Gam nggui kơ̆p nàng lơh sră kham kòp tàm Hìu sơnơm Măt càr Dăk Lăk, oh Tôn Nữ Yến Nhi, bơsram ơdŭ 11, hìu bơsram kấp 3 Ea H’ Leo, kơnhoàl Ea H’ Leo pà git, tàm ơdŭ bơsram geh gal ngan bơyô gơtìp jê măt mờ dan ơm ờ lòt bơsram, să tờm oh kung neh gơtìp 3 ngai do, neh blơi dà sơnơm nàng crŏt tàm măt, mơya ờ geh cồng nha den tàng pal tus kham hờ hìu sơnơm: “Gơlơh tŭ guh bic bàr đah măt gơñềm, ờ gơtùi lì, kal ke ngan. Ngai do oh tus kham den ƀák sĩ yal oh crŏt dà sơnơm 2, 3 ngai den bời mờ pal tam cah is ală phan ngui bal mờ cau tàm hìu”.

Mờ rơlao 800 nă cau bơsram gam bơsram bal tàm hìu bơsram, mìng tơnơ̆ mờ tŭ sơn đờm mŭt bơsram, hìu bơsram Kấp 1 Lý Tự Trọng, ƀòn dờng Buôn Ma Thuột neh geh 156 nă kơnòm bơsram pal ơm ờ lòt bơsram tài jê măt klồng. Mìng is bơh ngai 11 nhai 09 tus tŭ do hìu bơsram do neh gŏ geh 139 nă kơnòm bơsram gơtìp jê măt klồng mờ nggùl tàm khà kơnờm bơsram do kung gam lòt bơsram bè ờs. Pơgru Lương Thị Bích Nguyên, Kwang atbồ hìu bơsram pà git, geh gal kơnòm bơsram gơtìp jê măt mơya kung gam lòt bơsram, den tàng bơta gơtờp geh mhar rơlao. Hìu bơsram neh sồr gah lơh sơnơm rơcang tơl dà boh siñ lý nàng pà ală kơnờm bơsram in; tơnguh broă lơh kloh niam ơdŭ bơsram, hìu bơsram tơnơ̆ mờ pah dơ̆ jơh bơsram; mờ bơto sồr ală cau mè bèp kơnòm bơsram tŭ măt gơtìp jê pal sơm bời tàm hìu nàng pleh mờ gơtờp tus cau ndai. “Geh ờ uă cau mè bèp tài gơtìp kal ke lòt lơh broă ngài, den tàng broă lời kòn ơm is tàm hìu ờ niam ngan, den tàng pal lời kòn lòt bơsram, den tàng broă gơtờp tàm hìu bơsram là geh uă ngan, bŭ lah bol añ neh geh ală broă lơh bè sồr ală kơnòm bơsram pal tar măt krơh nàng sền gàr măt, pal pơs wàs kloh niam ơdŭ bơsram, să jan kơnòm bơsram mờ bơto sồr ală kơnòm bơsram tàm broă lơh kloh măt bè lơi geh cồng nha”.

Hìu bơsram Mầm non Hoa Lan, sơnah ƀòn Tân Tiến, ƀòn dờng Buôn Ma Thuột geh 2 hìu bơsram, mờ di pơgăp 200 nă kòn dềt gam bơsram tàm 10 ơdŭ. Lài mờ hơ̆ tàm pơgăp 1 nhai, hìu bơsram mìng gŏ geh ờ uă kơnòm dềt gơtìp jê măt, mơya tàm 2, 3 ngai pa do broă kơnòm dềt gơtìp jê măt geh tơngŏ gơguh uă, mờ 20 nă kơnòm dềt gơtìp jê măt. Pơgru Lê Thị Liên, kwang atbồ hìu bơsram Mầm non Hoa Lan pà git, tŭ do hìu bơsram gam lơh pràn broă yal mblàng mờ bơto sồr cau pơgru, kơnòm bơsram lơh jăt nền nòn ală broă nàng rơcang sơndră mờ kòp di jăt jơnau bơto sồr bơh gah lơh sơnơm dê: “Broă pơs wàs kloh niam tàm hìu bơsram pal geh ai lài ngan. Lài ngan là phan ngui bơh kơnòm bơsram dê den pal ngui is; dơ̆ bàr tai là ală phan ngui tàm ơdŭ bơsram den cau pơgru pal lơh kloh, dơ̆ pe tai là sồr ală kơnòm bơsram rào tê di pal. Tŭ gŏ kơnòm bơsram gơtìp jê măt den hìu bơsram pal tam cah is bañ kơnòm bơsram hơ̆ tơrgùm bal tàm hìu bơsram. Tŭ ală kơnòm bơsram gơtìp jê măt den pal geh pơgồp bal mờ gah lơh sơnơm mờ cau mè bèp nàng sơm gơwèt mờ ală kơnòm bơsram hơ̆”.

Jăt ƀák sĩ Lê Dương Thuỳ Linh, Phó kwang atbồ Hìu sơnơm Măt càr Dăk Lăk yal, kòp jê măt tàm càr Dăk Lăk gơlik geh rah rài bơh nhai 8. Mơya tàm pơgăp 2 poh pa do, khà cau gơtìp gơguh uă ni sơna. Tŭ do tàm 1 ngai, Hìu sơnơm dờp kham geh bơh 200 tus 300 nă, mìng là kơnòm bơsram. Ƀák sĩ Linh pà git tai, kòp jê măt pơrhê mờng gơtờp bơh broă tòm bal mờ dà diao, ală dà gơlik bơh măt, muh cau kòp ha là bơh phan ngui, phan nhơl, chèo cau gơtìp kòp, dà gơtìp ƀơ̆, tàm hơ̆ uă ngan là dà tàm ală tơnao dà bơsram re... “Dơ̆ gơtờp kòp jê măt nam do uă ngan, bơdìh mờ bơta gơtìp aniai tềng klồng măt den virus nam do geh tơngŏ gơmŭt tàm kòn măt mờ tŭ neh gơtìp aniai den gơmŭt tàm đah jù den lơh gơtìp ờ loh măt, geh ờ uă cau neh blơi is sơnơm nàng crot măt di gơlan lơh gơtìp sồt klồng măt. Mờ tŭ gơtìp virus dơ̆ gơtờp do den cau kòp lơh gơtìp duh să, gơtìp jê sồt tàm gùng tă nhơm, di gơlan geh tơngŏ ờ niam tàm broă tơrdih phan sa. Tŭ do ờ hềt geh sơnơm vaccine nàng rơcang sơndră mờ kòp mờ kung ờ geh sơnơm crot măt nàng rơcang sơndră, den tàng làng bol bañ blơi is sơnơm nàng rơcang sơndră mờ tŭ kòp gơtìp pal tus hờ hìu sơnơm gah sơm kòp măt nàng kham mờ sơm kòp”.

Kung jăt ală ƀák sĩ đơs, kòp jê măt là kòp ờ jroă mờ geh bời is bơh 1 tus 2 poh, di lah cau gơtìp jroă den tàm 1 nhai. Mơya, di lah sơm kòp gờñ mờ sơm di mờ jơnau bơto sồr den kòp geh mhar bời mờ gơmù ală bơta gơlik ờ niam.