Ồng Lê Phúc, Phó Kwang atbồ Anih tờm Gròi sền kòp tê jê să càr Dăk Lăk pà gĭt, ală nhai bồ nam 2023, lơh jat broă lơh cĭt sơnơm vaccine rề ơnàng tàm càr gơtìp uă ngan kal ke tài bơh bơta ờ tơl sơnơm vaccine nàng cĭt ai kơnòm dềt in, ngan là geh bàr pe bơta vaccine ờ tơl jŏ jòng lơh gĭt nđờ rơbô nă kơnòm dềt ờ hềt geh cĭt. Tàm 12 bơta tàm mpồl bơta vaccine tàm broă lơh cĭt sơnơm vaccine rề ơnàng ai kơnòm dềt tàm nam 2023, càr Dăk Lăk pa mìng gàr tơl geh 2 bơta vaccine lơng să mờ uốn ván, 2 bơta vaccine là “5 tàm 1” mờ DPT (ƀạch hầu - bơsiă iar - uốn ván) neh jơh, khà gam wơl mìng tơl cĭt ai kơnòm dềt in tus jơh nhai 8.

Jat ồng Lê Phúc, Phó Kwang atbồ Anih tờm gròi sền kòp tê jê să càr Dăk Lăk yal, broă ờ tơl vaccine tàm tơngai jŏ jòng digơlan lơh gơlik geh bơta ờ niam tàm broă sơndră kòp mpồl bơtiàn. Nàng bơsong bơta ờ tơl vaccine, Anih tờm gròi sền kòp tê jê să càr neh tơrgùm wơl jơnau kờñ cĭt sơnơm vaccine mờ broă rơndap lơh blơi vaccine bơh nam 2023 mờ 2024 nàng cribơyai ai Sở Y tế in yal mờ Ủy ƀan Ñân zân càr in pà priă jền nàng blơi.