Ngai 22/09, Hìu sơnơm kơnhoàl Krông Pa, càr Gia Lai yal bè dùl nă cau chơ̆t tài bơh kòp sơnrang là sau Ksor Kiêm (8 sơnam, kòn cau Jrai, ơm tàm ƀòn Chư Krih, xã Chư Drăng, kơnhoàl Krông Pa). Cau hìu bơnhă bơh sau Kiêm dê pà gĭt, tài bơh ờ gĭt sau gơtìp so kăp bơh tàm tŭ lơi den tàng ờ gŏ cĭt vaccine rơcăng sơndră kòp sơnrang.

Tŭ sau Kiêm geh bơta gơ tơngŏ duh să, glar tàm să jan, hìu bơnhă blơi is sơnơm ai kòn in hùc mơya ờ gŏ bời. Tus ngai 12/09, sau geh jun hờ Hìu sơnơm kơnhoàl Krông Pa bal mờ bơta gơ tơngŏ gơbàn duh să, bơsiă, glar tàm să. Tus mang dùl ngai bal, sau geh tềl tơngŏ kơn jơ̆ den tàng geh jun tus Hìu sơnơm Deh dùh Kòn dềt càr Phú Yên mờ geh kham kòp gĭt là bơtờp mờ kòp sơnrang. Ngai 15/09, sau Kiêm geh jun tus Hìu sơnơm Kơnòm dềt 2, ƀòn dờng Hồ Chí Minh tàm bơta jroă ờ gam kah bơta lơi tai. Sau geh xét nghiệm, cồng nha bơtờp mờ virus sơnrang mờ tus ngai 20/09, sau Kiêm chơ̆t. Bơh bồ nam tus tŭ do, Gia Lai geh 11 nă cau chơ̆t tài bơh kòp sơnrang, uă ngan rlau jơh tàm tiah Tây Nguyên.