Plai nhồng geh tiah hòi là plai lềng dùl bơta phan tam geh tam uă tàm suơn hìu mờ tàm mìr bơh cau Tây Nguyên dê. Ală phan bơna bơh plai nhồng ro ờ mìng là phan ngui tàm rài kis pah ngai lơm mờ gam gơ jat bal mờ rài kis phan bơna, nùs nhơm bơh ală jơi bơtiàn đơs bal, bơh làng bol kòn cau Rơđê dê đơs is. Kềng gah bơnhă ồs ờs mờng, mò H’Luôn Arul (sùm hòi là mò Y Khương dê), ơm tàm ƀòn Jung, sàh Ea Ktur, càr Dăk Lăk, pà gĭt, nàng geh dùl nơm plai nhồng ro niam mờ wil tơl ngan pal roh bàr pe nhai: “Lài do, plai nhồng geh tam uă tàm suơn hìu, tàm mìr. Plai bơnung den ngui nàng gơm biăp, ală plai neh kràñ den tă jơh gar tàm plai nhồng den hơ̆ sồng cèng trăm tàm bŏ halà yồng tềng bơnhă ồs dùl tŭ tơngai nàng plai nhồng in ro ngan. Lơh bè hơ̆ plai nhồng geh dà bơrkuh jù halà dà jù bơnga, kơmhò kră wền, kơ̆, ờ gơtìp mòt cuh, ờ gơtìp gơmŭt dà”.

Plai nhồng ro geh uă bơta kwơ ngui tàm rài kis pah ngai bơh kòn cau Rơđê dê, Plai nhồng geh ngui nàng ơn dà, ơn gar sơntìl tŭ lòt tàm mìr, lơh phan hồl mbar... Plai nhồng ro kung geh ngui nàng mòn lơh ală đờng gòng kòn cau ờs mờng bè đing nam, đờng goong... Bơta pơgồp bal bơh plai nhồng ro mờ ală phan ngui barah barài bè gle, đơr, nsồp lơwe neh lơh geh ală bơta đờng gòng geh săp ntas hô hơng, niam ngan mờ iang tàm trồm tồr.

Bơdìh mờ ală bơta kwơ geh ngui pah ngai, plai nhồng gam ngui tàm ală dơ̆ lơh chờ bơh yau, ală bơhiàn lơh Yàng kwơ màng bơh làng bol kòn cau Rơđê bè dơ̆ lơh Yàng duh khoai dà mbòr, dơ̆ lơh Yàng hòi dan mìu, hòi dan kàl tơnhào phan, dơ̆ lơh Yàng hòi dan pràn kơl dang ... Bi Y Tuel Niê (sùm hòi mà bèp Kain dê), ơm tàm ƀòn Alê B, sơnah ƀòn Ea Kao, càr Dăk Lăk, pà gĭt:“Tŭ do bulah rài kis neh geh uă tam gơl, mơya añ chờ hờp ngan tài bơh uă ƀòn lơgar kung gam ơn prap mờ lơh jat ală bơhiàn ờs mờng bơh lài do dê. Mờ tàm ală dơ̆ bơyai lơh, añ gŏ plai nhồng ro là dùl bơnah ờ gơtùi ờ geh kềng gah ală phan ơn pơdơng Yàng in”.

Bulah rài kis tàm ală ƀòn lơgar bơh cau Tây Nguyên tŭ do dê neh geh uă tam gơl, mơya ală bơta kwơ nùs nhơm bơh plai nhồng ro kung gam bè ờs sơl. Uă hìu bơnhă kòn cau Rơđê kung gam sih tam, prap gàr gar sơntìl plai nhồng bơh rơnàng do tus rơnàng ndai bè dùl gar sơntìl kwơ nàng kờñ tơngkah mờ bơto bơtê oh kòn kòn sau in kah bè ồng pàng bơh jơi bơtiàn he dê ơm kis rềp mềr mờ brê bơnơm. Plai nhồng ro gam gơ gơs phan pà lời kir pà năc ală tiah in tŭ tus mờ ù tiah Tây Nguyên bềng tơngai càl, nàng tơngĭt bơta sền dờng màng bơh cau tiah do dê.