Nuk năk là tờm chi gơ hòn is. Plai nuk năk geh să gơ thàp bè plai phượng, jòng mờr 1 thơk, geh dà tơlir mờ sùm gơ căt gơs nsrum tềng bồ ntê. Is ồn, bơkàu, lơng kòt, plai nuk năk ndrờm geh cau Tây Nguyên ngui nàng gơm gơs biap sa. Tàm hơ̆, plai nuk năk gơtùi gơm gơs uă biap bơkah ngan bè lơh nộm, chàng mờ poac, gơm mờ ka dà croh halà hồl cik mờ boh mrĕ, cik mờ mắm tôm halà ƀŏ mờ blơn bơtang. Bơta bơtang is ồn bơh plai nuk năk dê gơ bơrlŭ bal mờ bơta hang bơh boh, bơta hòi mrĕ dê lơh gơlik bơta bơkah is ồn ờ gơtùi huĭ tus ală cau lơi dùl dơ̆ geh sa gơ.

Bi H’Trich Niê, ơm tàm ƀòn Êbung, sàh Ea Ktur, càr Dăk Lăk pà git, plai nuk năk là phan sa mờng kwèng ngan gơ jat mờ sơnam gam dềt bi dê: “Lài do, pah tŭ lòt tàm mìr mờ mò, mè añ dê, khi sùm pik plai nuk năk nàng gơm biap, geh ngai den cik mờ boh mrĕ, geh ngai den cik mờ mắm tôm, dùl bơta phan sa mờng kwèng mờ bơkah tai. Añ kah sùm bơta bơtang gơ bơrlŭ bal mờ lơngồt hơ̆”.

Plai nuk năk tơnơ̆ tŭ pik geh buh hơđang rơnga ồs, lơh gơ in rơ ồ kơmhồ bơdìh nàng ờ huan bơtang tai mờ lơh gơlik bơta lơngồt is ồn gơ dê. Pơn jat hơ̆ den he ai pềs còr jơh kơmhồ rơ ồ, ràu wơl mờ dà hơ̆ sồng tah lơ hơ. Gơwèt mờ bơta kờñ mờ bơta mờng kwèng gơm sa he dê, tơl nă cau rơp geh broă gơm krơi is.

Bi H’Sily Ayun ơm tàm ƀòn Cuôr Dăng, sàh Cuôr Dăng pà git, mìng kờñ geh bơh 1 tus 2 nơm plai nuk năk là neh gơtùi geh dùl prèng nộm bơkah: “Tơnơ̆ tŭ he lơh jơh den tah lơ hơ plai nuk năk, gơtùi bơrlŭ tai mờ ka rì neh wơr rañ, ka buh halà poac kơnrồ, poac ba chỉ… tĕ tai ală bơta boh, ƀòk ngòk, ală bơta nha thồm bè ngò, mrĕ mờ bơrlŭ ring là neh gơtùi sa. Bơta bơtang, lơngồt, lơngàm plai nuk năk dê gơ bơrlŭ bal mờ bơta hòi mrĕ dê, bơta lơngàm bơkah bơh poac, ka dê; bơta ƀô thồm bơh nha tĕ dê lơh gơlik dùl bơta nộm bơkah ngan”.

Ờ mìng là phan sa mờng kwèng, mờ tàm ală dơ̆ lơh chờ, lơh yàng kuơmàng, làng bol kòn cau Rơđê gam gơm ală phan sa bơkah bơh plai nuk năk nàng yờ nac kuơmàng in, bè dùl jơnau hòi jà sa bơta bơkah phan brê bơnơm dê. Bi Y Suyên Bkrông ơm tàm sàh Ea H’ning pà git: “Tŭ do, bulah geh uă phan sa, biap sa pa, mơya làng bol kòn cau Rơđê bol hi dê kung gam mờng gơm, lơh phan sa bơh plai nuk năk. Mờ tàm dơ̆ lơh yàng chờ sa piang kòi pa hìu bơnhă añ dê, añ neh lơh poac sur bơrlŭ bal mờ plai nuk năk nàng yờ sa làng bol in, nàng tơl nă cau sùm kah bơta bơkah is ồn bơh ù tiah brê bơnơm Tây Nguyên he dê”.

Kơnờm bơta bơceh lơh mờ mpàng tê chài rơgơi, cau Rơđê neh lơh plai nuk năk gơ gơs ală phan sa bơkah, ờ mìng mờng kwèng mờ gam geh uă bơta kuơ să jan in tai. Gơ wèt mờ nac lòt nhơl, sa ală biap geh lơh bơh plai nuk năk là bơta sền git ngan ngồn nàng git huềng nùs đềt mềr, bềng lìu nùs nhơm kòn bơnus bơh tiah kơh bơnơm dờng ơning ơnàng dê, pơgồp bơnah lơh li la tai phan sa Tây Nguyên dê.