Tĭng nê, tâm rơh 2 "Trong kan 500 nar măng" mpôl kan dơi kan n’gor Lâm Đồng mbra rgum, joi nting tahen ơm khĭt ta 3 xã bah n’gor, lah: Đắk Sắk, Hải Ninh n’hanh Quảng Trực.

Ndrel đah nê gay wat jêh nău kan rgum, joi nting tahen ơm khĭt dŭt đêt 124 nting tahen ơm khĭt rơh 2 bah “Trong kan 500 nar măng”, mpôl kan dơi kan n’gor Lâm Đồng mbra leo hăn joi nting tahen ơm khĭt ta ăp phường mpeh Nkual ƀon têh Phan Thiết, n’gor Bình Thuận ơm. Wa Đinh Văn Tuấn, Groi kruanh UBND n’gor, Kruanh Ban rđău đă rgum, joi nting tahen ơm khĭt n’hanh năl săk tahen ơm khĭt ta n’gor Lâm Đồng, an gĭt, Ban rđău đă hŏ jao nău kan na nê̆ an Bộ Chỉ huy Quân sự n’gor kan nsum đah ăp n’gâng kan, ăp ntŭk geh tât ndăn ra uănh tay, rdâk njêng trong nchrăp rgum, joi nting tahen ơm khĭt đah nuih n’hâm “6 kloh” n’hanh na nê̆; nkre rƀah gĭt nău lư gay rhŏ dŏng an pah kan rgum joi.