờ di tŭ rơ̆p gơrềng tus bơta pràn sơndră kòp ai kơnòm dềt in”.

Ờ tơl vaccine cĭt rcang sơndră ai kơnòm dềt in là bơta gam gơlik geh tàm ù tiah càr Dăk Lăk dê. Jat ồng Võ Minh Hùng, Kwang atbồ Hìu sơnơm ƀòn dờng Buôn Ma Thuột yal, bơh bồ nam tus tŭ do, ƀòn dờng neh jơh vaccine DPT, gam vaccine 5 tàm 1 pa mìng geh pà dùl dơ̆ tàm nhai 1 pa do lơm mờ 386 ding, tàm tŭ jơnau kờñ cĭt pah nam ƀòn dờng dê kờñ geh pơgap bơh 15 tus 18 rơbô ding vaccine 5 tàm 1. Ồng Võ Minh Hùng đơs: “Tus tơngai tŭ do, kơnòm hơđơm 1 sơnam cĭt tơl 8 ding vaccine tàm ù tiah ƀòn dờng bol añ dê pa mìng geh 30%, bè hơ̆ kung lơyah sơl pơndrờm mờ broă rơndap lơh gùt nam là 98%. Den là tàm tơngai tus kung dan là pal ai di tŭ vaccine 5 tàm 1 đơs is mờ vaccine tàm broă lơh cĭt sơnơm rề ơnàng dà lơgar đơs bal nàng lơh mhar tŭ tơngai cĭt vaccine ai kơnòm dềt in, pơgồp bơnah sền gàr pràn kơl dang să jan ai ală sau in”.

Jat khà tơrgùm kờp bơh Anih tờm gròi sền kòp tê jê să càr Dăk Lăk dê yal, tàm khà 12 bơta tàm mpồl vaccine gơwèt broă lơh cĭt sơnơm vaccine rề ơnàng ai kơnòm dềt in tàm nam 2023 càr Dăk Lăk pa mìng gàr tơl 2 bơta vaccine kòp lơng mờ uốn ván, 2 bơta vaccine là “5 tàm 1” mờ DPT neh jơh, khà gam wơl mìng tơl cĭt ai kơnòm dềt in tus jơh nhai 8 do lơm.

Jat ồng Lê Phúc, Phó Kwang atbồ Anih tờm gròi sền kòp tê jê să càr Dăk Lăk yal, jơnau tờm bơh broă ờ tơl vaccine là bơh nam 2023 tŭ tam gơl broă lơh jơnau kờñ gah lơh sơnơm khà kờp làng bol gơ gơs kơnòl broă tă ngui sùm ai ală tiah in. Mơya, tàm bơta geh ngan broă tam gơl kes priă nàng ală tiah in blơi vaccine gam geh ală bơta kòl yan bè giă, tàm pơrlòng giă. Anih tờm gròi sền kòp tê jê să càr neh tơrgùm jơnau kờñ cĭt vaccine mờ broă rơndap lơh pà vaccine bơh nam 2023 mờ nam 2024 nàng cribơyai bal mờ Sở Y tế yal mờ Ủy ƀan Ñân zân càr in pà priă jền nàng blơi. Ồng Lê Phúc, Phó Kwang atbồ Anih tờm sền gròi kòp tê jê să càr Dăk Lăk, pà gĭt: “Nàng lơh geh bơta pràn sơndră kòp niam tàm mpồl bơtiàn den pal tơnguh khà cĭt vaccine rề ơnàng mờ pal lơh bè lơi hơ̆ nàng cĭt tơl den tŭ hơ̆ bơta pràn sơndră kòp rơ̆p gàr geh mờ gàr sùm là niam ngan. Mơya ờ geh cĭt vaccie tàm tơngai lơyah, dilah  geh vaccine den rơ̆p lơh jat broă lơh cĭt bơtơl wơl tai den rơ̆p di mờ jơnau sồr ai kơnòm dềt in. Bol añ rơngòt ngan rlau jơh là ală kơnòm dềt ờ hềt geh cĭt ding lơi, tŭ do ờ tơl vaccine den loh làng gơ aniai tus pràn kơl dang să jan bơh kơnòm dềt dê in”.

Jat ală kwang bàng jak chài gah lơh sơnơm, ờ tơl vaccine rơ̆p gơrềng kơn jơ̆ ngan tus cồng nha bơh broă lơh cĭt vaccine rề ơnàng. Bơta ờ niam sơndră kòp rơ̆p gơlik geh tŭ khà kơnòm dềt ờ geh cĭt vaccine rcang sơndră kòp tơl làm, di tơngai sồr, bơta do lơh tơnguh bơta pơhìn kòp bơtờp uă wơl tai.