Tơnơ̆ ngai bơtrơh jơh bol sò tơm sơgràm phà, ling klàng 2 lơgar Việt Nam mờ Lào ờ mìng sơlơ tơnguh tai bơta gĭt gơ̆p đềt mềr jŏ jòng đah 2 mpồl ling klàng dê lơm mờ gam sơlơ lơh broă bal geh cồng nha tàm broă kơlôi sơnơng jak chài, kwơ màng là ling klàng lơh sơnơm 2 lơgar neh pơgồp bal lơh geh cồng nha ală dơ̆ bơkiar leh dơ̆ sơnrờp, pờ tơlik gùng lòt pa tàm broă lơh sền gròi pràn kơl dang să jan ai làng bol in bơh mpồl ling klàng lơh sơnơm lơgar Lào dê.

 Là dùl tàm ală cau kòp pa geh bơkiar leh tàm Hìu sơnơm Ling klàng 103 lơgar Lào, ồng Vanxay Lixayalath, 58 sơnam, ơm tàm càr Savannakhet ờ jai mpồn bơta ngoh rơngăc chờ hờp tơnơ̆ dơ̆ reh bơkiar leh geh cồng nha bơh ală y ƀak sĩ lơgar Việt Nam mờ Lào dê pơgồp bal lơh. Ồng Vanxay đơs, 5 nam lài, ồng gĭt he gơbàn kòp leh mờ mìng tơnơ̆ 2 nam ồng neh pal jồr mhàm. Nam lài, ồng neh tus tàm Hìu sơnơm Ling klàng 103 lơgar Lào nàng kham mờ lơh bơkiar leh. Ồng Vanxay, đơs: Lài mờ tŭ reh añ gơlơh tàm să jan glar bòl ngan, sa phan lơi kung ờ jai loăn mờ jơng tê jê rah, jê ram ngan mơya tơnơ̆ tŭ geh ală ƀák sĩ tàm do reh añ gơlơh lơngai niam ngan.

Kung bè ồng Vanxay sơl, bi Sangthong Keomonasi, 32 sơnam ơm tàm càr lơgar Vientiane ngoh rơngăc tŭ yal bè gùng lòt jòi geh wơl rài kis bơh he dê mờ uă bơta bơtoah bơtoài ngan. Bi Sangthong đơs: Pơgăp mờ do 5 nam, bi gơlơh glar bòl tàm să, tài bơh he mìng kơlôi là kòp bè ờs lơm gơ dê den tàng neh ờ gŏ lòt kham mờ blơi is sơnơm pràn nàng hùc ai să jan in pràn kơl dang. Tŭ kòp ờ bời dồ ết lơi, tơnơ̆ hơ̆ bi tus hìu sơnơm kham den hơ̆ sồng gĭt là he gơtìp ờ pràn leh tơngai lồi dŭt. Tŭ hơ̆, bi muat jrùm uă ngan tài bơh tơl ală jơnau kơlôi sơnơng bơh bi mờ hìu bơnhă bi dê pal lời wơl dồ gah nàng tơrgùm sơm kòp. Mờ bơta bơtoah bơtoài ngan neh tus mờ bi tŭ geh gĭt jơnau yal là Hìu sơnơm Ling klàng 103 lơgar Lào dê gam lơh broă bal mờ Hìu sơnơm Ling klàng lơh sơnơm 103 lơgar Việt Nam lơh bơkiar leh. Bi Sangthong, đơs: Lài mờ tŭ reh añ pal jồr leh 3 dơ̆ dùl poh. Tŭ do añ gơlơh bè neh geh rài kis pa.

Tŭ do jơh ală cau kòp tơnơ̆ tŭ geh bơkiar leh să jan pràn kơl dang niam ngan, cồng nha xét nghiệm, siñ hóa mờ dà đồm ndrờm niam lơm loh làng ngan, bàr pe nă cau kòp neh wơl rê wơl mờ broă lơh pah ngai. Đại tá Savengxay Dalasath, Kwang atbồ Hìu sơnơm Ling klàng Làng bol 103 lơgar Lào dê pà gĭt, broă bơkiar leh geh cồng nha bơh cau pà leh is tàm lơgar Lào ờ mìng lơh tềl bơta dờng pràn mờ bơtàu tơnguh bơh Hìu sơnơm dê lơm, mờ gam là broă lơh kwơ màng gơwèt mờ gah lơh sơnơm lơgar Lào dê. Đại tá Savengxay Dalasath, đơs: Broă bơkiar leh geh cồng nha ai ală cau kòp in dơ̆ do, dilah ờ geh bơta dong kờl bơh ală ƀák sĩ Ling klàng lơh sơnơm lơgar Việt Nam dê den ngan ngồn bol añ ờ gŏ lơh sir kơnòl broă do ờ. Añ kơ̆p kờñ tàm tơngai tus 2 Hìu sơnơm, 2 mpồl Ling klàng rơ̆p ngai sơlơ geh ală broă lơh bơtàu tơnguh pràn rlau tai bal mờ bơta pràn jak mờ ală dơ̆ reh geh cồng nha.

Rơndăp broă lơh bơkiar leh geh 2 Hìu sơnơm Ling klàng 103 2 lơgar lam lơh bơh nam 2018. Tus tŭ do, 2 gah neh pơgồp bal lơh jat geh cồng nha 9 dơ̆ bơkiar leh tàm Hìu sơnơm Ling klàng 103 lơgar Lào dê. Đah lơgar Việt Nam rcang mpồl cau, măi mok, sơnơm tơm ba mờ rcang phan dong kờl, ai Hìu sơnơm lơgar Lào dê den rcang cơldŭ reh, cơldŭ tơnơ̆ reh, tơlik mat mpồl đơng lam, ală gah lơh broă ờs mờng, bơto pơlam ală broă lơh ờs mờng neh geh lơgar Việt Nam dê bơto pơlam.

PGS. TS Vũ Nhất Định, Phó  Kwang atbồ Hìu sơnơm Ling klàng lơh sơnơm 103 pà gĭt, bơh bơta bơto pơlam bơh kwang bàng jak chài lơgar Việt Nam dê, ală y ƀák sĩ bơh Hìu sơnơm ling klàng 103 lơgar Lào neh hời rơ hời lơh tờm bè bơta chài ngui bàr pe broă lơh tàm tŭ bơkiar leh kung bè ală broă lơh jat sền cau kòp in tơnơ̆ tŭ bơkiar leh tơn mờ yal tơngĭt lài ală bơta digơlan gơlik geh. PGS. TS Vũ Nhất Định, đơs: Broă dong kờl lơgar gơ̆p bơyô lam lơh bơta chài bơkiar leh tàm lơgar Lào là dùl broă lơh niam ngan lơh geh tai bơta tam klăc đềt mềr đah 2 lơgar, 2 mpồl Ling klàng mờ ală jơi bơtiàn lơgar Lào. Mờ añ đơs là, do là broă lơh tàm pơrdờn bơh ală rơnàng bèp bi lòt lài mờ kung là tơngkah ală rơnàng pơn jat tai nàng pơn jat tai prap gàr bơta gĭt gơ̆p đah Việt Nam mờ Lào, niam ngan, khat gơboh ngan.

Jat broă rơndăp lơh, tàm nam do, Hìu sơnơm ling klàng lơh sơnơm 103 lơgar Việt Nam rơ̆p pơn jat tai ai kwang bàng jak chài tus pơgồp bal dong kờl Hìu sơnơm Ling klàng 103 lơgar Lào lơh jat jơnau kờñ tus nam 2025 gơtùi lơh sir lơh tờm bơta chài bơkiar leh, bơh hơ̆ pơgồp bơnah tơnguh broă lơh sền gròi pràn kơl dang să jan làng bol in bơtàu tơnguh ndrờm pal mờ ală lơgar tàm tiah do mờ tàm dunia.