Nam bơsram do, Hìu bơsram kâp 1 Nguyễn Viết Xuân (thị trấn Nhơn Hòa, kơnhoàl Chư Pưh, càr Gia Lai) geh 804 nă kơnòm bơsram. Bơh kờp sền, khà kơnòm bơsram bơh hìu bơsram dê blơi ƀảo hiểm y tế mìng geh 80%. Pơgru Trịnh Mạnh Thắng, atbồ hìu bơsram pà git, tài bơta krơi is bơh tiah do dê geh uă mè bèp lòt lơh broă ngài, ală hìu bơnhă kal ke, kơnòm bơsram là cau jơi bơtiàn dùl êt nă cau mè bèp ờ hềt sền gròi wil tơl tus broă blơi ƀảo hiểm y tế oh kòn he in: “Nam do, khà priă blơi ƀảo hiểm y tế gơguh rlau mờ nam lài, lơh sa hìu bơnhă bơh uă hìu bơnhă kơnòm bơsram tàm do gam gơtìp uă ngan kal ke. Hìu bơsram gơtùi gŏ ală kal ke hơ̆ mờ kung neh ai tơlik uă broă lơh, bơh tàm dơ̆ pơrjum mè bèp kơnòm bơsram dê den hìu bơsram neh tìp mat tơn mè bèp nàng mblàng yal khi in gŏ broă blơi ƀảo hiểm y tế rơp cèng wơl uă bơta kuơ ai kơnòm bơsram mờ mpồl bơtiàn in”.

Tàm khà 23 hìu bơsram tàm kơnhoàl Chư Pưh den mìng geh 5 hìu bơsram geh rlau 90% kơnòm bơsram blơi ƀảo hiểm y tế. Jơnau tờm lơh khà blơi ƀảo hiểm y tế dùl êt là tài khà kơnòm bơsram, cau bơsram dờng geh kes priă dà lơgar pà ƀảo hiểm y tế gơmù uă, tŭ xã, thôn neh lik bơh bơta uă kal ke. Ồng Nguyễn Hữu Hưng, Phó Kwang atbồ Ƀảo hiểm xã hội kơnhoàl Chư Pưh, càr Gia Lai pà git tai: “Cau blơi ƀảo hiểm y tế tàm ală nam pa do gơmù lơyah, jơnau là tài gơ rềng bơh Kơrnuat sồ 612 bơh Ủy ƀan Jơi bơtiàn dê bè tơrmù bă ù, lik bơh bă tiah, den tàng ală kơnòm bơsram tàm tiah do kung gơmù sơl, tàm hơ̆ pơn rơ ngan là ală oh cau jơi bơtiàn dùl êt nă cau. Bè hơ̆ den tàng khà blơi ƀảo hiểm y tế kơnòm bơsram bơh kơnhoàl Chư Pưh dê mìng geh 81%”.

Ndrờm bè hơ̆ sơl, broă blơi ƀảo hiểm y tế kơnòm bơsram tàm kơnhoàl Chư Sê kung gơtìp uă kal ke. Bulah kơnòm bơsram cau jơi bơtiàn dùl êt nă cau geh kes priă dong kờl 60% priă tă blơi ƀảo hiểm y tế mơya kung gam mờr 2 rbô 700 nă oh kung ờ hềt blơi sơl. Mò Ngô Thị Hiền, Phó Kwang atbồ Ƀảo hiểm xã hội kơnhoàl Chư Sê, càr Gia Lai pà git, khà blơi ƀảo hiểm y tế kơnòm bơsram, cau bơsram dờng tàm kơnhoàl mìng geh 86%: “Mpồl đơng lam ală hìu bớram, ală anih lơh broă cíñ trị tàm xã mờ anih lơh broă ƀảo hiểm xã hội neh pơgồp bal lòt tus ală thôn, ƀòn mờ ală ơdŭ bơsram nàng mblàng yal, hòi jà, mơya mè bèp kơnòm bơsram ndrờm hơ là hìu bơnhă kal ke ờ gơtùi blơi ƀảo hiểm y tế ală sau in. Bulah bè hơ̆, nam bơsram 2023- 2024, bol hi neh tă pơgồpjơnau đơs ai Ủy ƀan Ñân zân kơnhoàl sồr ală mpồl đơng lam ală xã, hìu bơsram mờ gah bơto bơsram nàng lam lơh tac ƀảo hiểm y tế kơnòm bơsram, pơn đơl pràn lơh ngan geh 100% khà kơnòm bơsram blơi ƀảo hiểm y tế”.

Jat khà kờp bơh Ƀảo hiểm xã hội càr Gia Lai dê, tŭ do, kơnòm bơsram, cau bơsram dờng blơi ƀảo hiểm y tế mìng rơp pa geh mờr 90%. Càr gam mờr 22 rbô nă kơnòm bơsram, cau bơsram dờng ờ geh priă jền blơi ƀảo hiểm y tế. Bơta do lơh gơ rềng tơn tus gơnoar kuơ bơh ală oh dê dilah ờ bơtuah gơtìp kòp jê, sồr priă tă uă ngan tàm tŭ kham sơm kòp.