Jat Anih tờm gròi sền kòp tê jê să càr Dăk Lăk yal, kờp bơh nhai 6 tus ngai 29/9, gùt càr git gŏ geh 33 rbô 120 nă cau jê mat klồng, uă ngan là kơnòm bơsram. Gah lơh sơnơm càr Dăk Lăk gam jal mhar lam lơh ală broă lơh nàng kơryan bơta bơtờp uă bơh kòp do dê. Tàm khà rlau 30 rbô nă cau kòp jê mat klồng den geh rlau 29 rbô nă cau kòp geh git gŏ tàm ală hìu bơsram. 3 kơnhoàl sền gŏ cau kòp uă ngan rlau jơh là Buôn Đôn, Cư Kuiñ mờ Cư Mgar, ndrờm tàm khà rlau 2 rbô nă.

Tềng đap bơta kòp jê mat klồng gam bơtờp mhar ngan tàm càr, ngan là tàm kơnòm bơsram, Sở Y tế càr Dăk Lăk neh pơgồp bal mờ ală mpồl lơh broă geh gơ rềng sơlơ tơnguh rlau tai ală broă lơh lùp sền, jat sền, tam cah is mờ mblàng yal jơnau bè ală broă lơh rơcang sơndră kòp tàm hìu bơsram mờ mpồl bơtiàn. Bal mờ hơ̆, ală anih lơh sơnơm kung neh rơcang lài sơnơm nàng drơng di tŭ ai ală cau gơtìp kòp in mờ tŭ lơi kung rơcang lài dờp, sơm cau kòp in.