VOV4.M’nông - Khay 4 mhe rlău Uỷ ban MTTQ Việt Nam n’gor Kon Tum lĕ rgŏ jă gay rgâl nău mĭn, trong kan bah ƀon lan rnoi mpôl đêt, ƀư an ƀon lan rnoi mpôl đêt hao rklaih ach o nâp nâl. Râng ƀư rgŏ jă geh kruanh n’gor; ntoh măt ăp n’gâng kan nău kan n’hanh 10 nkuăl, nkual ƀon têh bah n’gor n’hanh rlău 100 nuĭh ntoh lư lah nuĭh rnoi mpôl đêt.

         N’gor Kon Tum geh rlău 53% rnoh nuĭh rnoi mpôl đêt nău rêh hôm e âk jêr jŏt. Nkô̆ nău dơi năl yor nău nti nsơm đêt; hôm e nău mĭn kâp knơm, tâm nău kơl, ntop kơl bah ngih dak; mô gĭt trong kơt dŏng khoa học kỹ thuật tâm tuch tăm... Aƀaơ n’gor hôm e rlău 13.600 rnăk ach o lah nuĭh rnoi mpôl đêt geh bơi 94% rnăk ach o n’hanh rlău 7.500 rnăch êp ach o geh rlău 90% nkôp đah dĭng lĕ rnăk êp ach o lam n’gor.

         Gay rgâl nău mĭn trong kan bah ƀon lan rnoi mpôl đêt, ƀư an ƀon lan rnoi mpôl đêt hao rklaih ach nâp nâl, Ủy ban MTTQ Việt Nam n’gor Kon Tum mĭn 5 nău kan khlay, yor nê: Nkoch trêng, mbơh ăp nău ntrŭnh, nău kơl ngăn lah nkual neh ntu, n’hŭch ach o nâp nâl ndâk njêng thôn ƀon mhe tât ƀon lan rnoi mpôl đêt; mbơh ăp ntrong kan uĕh, trong ƀư săk rnglăy; ntĭm ƀon lan rnoi đêt ach o n’hanh êp ach o dŏng geh săk rnglăy ndơ bah rnăk wâl, prăk manh gay hun hao wăng sa; Ntĭm ƀon lan rgâl ăp ntil tơm tăm, mpa rong; rgŏ jă ƀon lan rnoi mpôl đêt râng ăp hợp tác xã tăm tơm dak si, hun hao lŏ mir kloh uĕh, kơt dŏng khoa học công nghệ mhe, nsrôih râng tăm bri, mât njrăng n’hanh uănh mât bri.

Ntrong kan tăm tơm dak si tâm bri nkual rnoi mpôl đêt ta nkuăl Kon Plông kơl nuĭh ƀon lan n’hao nău geh

         Ntoh ngơi ta nar ƀư, wa Nguyễn Văn Hòa-Groi Bí thư N’gor ủy, Kruanh HĐND n’gor Kon Tum đă: Ăp gưl, ăp nău kan, MTTQ Việt Nam ăp gưl tâm n’gor an geh âk nău ƀư n’hanh nău kan na nê̆, ngăn ngên gay mât uănh nău rêh drăp ndơ n’hanh nuih n’hâm an nuĭh ƀon lan; tâm pă, ntop kơl nuĭh ƀon lan mâp jêr jŏt tâm nău rêh, lơn lah ƀon lan rnoi mpôl đêt, nkual jru ngai ... Ƀư uĕh trong kan nkoch trêng, rgŏ jă, nâp nâl n’hanh pơk hvi tâm rnglăp lam rnoi mpôl. Nkoch trêng rgŏ jă ƀon lan ăp rnoi mpôl đêt ntơm rgâl nău mĭn, trong ƀư, ntlơi ăp nău rluk mâl way ơm, gĭt ƀư pah kan jan sa, ƀư an ăp rnăk rnoi mpôl đêt ach o n’hanh êp ach o hao rklaih ach o nâp nâl. Wa Nguyễn Văn Hòa an lah, aơ lah rơh rgŏ jă têh bah n’gor, gay đăp mpăn săk rnglăy ngăn ngên mât uĕh nuih n’hâm ntrong leo bah cán bộ, đảng viên n’hanh dơi mĭn nkô̆ nău tĭng gưl nău kan na nê̆:

         “Rnôk he an nkô̆ nău ƀư rgâl nău mĭn n’hanh trong ƀư bah ƀon lan rnoi mpôl đêt ntơm bah ăp nuĭh geh nsing nơm tâm ƀon lan nơm. Jêh nĕ ăp đồng chí cán bộ đảng viên lah nuĭh rnoi mpôl đêt hăn lor, an ntrong leo lor. Ăp trong chính trị he lăp mĭn na nê̆ ăp nău mĭn, trong ƀư ma ƀon lan rnoi mpôl đêt an rgâl mô lah nti gay hao rklaih ach o nâp nâl ƀư sâm geh tâm di an săk nơm, rnăk wâl n’hanh nău rêh jêng kon nuĭh”.

Ký ton tâm rlong ƀư tĭng rơh rgŏ jă “Ƀư rgâl nău mĭn, trong ƀư bah ƀon lan rnoi mpôl đêt, ƀư an ƀon lan rnoi mpôl đêt hao rklaih ach o nâp”

         Nău rgŏ jă n’gluh an nău rƀŏng tât năm 2025 geh bah 70% let lơ rnăk ƀon lan rnoi mpôl đêt ach o, êp ach o rgâl nău mĭn, ntlơi ăp nău rlŭk mâl way ơm, mô kâp knơm tâm ngih dak, hao êng rklaih ach o nâp nâl; geh bah 40% rnoh rnăk gĭt kơt dŏng khoa học kỹ thuật tâm tuch tăm; rlău 25% rnoh rnăk geh nău rêh drăp ndơ, nuih n’hâm dơi rgâl; rnoh rnăk ach o, êp ach o lah n uĭh rnoi mpôl đêt hŭch rĭng bah 3-4% du năm.

         Rgŏ jă ta nar ƀư Kruanh MTTQ Việt Nam n’gor Kon Tum nkoch kloh: đah nău ŭch kơl nuĭh rnoi mpôl đêt ta n’gor geh nău rêh nuih n’hâm, drăp ndơ lơ nar dơi rgâl hao, rgop ƀư dơi Nghị quyết Đại hội Đảng bộ n’gor rơh tal 16, năm kan 2020-2025 lĕ n’gluh an, Ban Thường vụ N’gor ủy lĕ geh n’glôn jêh mrô 8 mpeh nău ntrŭnh mbơh ƀư Rơh rgŏ jă “Ƀư rgâl nău mĭn, trong ƀư bah ƀon lan rnoi mpôl đêt, ƀư an ƀon lan rnoi mpôl đêt hao rklaih ach o nâp nâl” ta lam n’gor. Đah nkô̆ nău nĕ, Ủy ban MTTQ Việt Nam n’gor rgŏ jă n’hanh kuăl đă ăp gưl, ăp nău kan, ăp nsum mpôl chính trị-rêh jêng, ƀon lan rnoi mpôl đêt, ăp chroh rƀŭn tâm n’gor tâm rnglăp, tâm rgop đah MTTQ Việt Nam nkoch trêng, rgŏ jă; mât uĕh n’hâm soan, mĭn ƀư mhe, rgŏ jă ăp nău dơi, nău geh ta ăp nkual râng ƀư tĭng nău rgŏ jă.

         Ta mbơh Rgŏ jă “Ƀư rgâl nău mĭn, trong ƀư bah ƀon lan rnoi mpôl đêt ƀư an ƀon lan rnoi mpôl đêt hao rklaih ach o nâp nâl”, Ủy ban MTTQ Việt Nam n’gor Kon Tum lĕ ƀư bôk nău rgop mbơh ƀư Rgŏ jă, lvang 2021-2025 đah UBND n’gor n’hanh ký ton tâm rlong ƀư tĭng Rơh rgŏ jă đah Ủy ban MTTQ Việt Nam 10 nkuăl, nkual ƀon têh.

Nuĭh răk rblang: Y Sưng Phê Ja