Pah tŭ lồi poh, bi A Huyền ndrờm bơto ală kơnòm dềt tàm ƀòn bơsram đờng T’rưng, đơs jơnau pơn đik kòn cau Sơdàng. Bơdìh hơ̆ tai, bi gam lơh broă bal mờ cau chài Đinh Xuân Đề (cau chài đơs crih tàm Mpồl đơs crih tamya càr Kon Tum lài do) nàng bơto, lơh jơnau đơs crih tamya nàng ai ală kơnòm dềt tàm ală sàh in, dong kờl ală kơnòm dềt geh nùs nhơm pin dờn tàm broă pơrlòng đơs crih tamya dờng. 

Nùs nhơm kờñ gơboh sùm geh tàm bồ tơngoh cau chài A Huyền dê, pơlam nùs nhơm gơguh kờñ tus mờ ală làng bol tàm ƀòn in: “Broă lơh wơl, bơceh lơh, teh, uh phan teh, phan uh jơi bơtiàn dê den hìu nhă, oh mi, hơ̆ sồng ală kơnòm dềt, ală oh dềt tàm ƀòn kờñ ngan. Ờ mìng làng bol kòn cau Sơdàng, mờ geh bal oh mi cau Yoan, tề kòn bơh să tờm dê tus nàng iăt mờ bơsram dròng cing, teh đờng T’rưng. Đơs bal ngan là hìu nhă kờñ ngan añ lơh bè gùng đơs crih ờs mờng do. Tài, să tờm añ kung bè cau tàm hìu, oh mi tàm ƀòn ndrờm kơ̆p kờñ geh prăp gàr niam bơta niam chài rơgơi krơi is ờs mờng, tơnơ̆ do ờ gơtìp roh”.

Gam bi A Bliêt kis tàm ƀòn Kon Wang, sàh Tân Tiến, càr Dăk Lăk den lơh geh 2 mpồl dròng cing mồng, tamya, đơs jơnau pơn đik nàng ală kơnòm bơsram in, tus bal uă broă lơh dờng bè Lơh chờ kơphe Buôn Ma Thuột, Lơh chờ sầu riêng tàm Krông Păc… Bi kung sền sơwì, lơh geh ală jơnau đơs crih tamya bè “Iar nrao”, “Săp cing mồng ƀòn oh” geh khà dờng tàm ală dơ̆ pơrlòng tàm càr dê.

2 nă kòn bi dê kung pơn jăt bơhiàn jăk chài gùng đơs crih ờs mờng hìu nhă dê sơl: “Tàm 2 mpồl dròng cing mồng geh 28 nă, tàm hơ̆ 2 nă kòn añ geh tus bal. Tŭ do geh kòn dờng gam bơsram nam dơ̆ 2 hìu bơsram Cao đẳng Văn hoá Nghệ thuật Dăk Lăk, kòn añ bơsram gah đờng piano, bơdìh hơ̆ tai kòn añ kung bơsram tai ală phan uh, phan teh jơi bơtiàn ndai dê”.

Tŭ Internet bơtàu tơnguh, Cau chài A Huyền mờ A Bliêt kung neh ngui ală bơta geh tàm internet bè Facebook, Zalo…, nàng tam pà bal nùs nhơm kờñ gơboh, pơlam nùs nhơm kờñ gơboh bè gùng đơs crih jơi bơtiàn dê tus mờ rơcang kơnòm să. Cau chài A Huyền pà git: “Jơnau kờñ ai gùng đơs crih ờs mờng mŭt tàm ală pang internet mpồl bơtiàn nàng geh uă cau git bè gùng đơs crih brê bơnơm dờng dê, săp ntas bơh ală phan uh, phan teh ờs mờng Tây Nguyên dê. Añ kung chờ hờp ngan, tài geh cồng nha, hòi jà geh gal ngan cau kờñ. Đơs ngan, nàng ală jơnau uh, jơnau teh ờs mờng añ dê tơmŭt tàm internet mpồl bơtiàn den kung pal geh tai phan bơna măi mok tờm ngan nàng lơh, nàng tơmŭt. Pal pơlam ală kơnòm dềt, ală lŏ mòm tơrgùm đơs crih tamya… den clip geh gal ngan cau sền rơlao. Tàm tơngai pa do, tài ală bơyô lơh clip jăt nùs nhơm kờñ lơh, lơh mờ kŭp ờ uă jơnau đơs crih geh añ đơs, hơ̆ sồng oh mi tơmŭt tàm internet mpồl bơtiàn. Cau sền gŏ niam, gŏ geh kwơ den kờñ bal uă ngan, să tờm añ chờ hờp ngan tŭ geh ală clip geh să tờm añ lơh”.

Kung ndrờm bal mờ nùs nhơm kờñ gơboh bơh broă ai rùp rài bal mờ gùng đơs crih ờs mờng bơh să tờm dê tơmŭt tàm internet mpồl bơtiàn, bi A Bliêt pà git: “Añ kung neh tơmŭt ală rùp rài bơh ală kơnòm dềt teh đờng T’rưng, dròng cing, rùp tamya xoang… tàm ală pang internet mpồl bơtiàn. Mơya, tài tŭ do bol añ ờ hềt geh phan bơna lơh tờm nàng lơh den tàng kung ờ hềt tơmŭt tàm internet mpồl bơtiàn uă sơl. Añ kơ̆p kờñ tus do, tŭ tăc geh phan uh, phan teh mờ añ lơh gơs, ha là lòt đơs di lah geh tơl priă, añ rơ̆p blơi măi lơh niam nàng prăp wơl ală jơnau đơs, jơnau dròng cing mồng, đơs pơn đik, tamya xoang tàm ală pang internet mpồl bơtiàn mờ jơnau kờñ là nàng yal bơta niam chài ờs mờng kòn cau Sơdàng dê tus mờ ală cau sền, làng bol kis tàm ală tiah ndai in git bal”.