Tus bal geh ala mat Ƀộ Niam chài, Tàp pràn să jan mờ Lòt nhơl; ală cau gĭt wă jrô, cau kơlôi sơnơng niam chài bal mờ uă ngan làng bol tiah gĭt gŏ Đờng lŭ Dăk Sơn. Đờng lŭ Dăk Sơn geh gĭt gŏ nam 2014 tàm sàh Nam Xuân, kơnhoàl Krông Nô, càr Dăk Nông yau (tŭ do là sàh Dăk Săk, càr Lâm Đồng) geh 16 nrang lŭ - tàm hơ̆ geh 11 nrang gam bè ờs mờ 5 nrang mờr bè ờs, cèng bơta kwơ is ồn bè jòi gĭt phan kwơ yau, kah yau mờ niam chài. Đờng lŭ Dăk Sơn là đờng gòng yau ngan, cơng tàng ai rài kis niam chài nùs nhơm li la uă ngan bơh làng bol tàm ù tiah do dê tàm rài yŭt rài yau, đơs nền tiah tờm ù tiah niam chài bơh ù tiah Tây nguyên dê.

Đơs tàm dơ̆ bơyai lơh, ala mat Mpồl Jòi sền phan yau Việt Nam, Phó Cau pơgru dờng- Tiến sìh Bùi Văn Liêm, Phó Củ tịc Mpồl jòi sền phan yau Việt Nam, Kwang bàng Mpồl duh broă phan lời wơl niam chài Dà lơgar đơs nền, Lâm Đồng là tiah geh gơnoar broă is ồn kwơ màng, tơrgùm ală brê bơnơm geh is li la ờ hoan geh ngan, mơkung geh ală rài kah yau- niam chài jŏ rài mờ uă phan lời wơl jòi sền phan yau, ù tiah hàng niam, tiah mpồl bơtiàn ơm kis bơh uă jơi bơtiàn cau dê.