Ta nkual pĭt dak lêng n’gor Đăk Lăk lĕ geh mih n’hanh sial têh bâh măng lơ 8/11. Ta năp nău mbơh nchroh mih têh mbra hao ngăch, nuĭh ƀon lan ta ăp nkual rđŭng dêh dăch dak me Ba, dak me Bàn Thạch n’hanh dak me Cái lĕ ƀư lôch ăp nkơng gŭ der dak buk. Jay i geh rĭ ƀư nkơng prêh nâp, rnăk mô geh dŏng tay đar si, ndâk ntŭk i prêh sơh tâm jay. Wa Nguyễn Chánh Hướng, ta xóm Chuà, thôn Ngọc Phước, phường Tuy Hoà an gĭt. "Uănh nsum aƀaơ ăp nuĭh geh ƀư nkơng njrăng rdâng dak buk da dê, klăch ngăn hôm, jay i geh dŭng têh rĭ nkŭm lĕ rngôch, hôm ba rĭ n’hao kalơ nkơng prêh da dê”.

Lôch rơh mih dak buk năm e nơh ƀư geh rhiăng tấn ba khuch mbĕ, năm aơ, ƀon lan uănh khlăy mât ueh ba ntil n’hanh ndơ sông sa. Ba geh tâl tâm âk dŭng nilông, kât an nâp n’hanh n’hao an ntŭk i prêh. Ndeh máy, ndơ điện tử, kho ao, mŭng phôi...lĕ geh kât nâp gay ma bah khuch  lah geh dak buk hao têh ler ta jay. Ta ăp nkual mbra geh dak băm jru, nglah êng, âk rnăk lĕ leo nchrăp ndơ sa dak ngêt tŏng bâh 5 tât 7 nar. Wa Trần Tấn Mạnh lah na nê̆, ta xã Tây Hoà an gĭt. "Nhcrăp bâh dak ngêt tât ăp ntil ndơ ssông sa , mât prăp ta ntŭk prêh sơh gay ma geh ndơ sa tâm rnôk nar mih dak buk”.

Bâh nău nchrăp lor bâh ăp rnăk vâl tât ntrong kan bâh n’gâng kan ta ntŭk, ntrong kan 4 ta ntŭk lĕ geh uănh năl lah nău kan tơm khlăy ngăn. Rnâng kan leo kan njrăng rdâng nău tât n’gor Đăk Lăk đă ăp ntŭk an geh rdâk njêng ăp ntrong kan dăch đah nău geh ta ăp nkual, ăp gưl kan geh nău tât bâh mih sial. Wa Đỗ Hữu Huy Kruanh UBND n’gor Đăk Lăk lah na nê̆ nău dơn kan bâh n’gâng kan ta ntŭk tâm nău leo rdâng đah mih sial "Gâp đă lah 4 nău kan ta ntŭk: leo kan ta ntŭk,  nuĭh kan ta ntŭk, ndơ kan ta ntŭk n’hanh nuĭh kơl ta ntŭk, pă dăp mhâm ƀư an geh ntrong kan tŏng ăp. Kruanh Uỷ ban ăp xã phường lah nuĭh dơn kan lĕ rngôch, an geh sŏng dăng ntĭm đă ta ntŭk geh nău tât. Pă jao nău kan xã ƀư tĭng ta ăp thôn, ăp nkual ƀon têh tơm khlăy”

Trôk nar mih sial ăp nar lơ ma jêr njrăng. Nău nchrăp lor bâh ăp rnăk vâl, ndrel đah ntrong kan tâm rdâng leo kan bâh n’gâng kan ta ntŭk, mbra ntop an bah ir geh nău tât ndal, bah ir geh nău jêr jâk an mpôl vơt kơl n’hanh bah ir geh nău khuch khat rnôk geh mih sial tât.

  CTV Lê Biết/VOV Tây Nguyên