Ală săp dròng cing mồng mpong sùm tàm brê bơnơm, ală dar tamya xoang gùt dar gơnru ồs gam hìt tềng đăp ƀlàng hìu rông, dà rơmit crư bơkào chi bơtăng gơcrà gùt dòr bơnơm bal mờ ală pang ồi yau àng gơcrà niam… Jơh ală gam tơrgùm bal, lơh gơs dùl pang rùp niam chài, niam bơnĕ, àng gơcrà ngan.

Festival Cing mồng - Poh Bơkào chi bơtăng - Bơnơm ồs Chư Đang Ya nam 2026 tàm càr Gia Lai geh bơyai lơh bơh ngai 30 nhai 10 tus ngai 08 nhai 11, mờ uă broă lơh niam chài, đơs crih tamya krơi is ngan tàm sơnah ƀòn Pleiku, sàh Biển Hồ mờ ală sàh rềp bal gùt dar tàm càr Gia Lai dê.

Dờp bal broă lơh niam chài krơi is do, Anih duh broă Làng bol sàh Chư A Thai, càr Gia Lai bơyai lơh pơn jăt tơn 3 mang dròng cing mồng, chu gơnru ồs mờ buh phan sa tàm ală thôn Plei Pông, Plei Hek, Glung Mơlan mờ Plei Ơi. Tàm ƀlàng hìu rông thôn Plei Pông, tềng gah ồs gơnru gam hìt, gal làng bol mờ ală cau chài tus bal dròng cing, tamya xoang pơn jờng nùs nhơm tam klăc bal, nùs nhơm kờñ gơboh lơh broă, nùs nhơm kờñ gơboh ƀòn lơgar dà lơgar. Lŏ Đinh Đjơn tàm thôn Plei Pông, sàh Chư A Thai tơlik nùs nhơm: “Ờ mìng is să tờm añ mờ jơh ală làng bol tàm thôn do ndrờm chờ hờp lơm, tài geh tìp măt, tìp bal, yal bơta niam chài cing mồng kòn cau Bơnhàr añ dê”.

Tus bal tàm tơl săp stas dròng cing, tamya xoang lơbơn niam, làng bol mờ cau năc gam geh ñô tơrnờm mờ ală phan sa ờs mờng kòn cau Bơnhàr dê bè: nha bùm blàng, poăc iar buh, piang kòi pa. Ồng Đinh Byo, Kra ƀòn tàm thôn Plei Pông gơlơh nùs nhơm chờ hờp ngan tài rơnàng kơnòm să gam pơn jăt tai prăp gàr bơhiàn niam chài ờs mờng jơi bơtiàn ồng dê. “Añ neh dờng sơnam, mơya kung tus bal dròng cing mờ ală cau tàm mpồl dròng cing thôn dê. Tàm tơngai tus, añ rơ̆p pơn jăt tai bơto, bơto sồr oh kòn, kòn sao dròng cing nàng prăp gàr niam chài ờs mờng kòn cau Bơnhàr dê tàm sàh Chư A Thai”.

Tàm ƀòn Ia Gri, sàh Biển Hồ, nùs nhơm chờ hờp bơh broă lơh chờ sơlơ geh uă ngan tŭ mpồl bơtiàn kòn cau Jrai bơyai lơh chờ mŭt hìu rông pa. Tàm nùs nhơm ngoh rơngăc, tờm gơnơng geh tơn tào, phan pơdơng neh geh rơcang, săp dròng cing mpong bè jơnau chờ gờm, jơnau kơ̆p kờñ lơngăp lơngai, kàl lơh sa hòn gơs niam mờ rài kis hờm ram. Ồng Pyui, Bí thư Chi bộ ƀòn Ia Gri đơs nền, hìu rông pa ờ mìng là broă lơh jăt bè hìu ờs mờng mờ là rùp rài bơh nùs nhơm tam klăc bal, tus bal bơ̆t bơtàu ƀòn lơgar dê. “Bơta kwơ màng bơh broă lơh yàng duh khoai hìu rông do dê là nàng làng bol prăp gàr phan lời wơl bơh jơi bơtiàn dê, dơ̆ bàr là yal broă lơh lòt nhơl mpồl bơtiàn tus mờ cau năc tàm lơgar mờ lơgar bơdìh in. Neh git nđờ nhai ƀòn lơgar glar bòl, tus bal dùl nùs nàng lơh gơs hìu rông do. Làng bol chờ hờp ngan tài do geh Đảng mờ Dà lơgar dong kờl ai ƀòn in, mờ kơ̆p kờñ rơ̆p bơtàu tơnguh rơlao”.

Festival Cing mồng - Poh Bơkào chi bơtăng - Bơnơm ồs Chư Đang Ya nam 2026 tàm càr Gia Lai geh broă tus bal bơh mờr 1 rơbô 500 nă cau chài, cèng tus dơ̆ tìp bal niam chài uă bơta. Săp dròng cing mồng, săp tamya xoang bal mờ săp ntas bơh ală bơta phan uh, phan teh ờs mờng, lơh gơs dùl săp ntas nggồr nggàc krơi is ngan bơh brê bơnơm dờng dê. Bal mờ hơ̆ là broă tơrgùm bal bơh rùp să ồi yau ờs mờng, cau chài trah rùp ờs mờng mờ broă tàñ sơ̆, tàñ phan geh bơh jŏ rài.

Wèt tus broă lơh do, ồng Ngô Đức Mạo, Kwang Lam bồ Anih tờm Niam chài - Yal tơngit mờ Tàp pràn să jan sàh Phú Túc, càr Gia Lai pà git: “Bol añ rơwah ală cau chài git wă uă nàng lơh niam tàm ală gah broă mờ tam pà tơl sàh geh bơta krơi is dê. Bè tàñ ồi yau mờ phan uh, phan teh ờs mờng jơi bơtiàn dê den tàm sàh Ia Dreh, cau chài trah rùp mờ tàñ phan mờ lơh săp ntas cing den tàm ală sàh Ia Rsai, Phú Túc mờ Uar. Bol añ cèng tus ngai chờ dùl broă lơh geh tơl, nàng yal rùp rài mờ bơta niam chài kòn cau Jrai dê”.

Bơh săp dròng cing mpong săp, ală pang ồi yau àng gơcrà, ală rùp trah đơm chi cèng geh uă rùp să niam chài… tơl nơm rùp ndrờm pơgồp bal tàm broă yal wơl jơnau yal bè bơta kis niam chài bơh ală jơi bơtiàn tàm càr Gia Lai dê. Ală bơta kwơ niam chài bơh ală jơi bơtiàn pơn jăt tai geh prăp gàr, pơgồp bal tàm broă lơh gơs rùp să krơi is bơh rài kis brê bơnơm dờng tŭ do dê.