Wèt tus tơngkah kir sơn rai 76 nam ngai Cau ling sồt să- cau ling chơ̆t màng, Kông ty TNHH Một Thành viên 715 (Ƀiñ đoàn 15) lam lơh kham pràn kơl dang să jan pah dơ̆ mờ pà sơnơm ờ sa priă ai kông ñân, cau lơh broă mờ mpồl ling mờ cau cíñ sác in tàm ală xã tiah nhàr lơgar càr Gia Lai dê. Geh bơyai lơh bơh ngai 20 nhai 07 tus ngai 27/07, Hìu sơnơm ling klàng làng bol– Kông ty TNHH Một Thành viên 715 neh kham sac rơwah ai rlau 1 rơbô 200 nă kông ñân, cau lơh broă, Ƀí thư Ci ƀộ, cau kra ƀòn, kwang atbồ ƀòn, cau geh bơngă pin dờn, cau ling sồt să, cau ling kòp tê jê să, ală hìu bơnhă cíñ sác tàm ală xã Ia O, Ia Khai, Ia Chía (kơnhoàl Ia Grai, càr Gia Lai) nàng sền gŏ gờñ kòp tàm să jan halà pơhìn aniai bơh kòp jŏ nam dê nàng sơm kòp di tŭ. Tơnơ̆ kham mờ bơto pơlam pràn kơl dang să jan, Kông ty neh pà sơnơm ờ sa priă ai ală hìu bơnhă làng bol in.

Broă lơh kham, pà sơnơm ờ sa priă geh Kông ty 715 lam lơh pah nam mờ jơnau kờñ lơh jat niam broă tam cah is, sền sơ wì pràn kơl dang să jan ai kông ñân, cau lơh broă in jat jơnau sồr. Mơkung bơto pơlam, kham pràn kơl dang să jan ai cau ling sồt să, cau ling kòp tê jê să, cau cíñ sác, cau geh bơngă pin dờn, kwang atbồ thôn, cau kra ƀòn in nàng sền gàr pràn kơl dang să jan, bơtàu tơnguh bơta niam rài kis. Di dơ̆ do, Kông 715 gam lam lơh jàu 300 bơnah phan pà ai ală cau cíñ sác tàm ù tiah kơnhoàl Ia Grai in.