Nam do, ngai chờ geh bơyai lơh gơ jăt bal mờ Ngai Niam chài Việt Nam 24/11 mờ ală broă lơh Tơngleh Niam chài – Tam klăc dờng. Bơdìh bơnah pơrjum, ală tiah làng bol ơm kis geh hòi jà bơyai lơh uă broă lơh niam chài, đơs crih tam ya, tàp pràn să jañ, jơnau nhơl bơh yau mờ is ồn là “Dơ̆ sàu piang Tam klăc dờng”, lơh geh nùs nhơm chờ hờp, rềp mềl, nàng làng bol in tam tìp bal, tam pà bal mờ lơh tam klăc đềt mềr rlau tai nùs nhơm cau dùl ƀòn bal. Lài hơ̆, nam lài, càr Khánh Hoà dong kờl tơl tiah làng bol ơm kis 5 tơlak đong bơyai lơh ngai chờ.

Nam do, khà dong kờl geh tơnguh tus bàr dơ̆, lơh geh tai bơta nàng ală ƀòn lơgar in bơyai lơh ală broă lơh li la, geh kwơ ngan ngồn, gơhòi gơ jà gal ngan làng bol tus bal. Bơh ngai chờ, ală cồng nha bơ̆t bơtàu rài kis niam chài, bơtàu tơngguh lơh sa, sền gròi lơngăp lơngai rài kis mpồl bơtiàn mờ ală srơh tàm pơrlòng tàm tiah làng bol ơm kis geh sền wơl, jờng rơ. Do kung là tŭ nàng kâp ủy, gơnoar ătbồ tam tìp, iăt kơno jơnau kơlôi sơnơng, bơta kơ̆p kờñ bơh làng bol dê, lơh kơ̆ kơl jăp bơta pin dờn mờ bơta tam klăc đềt mềr đah Đảng, gơnoar ătbồ bal mờ làng bol, ngui niam bơta pràn tam klăc dờng bơh kâp hơđơm tơn.