Drơng gàr kòn gam sơm kòp as sồt tơngoh Nhờk Ƀản tàm hìu sơnơm dờng tiah Tây Nguyên, lŏ H’ Phen Buôn Yă, kis tàm kơnhoàl Krông Păc, càr Dăk Lăk pà git, tŭ dờp geh cồng nha ai gŏ kòn lŏ gơtìp kòp as sồt tơngoh Nhờk Ƀản, lŏ nrơ̆t dơl ngan tài să tờm lŏ kung ờ hềt git uă bè kòp do. Kung jăt lŏ H’ Phen yal, tŭ kòn lŏ gơtìp kòp, gơtìp duh să uă sùm tàm 2, 3 ngai tơn, hùc sơnơm ờ gơmù duh, tŭ cèng tus hờ hìu sơnơm dờng tiah Tây Nguyên hơ̆ sồng git kòn lŏ gơtìp kòp as sồt tơngoh Nhờk Ƀản. Sền gŏ kòn pah ngai pal tă nhơm mờ măi, lŏ wờl să ngan tài neh ờ sền gròi tus mờ broă cit sơnơm vaccine rơcang sơndră mờ kòp kòn in: “Kòn lơi kung geh cit ờ tơl lơm, tài añ lòt lơh broă sùm, ờ sền gròi ngan. Añ ờ git kòp do lah jroă bè do, tŭ do hơ̆ sồng git. Tŭ do ờ git lơh bè lơi, sền kòn gơtìp bè den mìng gơdan ñìm ngan”.

Jăt ƀák sĩ CKII Hoàng Ngọc Anh Tuấn, Kwang atbồ khoa Hồi sứk Kấp kứu Kòn dềt – Kòn se pa deh, Hìu sơnơm dờng tiah Tây Nguyên đơs, bal mờ kòn klao gam sơm kòp as sồt tơngoh Nhờk Ƀản tàm Khoa, lài mờ hơ̆ tàm pơgăp 10 ngai, Khoa kung neh dờp dùl kă kòn dềt geh tơngŏ bơh kòp as sồt tơngoh Nhờk Ƀản sơl, kòn dềt do neh geh jun tus ƀòn dờng Hồ Chí Minh mờ kung geh cồng nha ai gŏ gơtìp kòp as sồt tơngoh Nhờk Ƀản sơl.

Kung jăt ƀák sĩ Hoàng Ngọc Anh Tuấn đơs, pah nam, tàm càr Dăk Lăk geh dờp gŏ rah rài geh 2, 3 nă kòn dềt gơtìp kòp do, mơya bơta tàm 1 nhai gơlik geh 2 nă kòn dềt gơtìp kòp mờ ndrờm tàm bơta jroă bè nhai 6 pa do là ờ hoan gŏ ngan. Ƀák sĩ Hoàng Ngọc Anh Tuấn đơs là, tŭ gơtìp kòp as sồt tơngoh Nhờk Ƀản, kòn dềt mờng gŏ ală bơta tơngŏ bè duh să uă, jê bồ, gơdan hă mờ hă, tơnơ̆ mờ hơ̆ rơtơs jơng tê, kơl dang jơng tê, lơng mờ geh tơngŏ ờ niam bè nùs nhơm bè glar, bĭc uă, ờ git bơta lơi. Di lah kòn dềt geh gŏ gờñ mờ cèng tus hờ hìu sơnơm gờñ ngan, broă sơm kòp geh ƀuơn rơlao. “Gơwèt mờ kòp as sồt tơngoh tàm hơ̆ geh 4 bơta tơngŏ, dùl là bơta tơngŏ jal mhar, cau kòp gơtìp tàm bơta do chơ̆t mhar ngan, dơ̆ bàr là bơta mhar den khà geh cồng nha kung geh, mơya bơta gơlời wơl kung mìng 50% rơlao hờ đang, chơ̆t kung uă mờ bơta ờ niam gơlời wơl kung uă. Gam dùl bơta tơngŏ tai là bơta tơngŏ ờ jroă den mờng gŏ ngan geh bơta brồ guh pràn wơl mhar. Bè ờs ală kòn dềt tus mờ bol añ tàm do gơtìp tàm bơta kòn dềt jal mhar den tàng lơh ngan sơm kòp geh cồng nha, mơya bơta gơlời wơl mìng 50 mờ 50. Bơta gơlời wơl bơh kòn dềt dê là geh tơngŏ ờ niam tơngoh, geh tơngŏ bè tơngoh, kòn dềt rơtơs jơng tê sùm mờ pal sơm di gơlan jơh rài kis tơn”.

Jăt ƀák sĩ Lê Phúc, Phó Kwang atbồ Anih tờm gròi sền kòp tê jê să càr Dăk Lăk đơs, kòp as sồt tơngoh Nhờk Ƀản là kòp gơtờp jal mhar, lơh gơtờp bơh gùng sơmăc kăp. Kòp geh sùm gùt nam mờ lơh gơtờp tàm kàl mìu, mờng gơtìp tàm kơnòm dềt hờ đơm 15 sơnam. Sur mờ sềm là phan tờm prăp virus kòp as sồt Nhờk Ƀản B uă ngan. “Tàm broă rơcang sơndră mờ kòp as sồt tơngoh Nhờk Ƀản lài ngan pal tơn jơh tiah sơmăc deh tăp, sơmăc sơmăc kòp as sồt tơngoh Nhờk Ƀản den mờng kis rềp mờ hìu tàm ală mpung chi rŭ rơm, lơh rơbòng dà hòr kloh niam den sơmăc ờ gơtùi deh tăp. Dơ̆ bàr tai là kung sơbì bơhiàn lơh wàng ròng phan rềp mờ hìu, sơmăc kis tàm rồm hìu geh mŭt kăp sur hơ̆ sồng lơh gơtờp tus hờ kòn bơnus. Gam bè sơmăc he gơtùi ƀồm sơnơm nàng gơsơ̆t sơmăc, bĭc dang kơmùng nàng tơmù gơtìp sơmăc kăp. Bơta pơn jăt tai là pal cit sơnơm vaccine, tŭ do kòp as sồt tơngoh Nhờk Ƀản ờ hềt geh sơnơm sơm bời, mơya neh geh sơnơm vaccine sơndră geh cồng nha”.

Jăt ală cau jăk chài đơs, kòp as sồt tơngoh Nhờk Ƀản geh gơtìp gơlời wơl ală bơta tơngŏ ờ niam uă ngan tŭ kòn dềt gơtìp kòp, den tàng, bơto sồr làng bol pal rơcang ai kòn lòt cit sơnơm vaccine sơndră mờ kòp as sồt tơngoh Nhờk Ƀản di sơnam. Tŭ gŏ kòn dềt geh tơngŏ duh să, jê bồ, gơdan hă, rơtơs jơng tê... cèng mơ kòn dềt tus tàm ală hìu sơnơm rềp ngan nàng geh kham mờ sơm kòp di tŭ.