Jat jơnau yal tàm dơ̆ pơrjum, khà cau chơ̆t tài bơh kòp sơnrang bơh gùt lơgar dê bơh bồ nam tus tŭ do là 64 nă cau, gơlik geh tàm ală tiah tờm bè: Gia Lai, Nghệ An, Điện Biên, Bình Phước. Tàm hơ̆, càr Gia Lai geh 11 nă cau, là càr geh khà cau chơ̆t tài bơh kòp sơnrcang uă ngan rlau jơh gùt lơgar dê, kung sùm ơm tàm mpồl lam lài bè kòp do tàm ală nam pa do.
Tàm pơrjum, ală kwang bàng cribơyai bè bơta kòp sơnrang tàm kòn bơnus tàm lơgar Việt Nam mờ tàm tiah Tây Nguyên, kal ke, bơta lòng mờ ală broă lơh; cribơyai ală broă lơh atbồ mờ sơlơ tơnguh cĭt vaccine tàm mpồl so in ; ală broă lơh rcang sơndră kòp sơnrang tàm kòn bơnus; gơnoar broă mờ kơnòl broă bơh gơnoar atbồ mờ ƀan, ngàñ geh gơrềng tàm càr dê...Jat jơnau tơngkah lài bơh ală kwang bàng jak chài tàm pơrjum, tŭ do kòp sơnrang kung ờ hềt geh sơnơm sơm kòp sơl. Broă rcang sơndră geh cồng nha ngan rlau jơh kung gam là cĭt sơnơm rcang sơndră kòp sơnrang ai phan ròng in mờ cĭt vaccine rcang sơndră kòp sơnrang tàm kòn bơnus tŭ gơtìp so, mèo kăp; geh cồng nha ngan rlau jơh là cĭt lài mờ 24 jiơ tơnơ̆ tŭ gơtìp so kăp.
Viết bình luận