Dùl àng drim gờñ, ƀòn Kon Wang, gơ wèt sàh Tân Tiến, kơnhoàl Krông Păk yau, càr Dăk Lăk, ù tiah ring lơngai gơ bơrlŭ bal mờ nhŭ par bơh bơnhă tiar phan mờ tê bơh cau tiar phan neh kra dê. Neh rlau 80 sơnam, ồng A Lih kung gam ơm sùm rềp bơnhă chah hơng ồs, sap ntas pờng mut nggồr mờ ồs hơng pơrhê.

Bulah neh dờng sơnam, mat ồng A Lih dê kung gam àng sơdah ngan, mpàng tê neh plào jơh, kră bè ală pềs, wơu mờ ồng neh tiar git nđờ jơt nam do. Làng bol tàm ƀòn sùm đơs, mìng kờñ klo sap ntas mut ồng A Lih, A Hluh dê nggồr den git là mờr geh pềs, geh wơu hơr ai kàl lơh mìr mờr tus in. Mơya nàng gơtùi gàr huềng bơta kờñ gơboh mờ broă lơh tàm tơngai do ờ ƀuơn dùl êt lơi. Ồng A Lih yal: “Rài yau gam gơtùi jòi quặng, jòi lòs tàm dà croh. Tŭ do den ờ gam tai. Kờñ tiar phan den pal lòt blơi lòs bơh bơdìh, giă priă den kas. Dùl nơm pềs, wơu geh tŭ pal 1 poh hơ̆ sồng tiar gơs, mờ tŭ tơngai hơ̆ den ờ gơtùi lòt lơh mìr. Mơya taì kờñ broă lơh den tàng ờ gơtùi sang”.

Pah ngai, làng bol tàm ƀòn cèng tus bơnhă tiar in tơl nrăng ñíp rơndeh oto yau, tơl gơl lòs dan geh, halà tàm pơ gơl mờ tơngời, kòi, iar, sur… Ờ duh pal geh priă, khi tus bơnhă tiar phan, mìng kờñ geh pềs hơr, wơu kơ̆. Mò La Ghi, cau Sơdàng ơm tàm ƀòn Kon Wang ngoh rơngac đơs: “Hìu bơnhă añ kung sùm cèng sur, iar tus tàm pơ gơl ai pềs, wơu. Phan bơh ồng A Lih tiar kơ̆ ngan. Dilah gơbàn ờ niam bơta lơi mìng cèng tus lơh niam wơl là gơ lơh bè pa tơn. Añ kơp kờñ ồng sùm pràn kơldang mờ kuơmàng rlau là bơto wơl broă tiar phan ai kòn sau in nàng broă lơh bơh yau do ờ gơtìp roh huĭ”.

Tàm ƀòn Kon Wang, broă tiar phan ờ mìng là broă lơh sa mờ gam là huềng bơh ƀòn lơgar dê tai. Sap mut ntas ờ mìng là tiar lòs, mờ gam tiar nùs tồr, tơmut huềng tàm tơl phan ngui lơh broă. Hơ̆ ờ mìng là anih bơto broă lơh mờ gam là ù tiah nàng sền gàr huềng bơh broă tiar phan dê, tiah mờ ală bơta kuơ niam chài geh tàm pơ dờn wơl bơh tơl dơ̆ pờng mut tơrgùm jơh bơta pràn, tơl gùng tiar jơh nùs, lơh gơs bơta niam chài mờ bơta pơn yờ să bơh cau Sơdàng dê. Ồng A Lih yal tai: “Tàm ƀòn bol hi dê tŭ do gam 2, 3 nă cau git tiar phan, bè ồng Mêp, ồng Hluh, ồng Hlak ơm tàm thôn 5. Làng bol kung kờñ ngan ală pềs, sơ gàk, wơu nàng tùc.. Phan tàm drà den uă, niam, mơua ngui ờ niam bè phan tiar mờ tê. Pềs den tiar jat tê, di wơp tơn, hơr mờ kơ̆ tai. Hơ̆ là huềng, là bơta niam bơh broă tiar phan dê”.

Bi La Ghon, kòn cau Sơdàng ơm tàm ƀòn Ea Mao, dùl nă nac mờng kwèng ngan bơh bơnhă tiar phan dê pà git: “Pềs tiar tàm do ià di wơp mờ tê, hơr mờ kơ̆ tai. Ai pềs blơi tàm drà, ngui 2, 3 ngai là ờ gam hơr tai, ƀuơn gơ pơh tai. Añ pin dờn mờ kờñ ngan ală phan bơh cau tàm bòn he dê mòn gơs”.

Broă tiar phan bơh yau là bơta pơn yờ să bơh git nđờ rài do cau Sơdàng dê. Bulah rài kis pa neh geh uă ngan ngui lơh broă niam rlau, mơya cau Sơdàng tàm ƀòn Kon Wang, sàh Tân Tiến, gơ wèt sàh Ea Yiêng, kơnhoàl Krông Păk yau, càr Dăk Lăk kung gam sùm đềt mềr mờ bơnhă tiar phan mờ tê. Tài hơ̆ là huềng nùs bơh bơhiàn lơh broă dê. Pah dơ̆ sing ồs là pah dơ̆ lơh gơlik bơta ram mhŭ ai niam chài kòn cau in.

Tŭ sap pờng mut dê gam mpong ntas tàm nggùl tiah brê bơnơm Kon Wang, tŭ ồs kung gam hơng sùm tàm bơnhă ù yau… pin dờn là, bơhiàn bơh yau cau Sơdàng dê kung gam pơn jat tai kis sùm, àng gơ crà mờ kơ̆ dơn bè ồs tàm nùs ală cau tiar phan neh kra, ală cau ngềt ngơt mơya pơn yờ să ngan gam gàr huềng kòn cau he in.