Mpồl cau lơh sơnơm kơnòm să càr Dăk Lăk tŭ do geh 16 mpồl gơ wèt mờ mờr 1 rbô nă cau tàm mpồl là ală y ƀák sĩ kơnòm să gam lơh broă tàm ală hìu sơnơm, anih tờm lơh sơnơm bơh kâp càr tus kâp kơnhoàl mờ ală hìu sơnơm dùl nă să is tàm càr. Tàm 5 nam do, ală kâp Mpồl cau lơh sơnơm kơnòm să tàm càr neh geh uă broă lơh dong kờl is tài pràn kơldang să jan mpồl bơtiàn, bè: Lam lơh 120 dơ̆ kham kòp, pơlam sền gàr pràn kơldang să jan, pà sơnơm ờ sa priă ai 86 rbô nă làng bol in mờ khà priă rlau 4 tơmàn 200 tơlak đông; bơto pơlam ală broă lơh dong kờl bơh sơn rờp ai git nđờ rbô nă pơgru ală hìu bơsram mầm non, kâp 1 tàm càr in.

Tàm tơngai lơh broă pa, Mpồl cau lơh sơnơm kơnòm să càr Dăk Lăk pơn jat tai sơlơ tơnguh gơnoar broă mờ pràn jak cau tàm mpồl dê bơh ală broă lơh bơsram, pơlam tàp, sơlơ tơnguh nùs nhơm niam lơh sơnơm; sơlơ tơnguh bơta bơceh pa tàm kơlôi sơnơng jak chài mờ sơlơ tơnguh tai broă lơh dong kờl is tài pràn kơldang să jan mpồl bơtiàn.