Wa Điểu Út - nuĭh rnoi S’Tiêng, ta ấp Mười Mẫu xã nkual n'har bri Phước Thiện, nkuâl Bù Đốp nkoch, rnăk păng ntrơn sĭt gŭ rêh ta ấp Mười Mẫu bơi jât năm hôm, dơi ngih dak pă an neh gŭ, kơl ƀư jay, hŏ dŭt rhơn mƀak. Năm 2017, rnăk păng n'hanh kônh wa tâm ấp dja geh dơi nău rhơn mƀak dŭt têh, điện neh dak hŏ têk sĭt tât ấp, nău ma kônh wa wơl geh dŭt jŏ bah ri aơ hŏ jêng geh ngăn ngăn.

Tiểu khu 67 mpeh ấp Mười Mẫu, xã Phước Thiện, nkuâl Bù Đốp geh 200 rnăk ƀon lan đah hang rhiăng nuĭh, 95% rnoh nuĭh lah ƀon lan rnoi mpôl đê̆, tâm nê lơn âk lah nuĭh S’tiêng. Ntơm nơh, nkual dja dơi uănh lah ntŭk âk rnăk ach o bah nkuâl yor nău gĭt blău đêt, ntung trong ndơ dŏng rbăn lhơ, sop nkăp tâng jru ngai, rnoh âk rnăk geh jay nâp uĕh n'hanh điện dŏng mô jêng kơp dah lău ti, kon se mô dơi hăn tât nhih nti, wăr năm "ji ngot ach o" mƀui tĭng kônh wa. Kơp ntơm bah rnôk geh điện, nău rêh bah kônh wa hŏ rgâl dŭt âk. Kônh wa hŏ rgâl máy n'gôr ma bơm điện, kơl dơh ntơ, hŭch đêt roh huach prăk dŏng an tŏ djrah. Bah meng nê, oh kon rnoi mpôl đê̆ geh ŭnh điện mpoh ang dŏng an trong kơt nti uĕh lơn. Mô dơn geh điện mpoh ang, âk rnăk hôm rvăt năp tay tivi, tủ lạnh, quạt máy, glah piăng điện...nơm geh kơt nê̆, săk  geh nău rêh bah ƀon lan dơi n'hao kloh. Nô Điểu Thâm, du hê nuĭh ƀon lan tiểu khu 67 an gĭt, kônh wa gŭ rêh ta aơ geh âk rnoi nuĭh êng êng, nuĭh S'tiêng, Bu Nong, Mạ n'hanh Khmer. Ntơm bah rnôk geh điện, âk rnăk jăp gơih wăng sa lơn, nău rêh hŏ rgâl ngăch, nô Điểu Thâm rhơn nkoch:  

Ngih dak hŏ ƀư kơt nê̆ hôm, nta joi an nău kan đŏng hôm ri hŏ geh prăk khay mon nthoi tay jay đŏng, năp uĕh tay jay kơt geh tay ti vi tủ lạnh hôm máy pih ndơ ri âk rnăk hŏ geh đŏng. Aƀaơ hŏ hun hao, geh tay drăp ndơ aơ to.

Bah nklang xã Phước Thiện nthoi tât Tiểu khu 67 lah trong prah dak chai lâng uĕh, tĭng ndrôk mpôl, be mpôl grâm grâm klêp pih ta ăp n'hâm tơm điều, tơm cao su mhe tăm, điện ngih dak hŏ dơi têk lam, ta muh măt nuĭh ƀon lan mpơl dơi nău rhơn bah nău rêh. Nô Điểu Phúc, du hê nuĭh ƀon lan ta tiểu khu 67 nkoch: Ur sai gâp gŭ ta aơ hŏ 11 năm hôm, ntơm nơh ŏ r'ah jêr jŏt ngăn, rnăk geh 4 nuĭh yơn nsrôih ngăn man ma tŏng sa dơm, ta aơ geh 10 rnăk ri 9 rnăk mpeh ach o, rnăk hôm ƀa ƀă dăch kêng ach o.

Ndrĭ yơn, dơi Đảng, Ngih dak mât uănh, têk rse điện sĭt, nuĭh mô geh ndrôk ri dơi kơl an ndrôk, mô geh be, ri kơl an be, mô geh jay ri kơl mon jay, aƀaơ lĕ  dĭng nuĭh rvê wăng sa dơm, kônh wa hơm ndŭl, dŭt nsing nơm tâm Đảng, Ngih dak.

Bu ranh ƀon Điểu C’re, ngoăy tâm ăp nuĭh geh nsing nơm ta ntŭk nkoch bri, dơi pă an neh tuch tăm tĭng bôk nău kan 134 bah năm 2005, tât năm 2017 Tiểu khu 67 dơi ngih dak ntuh kơl ƀư tay trong rse điện, trong hăn, nhih nti, nhih dak si. Ăp năm mhe aơ, nơm geh tâm bôk nău kan ŭch rdâk njêng ƀon lan mhe gưl neh dak n'hanh n'hŭch ach o, kônh wa ta aơ dơi ngih dak kơl ƀư tay jay gŭ n'hanh ndơ dŏng kan tuch tăm mât rong. Đah nău mĭn rôih nsan hao, kônh wa hŏ nănh dŏng rgâl mhe kỹ thuật tuch tăm. Tât aƀaơ, lĕ rngôch ấp Mười Mẫu dơn hôm 5 rnăk ach o dơm, hŭch rlău 90% rđĭl đah ăp nar Tiểu khu 67 lăp dŏng. Ƀon lan ta aơ rhơn  n'hanh nđơr ngăn.

“Ntơm bah “4 mô” (mô: điện, trong, nhih nti, dak dŏng) ta Tiểu khu 67 ntơm nơh, tât aƀaơ hŏ jêng hao "6 geh" (geh: điện, trong, nhih nti, nhih dak si, neh ntu n'hanh dak dŏng). Geh dơi nău rêh dôl nar lơn ma "rgâl săk lhut ntô" nê lah nơm geh nău mât uănh khlay bah Đảng, Ngih dak, bah kruanh, n'gâng kan ta ntŭk n'hanh nău nsrôih nsan hao êng bah nuĭh ƀon lan nơm".