Do là ròt ală broă lơh niam chài geh lơh bơh ngai 9 tus ngai 18/4 (hơ̆ là bơh ngai 01 tus ngai 10 nhai 3 nam lơgar he dê) mờ uă ngan broă lơh. Tàm hơ̆, bơnah lơh duh khoai geh: Dơ̆ duh kah Bơtau sơn rờp dà lơgar Lạc Long Quân mờ Chu ñàng kah kơlôi Mè sơn rờp dà lơgar Âu Cơ, Dơ̆ chu ñàng Duh kah Bơtau sơn rờp dà lơgar; Dơ̆ chu ñàng kah kơlôi ală Bơtau Hùng bơh ală tiah tàm càr dê. Bơdìh hơ̆ tai, Poh Niam chài – Lòt nhơl ù tiah Bơtau sơn rờp dà lơgar gam geh uă broă lơh ndai bè: Ràng tơlik phan lời kir, phan lời wơl sră nggal, sră ƀău, sră nggal rùp tàm Hìu prap mờ sền sră càr Phú Thọ, Ƀảo tàng Bơtau Hùng; Broă lơh đơs crih tàm gùng “Việt Trì Livemusic”, Lơh sàl niam chài mờ ràng tơlik phan tiơng pơn rơ.

Mpồl ală broă lơh di tàm ngai Duh khoai bơtau Hùng mờ Poh Niam chài-lòt nhơl Ù tiah mò ồng lài do nam Giáp Thìn 2024 kờñ jờng rơ bơhiàn kờñ gơboh dà lơgar, lam lơh jơnau niam “Hùc dà kah tô dà” mờ bơta pràn tam klăc dờng jơi bơtiàn wèt tus rài lài do, ưn ngài broă lơh dờng màng bơh mò ồng rài lài dê; mờ prăp gàr ngui bơta kwơ phan lời wơl niam chài pơgồp bal mờ bơtàu tơnguh lòt nhơl tàm ù tiah Mò ồng lài do. Duh khoai bơtau Hùng-Lơh chờ Duh khoai Bơtau Hùng nam 2024 geh uă mpồl ală kwang đơng lam Đảng, Dà lơgar, cau năc bơh ală tiah, làng bol gùt lơgar tus tàm Hìu duh khoai Bơtau Hùng. Ală ngai do, càr Phú Thọ neh wă git nđờ jơ̆t rơbô nă cau năc bơh ală tiah tus sền lơh chờ tàm Hìu duh khoai Bơtau Hùng. Jăt mpồl atbồ Tiah tềl kah yau Hìu duh khoai Bơtau Hùng yal, khà cau năc bơh tàm ală tiah tàm gùt lơgar mờ làng bol lơgar Việt Nam kis tàm lơgar bơdìh neh rê tus tàm Hìu duh khoai Bơtau Hùng gơguh ni sơna.