Kah wơl nùs nhơm kờñ gơboh mờ gùng đơs crih jơi bơtiàn dê, bi Đinh Văn Anging yal: Rơlao 10 nam lài, tàm dùl dơ̆ tus bal dròng cing bal mờ mpồl cau chài sàh Tơ Tung dê, bi geh bơtoah ngan geh cau chài Đinh Plơnh, kra ƀòn Đak Pơkao bơto tơl săp dròng. “Bơh dềt, añ neh jăt mò ồng, mè bèp lòt sền ñô sa chờ, ờ hềt kơlôi sơnơng bơta lơi uă. Mìng git geh bơsram uh, teh phan đơs crih là chờ hờp ngan, den tàng añ kờñ jăt pơgru mơ. Jơnau đơs pơn đik kòn cau Bơnhàr, săp dròng cing mồng là bơta niam chài jơi bơtiàn dê, añ pal bơsram nàng prăp gàr bơta niam chài hơ̆”.

Bơh tŭ geh tìp măt hơ̆, dùl tơngai đềt mềr mờ gùng đơs crih ờs mờng mùl màl geh sơn đờm. Tềng đăp mờ broă bơto bơtê, tề lam bơh kra ƀòn Đinh Plơnh dê, bi Đinh Văn Anging rơhời git teh đờng T’rưng, jan sơngơr, dròng cing mồng mờ ală jơnau đơs pơn đik kòn cau Bơnhàr dê. Uă nam tơn lơh jăt jơnau kờñ gơboh, bi Anging neh git rơlao 10 bơta phan uh, teh ờs mờng. Ờ mìng git tàm broă uh, teh phan đơs crih ờs mờng, bi gam geh săp đơs crih ròm, pràn bơh ù tiah brê bơnơm Tây Nguyên dê. Tàm săp đơs crih, săp jan sơngơr, săp dròng cing bơh klao pơnu dê, cau iăt gơlơh bè geh tàm pơn jăt tài kis ƀòn lơgar bal mờ nùs nhơm kờñ gơboh ai bơta niam chài jơi bơtiàn dê.

Bơh ală dơ̆ bơram tàp jơnau đơs crih tàm ƀòn, bi Anging rơhời geh dơ̆ pơgồp bal tàm uă broă lơh niam chài dờng càr Gia Lai dê, bè ală broă lơh đơs crih tamya chờ gờm nam pa, broă yal, tơrbŏ bal broă lơh lòt nhơl mờ broă lơh “Cing mồng lồi poh” geh bơyai lơh pah poh tàm Ƀlàng dờng Đại Đoàn Kết, sơnah ƀòn Pleiku. Rùp rài klao pơnu kòn cau Bơnhàr tàm să soh phan kòn cau, pràn kơl dang mờ broă trao sơngơr, neh lời wơl bơta niam bơnĕ ngan tàm nùs nhơm cau sền dê. “Pah dơ̆ geh lòt uh, teh phan đơs crih ờs mờng, añ pơnyờ să ngan. Añ geh lam ală kơnòm dềt tàm ƀòn lòt dròng cing mồng tàm broă lơh wă rò Rùp kah kơlôi Wa Hồ, dròng cing mồng lồi poh tàm kơnhoàl Kbang lài do. Gơlơh bè jơh nùs nhơm gơboh kờñ ndrờm tus mờ săp jan sơngơr, săp dròng cing dê”.

Gơwèt mờ bi Đinh Văn Anging, nùs nhơm chờ hờp ờ mìng ơm wơl tàm ală dơ̆ jờng rơ tàp tê bơh ală dơ̆ geh lơh dê. Bơta mờ bi kơlôi rơcang rơlao là lơh bè lơi nàng săp jan sơngơr, jơnau đơs pơn đik jơi bơtiàn bi dê pơn jăt tai mpong săp tàm rài kis tŭ do mờ geh bal tơnơ̆ do. Tài bè hơ̆, bơdìh mờ tơngai tus bal ală broă lơh jan sơngơr, dròng cing, bi gam ai uă ngan nùs nhơm nàng bơto bơtê kơnòm dềt tàm ƀòn in jơnau đơs pơn đik, dròng cing mồng, jan sơngơr, teh đờng T’rưng mờ ală phan uh, phan teh ờs mờng ndai. “Añ bơto ală kơnòm dềt in nàng git đơs jơnau pơn đik mờ dròng cing, tài uă cau đơs là, rơnàng kơnòm să tŭ do mìng kờñ iăt jơnau đơs crih pa, điện thoại ngăc ngar, lơh bè lơi nàng kờñ iăt săp dròng cing ha là jơnau đơs pơn đik bơh mò ồng dê lời wơl. Mơya añ gŏ mpồl kơnòm dềt tàm ƀòn ờ di là ờ kờñ, mìng là bol khi ờ hềt geh cau bơto nàng wă nền nòn bè bơta kwơ bơh cing mồng mờ jơnau đơs pơn đik dê”.

Sền cau bơsram dềt lài do tŭ do neh dờng pràn, gơs cau tờm tàm broă prăp gàr bơta niam chài ƀòn lơgar dê, cau chài Đinh Plơnh, kra ƀòn Đak Pơkao, sàh Tơ Tung, càr Gia Lai chờ hờp mờ pơnyờ să ngan. Gơwèt mờ ồng là cau neh ai uă nam bơto bơta niam chài jơi bơtiàn dê, broă dờng pràn mờ git wă bơh bi Đinh Văn Anging dê ờ mìng là cồng nha bơh dùl nă cau bơsram, mờ gam là nùs nhơm kơ̆p kờñ bè broă pơn jăt tai gàr bơta niam chài đah ală rơnàng dê. “Añ ưn ngài ală oh kòn, kòn sao tàm ƀòn neh lơh ngan bơsram đơs jơnau pơn đik, bơsram dròng cing nàng bơta niam chài kòn cau Bơnhàr dê ờ gơtìp roh. Mờ Anging là cau ờ mìng git prăp gàr bơta niam chài să tờm in, mờ gam git cèng bơta niam chài nàng bơto cau ndai in, nàng cau sền gŏ niam mờ lơh jăt. Ală jơnau đơs pơn đik ha là ală săp dròng cing pal geh nùs nhơm kờñ gơboh, khai neh bơsram tơl mờ geh bơto wơl tai cau ndai in. Geh bè hơ̆, den bơhiàn niam chài ờs mờng kòn cau Bơnhàr dê rơ̆p ờ gơtìp roh”.

Bơh nùs nhơm gơboh kờñ mờ geh tus bal lơh sùm tàm ală dơ̆ lơh chờ ƀòn lơgar dê, bơh tàm broă bơto bơtê jơh nùs bơh cau chài lài do dê, bi Đinh Văn Anging tŭ do gam pơn jăt tai broă prăp gàr mờ bơto bơta niam chài kòn cau Bơnhàr dê. Bi wă là, phan lời wơl mìng mùl màl kis tŭ geh mpồl bơtiàn git sền gàr, lơh mờ pơn jăt tai prăp gàr. Mờ tơl nă kơnòm dềt git đơs dùl jơnau đơs pơn đik, git dròng dùl jơnau dròng cing là geh tai dùl nă cau prăp gàr bơta niam chài jơi bơtiàn dê.