VOV4.M’nông: Tâm xã Ea Sôr, nkuăl Ea Kar, n’gor Dak Lak, du ntŭk choih sŏk tih dôih hao tât âk rbăn mét khối geh rgum bah du rmôt kan sŏk êng choih ndâk nkra êng, ƀư êng, êp trong Quốc lộ 29. Ntŭk choih aơ lah ntŭk rgum nsum đah 3 n’gor Phú Yên, Gia Lai ndrel Dak Lak, păng geh rlau 2 năm ma aơ, bol ma nau nkah lah bah ƀon lan ndrel mbơh tât ăp gưl n’gâng kan.

Du nar dŭt khay 4, phung hên hăn tât ntŭk sŏk choih tih dôih tâm Ƀon Ea Puk, xã Ea Sôr, nkuăl Ea Kar, n’gor Dak Lak. Ta aơ, du ntŭk rgum choih têh, đah âk rbăn mét khối choih geh rgum êp trong Quốc lộ 29. Êp tâm ntŭk choih, tơm nŭih ƀư nau kan tăch rgâl hŏ ndâk nkre du ngih gay ma rđau nau kan tăch rgâl choih, nŭih ƀư nau kan geh bơi tât jêt nŭih. Wa Hờ A Sủng, Kruanh ƀon Ea Puk mbơh, ntŭk choih aơ geh njêng ntơm năm 2019 ndrel ntơm rnôk geh ntŭk choih saơ, hŏ ƀư mô ueh tâm ƀon lan. Đah âk ndeh têh, ndeh thùng vay luh lăp gay ma rdeng choih lăp ƀư djơh ngăn trong hăn luh mir, trong hăn ăp nar ndrle trong Quốc lộ 29, âk trong geh djơh khuch ngăn, nau khuch ri mro tât, ƀư konh wa geh nau klach rvê ngăn ndrel ji nuih đŏng:

  ‘Kônh wa hŏ geh nau đă mpeh âk nau kan geh tât nau rgum choih. Ndeh jâk rdeng choih hăn ri âk ngăn, ndrel nklăp 15-20 bôk vay rdeng choih luh lăp. Tâm rnôk nchuăn hăn ri ƀư djơh trong âk ngăn, ndrel ma nau rêh bah ƀon lan hên ta aơ geh nau mô ueh ngăn. Kônh wa geh âk tŏ mbơh nau hôm, geh nau mbơh tât xã, xã đă ri ân geh nau mbơh tât nkuăl đŏng, jêh ri kâp nkuăl bu tât kơl an rklaih ri kônh wa mô hŏ saơ gĭt”.

Ntŭk choih aơ hôm mro tâm 2 năm

Wa Hoàng Anh Dũng, Groi Kruanh UBND xã Ea Sôr, nkuăl Ea Kar, mbơh, nkuăl rgum choih tih dôih tâm ƀon Ea Puk tâm neh 102, tờ bản đô mrô 05 đah rnoh bơi tât 13 rbăn mết vuông. Rnoh neh aơ yor wa Phan Đình Thái An, deh năm 1979, gŭ ta Phường Thành Nhất, nkuăl ƀon têh Buôn Ma Thuột ƀư tơm. Wa Hoàng Anh Dũng lah rjăp, dĭng lĕ neh ân choih rnôk aơ lah neh tuch tăm. Xã uănh năl aơ lah nau kan tih mpeh nau ân dŏng neh. Tâm khay 3/2020, xã Ea Sôr hŏ ndâk rmôt hăn mêt uănh ndrel năl geh 10 rbăn mét khối choih geh rgum tih dôih ta aơ. Xã đă nkuăl lăp leo nau rklaih kơl:

  ‘Mpeh nau kan mât ngih dak ri rlet nau dơi bah xã. Xã kŏ geh nau ntrŭnh đă hôm, ân geh n’gâng kan ba lơ rđau, lăp kan ƀư ân ngăn ri mơ dơi dăp mpăn”.

Âk ndeh têh rdêng choih luh lăp ƀa ƀơ ƀư kônh wa ƀon Ea Puk ji nuih

Geh tât ntŭk ân choih ma rbăn mét khối tih dôih dôl ma geh rgum êng, êp trong Quốc lộ 29, wa Nguyễn Ngọc Duẩn, Kruanh jrâu kan Tài nguyên ndrel Môi trường nkuăl Ea Kar, mbơh, nkuăl dôl ma ndâk rmôt kan geh tât ăp ntŭk kan tài nguyên, công an, thuế gay ma mêt uănh ntŭk aơ. Bôk năp kơp năl, ntŭk kan aơ hĭ dŏng mô tâm di nau ntrŭnh mpeh neh gŭ. Đah tu tơm bah choih, bah nau mbơh bah ntŭk kan ƀư tăch rgâl lah dơi sŏk ndrel mô dơi ntrơn leo tă bah 2 n’gor Phú Yên ndrel Gia Lai leo tât. Rmôt kan knŭng uănh săm ƀŭt mbơh mpeh rnoh soay, ê geh năl kloh tu tơm bah choih nê geh tâm di pháp luật đŏng lah mô. Mpeh nkô̆ nau mhâm ƀư choih dŭt âk, ƀư tih dôih gưl xã hŏ mbơh yơn lŏ hôm geh ân kan tâm ntơm năm 2019 tât rnôk aơ, wa Duẩn ân lah, kan rklaih mhal ăp nau tih hôm geh nau jêr yor rmôt kan mo tŏng nŭih. Mpeh nau mĭn ân geh mhal nau tih, wa Duẩn mbơh, kuăl Ea Kar nsôih rklaih ndrel đă rmôt kan tăch rgâl gay ân ntrơn, ndâk tay neh ntu:

  ‘Nau ngăn nê lah, ta aơ dŏng neh ma mô tâm di nau nkô̆ mbơh. Jêh rnôk mhal prăk rio nchâp đă ân geh ndâk tay neh ntu kơt bôk năp. Kơt lah rnoh 3 rbăn khối ri tâm 30 nar ân geh rklaih lơi”.

Du ntŭk rgum neh choih tih dôih hao tât ma rbăn mét khối, êp ntŭk trong Quốc lộ 29, ndeh klư hăn ro dŭt âk, âk nŭih saơ, âk nŭih rgop nau mbơh đă, dun lơi, yơn rlau 2 năm hôm ê dơi geh rklaih ơm. Nau aơ ân saơ, nau kan mât neh ntu, tăch rgâl choih neh lah nau kan bah nkuăl ê geh kloh. Nau geh tât kan ntŭng choih geh tăch dŏng lah nau geh âk ngăn./.

                        Nŭih rblang: H’Thi