Nkah tay nău tât đah nghệ thuật rnoi mpôl đê̆, nô Đinh Văn Anging nkoch: Rlău 10 năm bah năp, tâm du tơ̆ râng rƀŭn, njroh mprơ ndrel mpôl nghệ nhân ƀon lan xă Tơ Tung, păng lap dơi nghệ nhân Đinh Plơnh, bu ranh ƀon Đak Pơkao, uănh khlay n'hanh dŭt n'hâm. ntĭm nti tĭng nău ƀư, tĭng nău nteh. "Ntơm bah jê̆, gâp lĕ tĭng u che me bơ̆ hăn uănh lễ hội, ê hŏ mĭn rvê âk. Knŭng gĭt dơi nti ndơ uh goh lah rhơn ngăn, jêng nơm dơn nău jă tĭng nai dâl. Nău mprơ Ba Na, nău nteh chĭng lah văn hóa bah rnoi nuĭh, he ân nti gay mât ndray văn hóa nê.

Ntơm bah nău tâm mâp nê, du njăr trong hăn krêp dêh đah nău mprơ way ơm na nê̆ ntơm ƀư. Ta nâm nău ntĭm leo bâh bu ranh ƀon Đinh Plơnh, Đinh Văn Anging lĕ mbrơi mbrơi gĭt đah đơn T'rưng, gâr sơgơ̆r, chĭng gong n'hanh ăp nău mprơ Bahnar. Âk năm jŏ jong. bỉ tĭng nău ŭch rŏng, Anging lĕ blău rlău 10 ntil ndơ uh goh way ơm. Mô dơn geh nău blău tŭr chĭng goh gong, păng hôm nha geh nău mprơ âk nău mhe, geh nău nteh ueh n'gloh lam, dăng janh bah yôk bri Tây Nguyên. Tâm nău mprơ, nău gâr, nău chĭng chĭng bah bu klô ndăm, nŭih djăt kơt lah geh saơ nau rêh bah ƀon lan ndrel nău rŏng an văn hóa rnoi nŭh.

Ntơm bah ăp rơh tâm nđŭr njroh mprơ ta ƀon lan, Anging mbrơi mbrơi geh rnôk rgop măt ta âk nău ƀư văn hóa têh bah n'gor Gia Lai kơt ăp bôk nău kan nghệ thuật mbah rhơn năm mhe, nău kan mbơh tơih, tâm rgop pâl nđaih n'hanh bôk nău kan "Chĭng gong dŭt pơh" dơi ƀư ăp rơh ta Quảng trường Đại Đoàn Kết, phường Pleiku. Rup ndah bu klô Bahnar nđôch, măt ang tâm kho ao tanh, dŭt n'hâm đah gâr Hơgơ̆r lĕ n'glơi an âk nău uĕh tâm nuih n'hâm nuĭh uănh. "Ăp tơ̆ dơi tŭr goh ndơ uh goh way ơm, gâp dŭt n'hao êng săk. Gâp geh leo ăp oh kon se jê̆ tâm ƀon hăn tŭr chĭng goh gong ta nău ƀư wơt ndah rup Wa Hồ, mprơ nău mprơ chĭng gong kêng dŭt năm ta nkuăl Kbang (ơm). Kơt lah lĕ rngôch nău ŭch rŏng lĕ rgum tâm nău nteh gâr, nău nteh chĭng, nău nteh chĭng gong".

Đah Đinh Văn Anging, nău rhơn mô knŭng rlu ta ăp nău njroh mprơ jêh nĕ ăp tơ̆ tŭr goh. Nău păng mĭn rvê lơn lah mhâm ƀư gay nteh chĭng, nău mprơ bah rnoi nuĭh gâp mprơ tay tâm nău rêh nar aơ n'hanh jêh aơ tay. Yor kơt nê̆, rlău ma mông nar râng ăp nău ƀư njroh mprơ, nô an âk nău nsrôih ntĭm kon se jê̆ tâm ƀon rgum mprơ nău mprơ, ƀư bên đah chĭng gong, gâr Hơgơ̆r, đơn T'rưng n'hanh ăp ndơ uh goh nău way ơm.  “Gâp rgum ăp oh kon se gay nti mprơ n'hanh tŭr chĭng, yor mpôl hên way lah rơh mom aƀaơ knŭng ŭch nhạc mom, điện thoại thông minh, mhâm ƀư ma dơi gŭ djăt nteh chĭng n'gloh rêng mô lah bar pe nău mprơ jŏ jong bah u che. Yơn gâp saơ rơh druh ndăm tâm ƀon mô di lah mô ŭch, knŭng lah khân păng mô hŏ geh rnôk dơi dơm. Nŭih leo trong gay gĭt jru mpeh nău khlay bah chĭng gong ndrel nău mprơ.

Uănh oh kon hŏk jêt nar aơ lĕ têh, jêng du hê nŭh văn hóa bah ƀon lan, nghệ nhân Đinh Plơnh, bu ranh ƀon Đak Pơkao, xã Tơ Tung, n'gor Gia Lai mô dơi mpôn nău rngot n'hanh n'hao êng săk. Đah nuĭh nai lĕ an âk năm ntĭm nti tơm văn hóa bah rnoi mpôl, nău têh jêng bah Đinh Văn Anging mô knŭng lah nău dơi geh bah du hê kon se nti, ma hôm lah nău mpŏng mpeh nău nđơn tay đah ăp rơh kơn.  “Gâp lah ueh kon sau tâm ƀon lĕ nsrôih nti mprơ, tiăr nti chĭng gay văn hóa rnoi Bahnar mô geh roh rui. N'hanh Anging lah kon se mô dơn gĭt mât nău way ơm an êng nơm, ma hôm gĭt trong djôt nău way ơm luh ang gay nuĭh druh ndăm êng ƀa ƀă n’hanh saơ uĕh, ndrel ŭch ƀư tĭng. Ăp nău mprơ jêr, ăp nău chĭng đă nău nsrôih, păng lĕ nti dơi n'hanh nkoch trêng dŭt geh nău blău. Geh kơt nĕ ri trêng nti tay nău way ơm văn hóa bah kônh wa Bahnar mbra mô geh roh rui".

Ntơm bah nău rŏng dơi mât tâm ăp yan lễ hội ƀon lan, ntơm bah nău ntĭm nti jŏ jong bah nuĭh nghệ nhân hăn lor, Đinh Văn Anging nar aơ dôl ntik n'hao tay trong hăn mât ndray n'hanh ntĭm nti tay văn hóa Bahnar. Păng gĭt lah, drăp ndơ ơm yău n’glơi an dơn rêh rnôk dơi nsum mpôl uănh khlay, ƀư tĭng n'hanh nđơn trêng tay. N'hanh ăp kon se gĭt mprơ du nău mprơ, gĭt tŭr du gâl chĭng lah ntop tay du gâl nău mprơ dơi n'gôr gră ta ntŭk ntô văn hóa bah rnoi nŭh he.