Gam sền gàr kòn ùr 16 nhai gơtìp kòp tàm Khoa kơnòm dềt tơrgùm bal Hìu sơnơm dờng tiah Tây Nguyên, lŏ Huỳnh Thị An, kis tàm xã Cư̆ Mlan, kơnhoàl Ea Súp, càr Dăk Lăk pà git, pơgăp mờ do 1 poh, lŏ gŏ kòn bơsiă uă, glar tàm să, duh să uă mờ tàm mpàng tê, mpàng jơng gơlik toh dà den tàng cèng lòt kham. Ƀák sĩ đơs kòn dềt do gơtìp kòp jơng tê bơr. Tơnơ̆ mờ 3 ngai sơm kòp tàm hìu ờ bời, cau tàm hìu neh cèng kòn dềt tus hờ Hìu sơnơm dờng tiah Tây Nguyên: “Tŭ mŭt tàm do toh dà gơlik uă tus 2 mpàng jơng hơ̆ sồng gơrề ờ uă tus mpàng tê tai. Añ kung ờ git bè kòp jơng tê bơr den tàng tàm hìu phan nhơl den ai kòn in nhơl tơn kung ờ kơlôi tàm kàl do gơlik geh kòp do”

Kung tam sền gàr kòn 7 sơnam gơtìp kòp jơng tê bơr tàm Hìu sơnơm dờng tiah Tây Nguyên sơl, lŏ Nguyễn Thị Diện, kis tàm sơnah ƀòn An Bình, thị xã Buôn Hồ pà git, tơnơ̆ mờ 5 ngai sơm, kòn bơh lŏ dê neh jơh duh să, bơta pràn kơl dang să jan neh rơhời pràn wơl: “Bơh lài ờ gơtìp, tàm hơ̆ ờ hoan geh cau gơtìp den tàng kung ờ git sơl. Añ rê geh jùt, rào kloh hìu đam rơlao, nền nòn rơlao tàm broă lòt rê, lòt nhơl”.

Jăt ƀák sĩ Huỳnh Thị Bích Như, lơh broă tàm Khoa Kơnòm dềt tơrgùm bal, Hìu sơnơm dờng tiah Tây Nguyên yal, bơh bồ nam tus tŭ do, khoa do neh dờp, sơm kòp ai rơlao 85 nă kơnòm dềt gơtìp kòp jơng tê bơr. Pal kah ngan tàm pơgăp 1 nhai pa do, khà cau gơtìp kòp pal mŭt piam kòp tàm hìu sơnơm gơguh uă. Tŭ do, khoa gam sơm 15 nă cau kòp gơtìp kòp jơng tê bơr, tàm hơ̆ geh 2 nă cau gơtìp jroă ngan. Ƀák sĩ Huỳnh Thị Bích Như bơto: “He sơndră mờ broă tơnguh uă bơta pràn sơndră mờ kòp ai kòn in, sào sa tơl phan sa bơkah, hùc tơl dà hơ̆ sồng bơtơl tai ală vitamin nàng tơnguh bơta pràn rơcang sơndră mờ kòp ai oh kòn in mờ he pal cit tơl ală ding sơnơm vaccine sơndră mờ kòp pluh mờ bơto sồr ai kòn kloh niam jơng tê, tài jơng, tê, bơr kloh niam geh tơmù gơtờp kòp”.

Jăt anih sền gròi kòp tê jê să càr Dăk Lăk yal, kờp bơh bồ nam tus tŭ do, gùt càr neh dờp geh rơlao 100 nă cau gơtìp kòp jơng tê bơr rah rài tàm 15 kơnhoàl, thị xã, ƀòn dờng. Tàm hơ̆, geh 1 nă cau neh gơtìp chơ̆t. Di pơgăp 1 nhai pa do, tàm bồ kàl mìu, khà cau gơtìp kòp jơng tê bơr gam gơguh, tàm 1 poh dờp geh bơh 12 tus 15 nă. UɃÑZ càr Dăk Lăk neh tơlik sră nggal sồ 4954, bè broă tơnguh broă sơndră mờ kòp gơtờp, kòp jơng tê bơr; gah lơh sơnơm càr đơng lam ală hìu sơnơm tơnguh broă sền, jăt sền nàng wàng se kơrian tiah gơtìp kòp; lơh pràn broă yal mblàng bè broă sơndră mờ kòp tus làng bol. Mờ pơgồp bal mờ Sở Giáo zụk mờ Đào tạo bơto ai ală hìu bơsram in git tàm broă sơndră mờ kơrian kòp jơng tê bơr gơtờp. Ồng Hoàng Hải Phúc, Phó Kwang atbồ drơng kơnòl broă Anih sền gròi kòp tê jê să càr Dăk Lăk pà git: “Bol añ pơlam Sở Y tế in nàng đơng lam ală hìu sơnơm mờ pơlam gah bơto bơtê mờ bơsram in yal mblàng 3 broă bè sa sin, hùc duh, kloh niam, rào tê mờ lơh jăt 6 broă lơh mờ Ƀộ Y tế neh bơto sồr, mơya làng bol kung gam ờ sền gròi sơl. Bol añ kung pơgồp bal mờ gah bơto bơtê mờ bơsram nàng bơto ală cau in git tŭ geh ală kơnòm bơsram gơtìp kòp jơng tê bơr geh tam cah is mơ, yal mblàng, lam sồr cau tàm hìu nhă pơs wàs kloh niam hìu đam, kloh niam jơng tê lài mờ tŭ sào sa mờ tơnơ̆ mờ tŭ neh jă brê”.