Tàm dơ̆ ràng tơlik Săp ntas cing mồng hòi kàl kòi dum, săp ntas dròng cing bơh ală cau chài sàh Ia Sao dê bơrlŭ bal mờ săp đơs bơh cau chài jak Cao Minh, lơh tơngŏ wơl nùs nhơm ñô lir bông pa bơh kòn cau Jrai dê. Bơh bơta chờ kàl tơnhào phan, broă lơh lam cau tus sền tus mờ dà mbòr bơh ƀòn lơgar dê bơh dơ̆ ràng tơlik Rò dà rê tàm ƀòn bơh ală cau chài ƀòn Mrông Yố, sàh Ia Phí. Ală dơ̆ ràng tơlik lơh tơngŏ wơl ù tiah niam chài cing mồng mờ pà gŏ săp ntas cing đềt mềr tàm jơh ală broă lơh mờ gàr gơnoar ờ gơtùi tàm ala tàm rài kis mpồl bơtiàn Tây Nguyên dê.

 Kung tàm mang chờ sơl, Bòr cing Kơ Đơ geh rò guh tàm mpràp tàm dơ̆ jờng rơ Phan kwơ dà lơgar. Bòr cing geh 8 nơm, gơwèt bơta cing kòn cau Jrai dê ờs ngui tàm dơ̆ tam bau, dơ̆ chờ mut ơm hìu pa halà dơ̆ lơh Yàng hòi dan geh pràn kơl dang să jan. Lài mờ tŭ geh Hìu ơn prap phan kwơ yau Pleiku jòi tơrgùm tàm nam 1997, bòr cing neh geh dùl hìu bơnhă tàm ƀòn Broái, sàh Ia Tul, sền gàr bơh uă rơnàng. Ngai 3/2/2026, Thủ tướng Chính phủ dờp Bòr cing Kơ Đơ là Phan kwơ Dà lơgar.

 Đơs tàm mang chờ, ồng Phạm Anh Tuấn, Phó Bí thư Tỉñ ủy càr, Chủ tịch Anih duh broă Làng bol càr Gia Lai, đơs sùm bơta kwơ màng bơh broă tàm pơr dờn ală jơnau cing yal ai rơnàng kơnòm să in mờ lơh geh tai broă lơh ai ală mpồl bơtiàn gam sền gàr phan lời wơl dê.

“Cồng nha bơh broă lơh prap gàr, ờ mìng geh đo was mờ ală ngai chờ dờng lơm mờ gam mờ broă lơh tơnơ̆ dơ̆ lơh chờ geh kàr lơi jơnau cing yau geh prap lời wơl, nđờ nă cau chài geh cau tàm pơrdờn mờ nđờ nă cau kơnòm să pơn yờ să tàm pơrdờn niam chài bơh bèp ồng dê. Gia Lai kơ̆p kờñ niam chài gơ gơs bơta pràn tàm dơlam is ai bơtàu tơnguh kơnhăp kơ̆, nàng lòt nhơl niam chài, lòt nhơl mpồl bơtiàn tơnguh uă broă lơh ai mpồl bơtiàn in, nàng niam chài geh sền dờng màng rlau mờ ngan là mpồl bơtiàn sền gàr phan lời wơl geh dờp lèng bơh ngan là bơh ală phan lời wơl hơ̆”.