Ồng Rơ Ô Bhung yal là, gùng đơs pơnđik kòn cau Jrai dê niam ngan mờ ờ gơtùi ờ geh tàm rài kis ƀòn lơgar, ngan là tàm dơ̆ lơh chờ. Cau chài ồng Rơ Ô Bhung git đơs pơnđik bơh tŭ pa tàu dờng. Bal mờ hơ̆, ồng gam jòi git bè bơta chài nhơl đờng goong bơh ală wa tàm ƀòn. Ồng gam chài ngan ală jơnau dròng cing yau bơh cau Jrai dê. Pah tŭ tàm ƀòn bơyai lơh chờ halà lơh yàng den ờ tŭ lơi ờ geh dùl nă cau geh uă bơta chài bè ồng.

Tềng đap bơta tam gơl bơh mpồl bơtiàn pa dê, cau chài ồng Rơ Ô Bhung yal, mìng geh bơsram den cau kơnòm să hơ̆ sồng gơtùi git niam chài kòn cau he dê. Tŭ geh jơnau git wă bơsram sră, cau kơnòm să rơp ki ngàm rlau bơta niam kòn cau he dê. Bè hơ̆ den tàng tàm ală dơ̆ geh wil tơl cau tàm ƀòn, ồng Rơ Ô Bhung rơp nting tơngkah kòn sau pal lơh ngan bơsram sră tus gùng tus dà: “Cau Jrai bol hi sùm nting tơngkah kòn sau tryăng tryồng bơsram sră tus gùng tus dà, tơngkah kòn sau bañ gơ jă gơ jal jòi bau, bulah tŭ do rài kis kal ke, mè bèp bòl glar den kung gam pơn đơl pràn nàng kơlôi rơcang ai kòn in lòt bơsram gơs cau geh kuơ nàng tơnơ̆ do gơtùi kơlôi rơcang rài kis să tờm he dê mờ dong kờl mè bèp”.

Jat cau chài ồng Rơ Ô Bhung đơs, dùl broă kuơmàng mờ jal mhar ngan rlau jơh tŭ do gơ wèt mờ ồng là bơto ală sau git sền, git cih dà kòn cau Jrai. Tŭ ală sau dềt git đơs, git cih den hơ̆ sồng rơp bơto đơs jơnau pơnđik cau Jrai. Ồng sùm lời ală ƀuì mho tàm poh bal mờ ală sau dềt bơsram cih, bơsram đơs, mblàng wơl bơta kờñ gơboh đơs pơnđik ală sau dềt in. Pah tŭ tàm ƀòn geh dơ̆ lơh chờ, sền ală sau dềt gơ rờm bal tàm gùng đơs pơnđik rơlĕ rơlùn, sền cau dròng cing mờ kờñ tamya xoang gơ lơh ngoh rơngac ngan. Hơ̆ kung là dùl bơta pơn jờng nàng ồng pơn jat tai mờ bơta kờñ gơboh bơto dròng cing, jañ mồng, đơs pơnđik, bơto dà kòn cau Jrai ai ƀòn lơgar in. Ồng Rơ Ô Bhung pà git: “Să tờm añ kung sùm bơto dà kòn cau jrai ală sau in tàm ƀùi mho, mờ pơn jat hơ̆ bơto ală sau in đơs ală jơnau pơnđik kòn cau he dê nàng lơh gơs bơta kờñ gơboh, rơngòt tơnơ̆ do roh hŭi tĕ, tài bol hi ngai sơlơ kra, dùl bơnah kung nàng ală sau geh tŭ niam tìp mat niam chài bè tus bal ală ngai chờ cing mồng, đơs pơnđik nàng jờng rơ Đảng, dà lơgar, bè jơnau wa Hồ hòi jà jơh gùt làng bol sền gàr dà lơgar, hòi jà làng bol lơh broă sa, dong kờl kac màng, sơlơ tơrbŏ kơ̆ bơta tam klac bal tàm ală ƀòn”.

Cau chài ồng Rơ Ô Bhung yal, rài yau tàm ƀòn uă hìu geh cing, drăp tơrnờm, tŭ do mìng gam êt ngan cau gam prap wơl mờ kung gam êt ngan cau git dròng cing. Rài kis tam gơl pa mờ ală gùng đơs crih krơi is lơh broă bơto đơs pơđik kung kal ke rlau sơl. Moat jrùm rlau, rơnàng kơnòm să cau Jrai tàm uă tiah ờ gam git sền, git đơs dà kòn cau tai. Tài bè hơ̆ den tàng pah tŭ geh dùl nă oh dềt kờñ bơsram dà kòn cau Jrai, kờñ tàp dròng cing, hơ̆ là bơta chờ hờp dờng ngan gơ wèt mờ ală cau chài bè ồng: “Geh dùl bơta moat jrùm ngan là rài kòn sau tŭ do ờ gam geh uă cau git sền, git cih dà kòn cau Jrai tai, mơya geh bơta sền gròi bơh gơnoar atbồ tàm ƀòn lơgar dê den tŭ do làng bol neh git sền gàr bơta niam chài bơh yau bơh dròng cing, đơs pơnđik mờ ală jơnau yal yau den tàng añ kung chờ hờp ngan tài làng bol jơh nùs lơh jat”.

Bulah neh dờng sơnam, mơya cau chài ồng Rơ Ô Bhung ơm tàm ƀòn Mlăh, xã Phú Cần, kơnhoàl Krông Pa, càr Gia Lai kung gam jơh nùs ngan mờ broă bơto niam chài cing mồng ai cau kơnòm să in. Ồng geh sền là sơm pòl ồs nùs nhơm ai ală broă lơh tìp mat niam chài, cing mồng tàm ƀòn lơgar. Rlau mờ hơ̆ tai, ồng Rơ Ô Bhung kung là cau bơto dà đơs, akhar cih ai cau Jrai tàm ƀòn lơgar in.