Jăt khà kờp bơh Anih tờm Gròi sền kòp tê jê să càr Dăk Lăk dê, bơh bồ nam tus tŭ do, jơh gùt càr gĭt gŏ geh mờr 1 rbô nă cau bơtờp kòp sốt xuất huyết, tàm hơ̆ geh 1 nă cau chơ̆t. Khà cau bơtờp kòp sốt xuất huyết gĭt gŏ bơh bồ nhai 07 tus tŭ do là mờr 500 nă, ndrờm mờ kờp jơh khà cau bơtờp tàm càr tàm 6 nhai bồ nam do.

Tàm khà hơ̆, ờ dùl êt nă cau kòp mŭt piam kòp tàm hìu sơnơm tàm bơta kòp sốt xuất huyết kơn jơ̆ ngan, geh tềl tơngŏ tơngkah lài. Pe tiah geh cau bơtờp kòp sốt xuất huyết uă ngan rlau jơh là: Ea H’leo, Ea Kar mờ ƀòn dờng Buôn Ma Thuột. Ồng Hoàng Hải Phúc, Phó Kwang ătbồ drơng kơnòl broă Anih tờm Gròi sền kòp tê jê să càr Dăk Lăk pà gĭt, jơnau lơh gơguh uă cau bơtờp kòp sốt xuất huyết tàm càr là tài bơh làng bol gam ờ gŏ rơcăng ngăc, ờ gŏ gĭt kơrhia tàm broă lơh rơcăng lài. Tŭ bơtờp kòp sùm lòt blơi is sơnơm rê hùc tàm hìu, lơh kòp gơbàn kơn jơ̆ mờ kal ke ngan sơm bời, pơhìn lơh chơ̆t să uă ngan.