Là dùl tàm ală cau ơm kơ̆p sùm jơh klo ngai nàng thàn ai sră kham măt ai bơklau in tàm bồ ƀùi mho, bi Yên Thị Sáng ơm tàm thị trấn Chư Prông, kơnhoàl Chư Prông pà gĭt, tàm pơgăp dùl poh, jơh bal bơklau mờ 2 nă kòn klau bi dê ndrờm gơtìp bơtờp kòp jê măt klồng. Bơh sơnrờp, kòn klau pŭt bi dê gơtìp bơtờp bơh tàm hìu bơsram, bi lòt blơi is sơnơm hùc mờ trŏ măt ai kòn in. Dùl poh bơh chờm, tŭ kòp kòn dê neh gơmù đau dùl êt den bơklau mờ kòn klau tơnhoa gơtìp bơtờp, den tàng bi lam lòt kham gah kòp do, bal mờ bơta gơn kơnờm rơ̆p bời kòp mhar rlau. Bi Yên Thị Sáng, đơs: Bơta kòp jê kòn dê gơtìp dùl poh, tus tŭ do neh gơmù đau uă sơl, kòn dơ̆ bàr as sồt ir. Bèp ală kòn dê den drim gơtìp, mho lòt tus hìu sơnơm kham tơn. Tŭ do, uă cau gơtìp bơtờp kòp jê măt klồng.

Tàm pơgăp dùl nhai do, ală hìu sơnơm tàm kâp càr tàm càr Gia Lai neh gŏ rlau 3 rbô nă cau kòp jê măt klồng. Tàm hơ̆, nggùl khà geh kham mờ sơm kòp tàm ală hìu sơnơm gah kòp măt tàm ƀòn dờng Pleiku. Kờp bal, pah ngai, tơl hìu sơnơm dờp mờ sơm kòp ai pơgăp 50 nă cau kòp jê măt klồng in, geh ngai rlau 100 nă. Nàng kờñ kơryan geh cồng nha kòp jê măt klồng, Anih tờm Gròi sền Kòp tê jê să càr Gia Lai (CDC Gia Lai) neh geh sră pơyua ală hìu sơnơm 17 kơnhoàl, thị xã mờ ƀòn dờng in. Jăt mờ hơ̆, sồr ală hìu sơnơm sơlơ mblàng yal, jăt sền, gŏ gờn mờ bơsong di tŭ ală tiah gơtìp bơtờp kòp jê măt klồng tàm tiah he dê. Thạk sĩ, ƀak sĩ mờng gah kòp măt mò Vũ Phương Việt Hằng, lơh broă tàm Anih tờm CDC Gia Lai pà gĭt, cau kòp jê măt klồng tàm sơnam kơnòm bơsram gam gơlơh bè ngai sơlơ gơguh uă, den tàng jơh bal mè bèp mờ kơnòm bơsram bal mờ hìu bơsram ndrờm pal geh broă lơh dipal nàng kờñ kơryan kòp lơh bơtờp. Mò Vũ Phương Việt Hằng, đơs: Geh ală jơnau bơto sồr krơi is. Hơ̆ là tàm hìu bơsram là tiah ƀươn bơtờp mhar ngan rlau jơh. Tŭ kơnòm dềt bơtờp kòp, mè bèp kờñ pal ai kòn in ơm tàm hìu, nàng pleh lơh bơtờp ai cau bơyô ndai in. Tŭ kơnòm dềt neh bơtờp kòp rao den mè bèp pal jun kòn lòt tus hờ hìu sơnơm nàng kham mờ sơm kòp kòn in, ờ gŏ di blơi is sơnơm nàng trŏ măt, rơcăng lài ngòt gơbàn kơn jơ̆ digơlan gơlik geh.

Kòp jê măt klồng sùm sơnđờm bơtờp bơh 3 tus 7 ngai tơnơ̆ tŭ ơm rềp mờ tiah geh kòp. Bơta gơ tơngŏ mùl gŏ ngan geh as gơlik mhàm tềng măt hơ̆ là pơrhê măt, lơh gơhòr dà măt, măt geh uă è măt (digơlan è bò dilah kòp tài bơh virus, halà digơlan è tơlir, rơmĭt dilah bơtờp bal vi khuẩn). Tàm kơnòm dềt digơlan geh bal bơta gơ tơngŏ kòp as sồt muh, rơnồng dờ, as sồt gùng tă nhơm, duh să...Cau kòp digơlan bơtờp kòp bơh ơm rềp tơn mờ dà gơ hòr bơh măt, muh, mbùng; tài bơh ơm rềp tơn mờ cau kòp, jùt tê tềng măt, ngui bal phan mờ cau kòp...Nàng pleh kòp jê măt klồng lơh bơtờp uă, tơl nă cau kờñ pal tơrmù ƀà broă jùt tê tềng măt, muh, mbùng. Pleh ơm rềp mờ cau gam gơtìp kòp. Ràu goh tê sùm mờ sơƀong mờ dà lơh kloh ƀưn tu bih khih. Ngui chèu pơ àr halà đềs gạc sơnơm (ngui dùl dơ̆) nàng lơh sàng goh măt, tơnơ̆ hơ̆ sơrbì tàm thùng sồ siă geh bơlnơ̆p ndơl nàng pleh lơh gơlik tiah lơh bơtờp kòp ai hìu bơnhă mờ cau gùt dar in, ràu goh ƀưn tu bih khih tơnơ̆ tŭ lơh sàng goh măt.