Ăp nău nteh chĭng gong n'gloh n'gôr ta nkuăl yôk prêh, ăp nau tâm kuăl ty n'gŭr răm ta ŭnh su bah năp jâng gung bah ngih rƀŭn rgum, ăp ntil kao dã quỳ tâm lam jâng yôk prêh ndrel ăp blah bok tanh uĕh êng… Lĕ rngôch dôl tâm rnglăp, njêng du nau ơm yau văn hóa rêh uĕh, n'gŭr răm.

Festival Chĭng gong - Pơh lễ kao Dã quỳ - Yôk ŭnh Chư Đang Ya năm 2026 ta Gia Lai ƀư ntơm bah nar 30/10 tât 8/11, đah âk nău ƀư văn hóa, njroh mprơ ueh ta phường Pleiku, xã Biển Hồ n'hanh ăp ntŭk êng bâh n'gor Gia Lai.

 Rƀŏng tĭng nău kan văn hóa uĕh êng aơ, UBND xă Chư A Thai, n'gor Gia Lai ƀư na nao 3 măng njroh mprơ chĭng gong, sŭnh ŭnh n'hanh ndơ sa ta ăp thôn Plei Pông, Plei Hek, Glung Mơlan n'hanh Plei Ơi. Ta ta nglan thôn Plei Pông, đah ŭnh năk ŭnh ang, âk mpưm kônh wa ƀon lan n'hanh ăp nghệ nhân lĕ nchreng an uănh ăp nău njroh mprơ chĭng gong, njroh xoang mpơl nău tâm rnglăp, nău rŏng pah kan jan sa, rŏng ƀon tơm neh dak. Yuh Đinh Đjơn ta thôn Plei Pông, xã Chư A Thai mpơl nău:"Mô dơn êng săk nơm ma lĕ rngôch nuĭh ƀon lan tâm thôn lĕ rngôch rhơn ngăn, yor dơi tâm mâp, tâm nđur, mbơh tơih nău ueh văn hoá chĭng gong bâh nuĭh Bahnar nơm".

Lăp tâm ăp nău nteh chĭng, nău xoang n'gŭr răm, nuĭh ƀon lan n'hanh năch pâl nđaih hôm dơi ngêt ndrănh yăng n'hanh ăp ndơ sa way ơm bah nuĭh Bahnar kơt: byăp n’ha bum, puăch gŭch, piăng ba lŏ bah ƀon. Wa Đinh Byo - Bu ranh ƀon Plei Pông ŭch ngăn yor rơh druh ndăm dôl kơt tĭng tay nău way ơm văn hóa rnoi nuĭh nơm: "Gâp aƀaơ lĕ ranh hôm yơn râng tŭr chĭng ndrel ma ăp nuĭh tâm rmôt chĭng gong bah thôn. Tâm let năp tay, gâp mbra ntĭm nti kon sau nti tŭr chĭng gay mât ndray văn hoá way ơm bah nuĭh Bahnar ta xã Chư A Thai".

 Ta ƀon Ia Gri, xã Biển Hồ, nău nteh chĭng gong lơ ma n'gŭr răm rnôk nsum mpôl nuĭh Jarai ƀư rhơn ngih rƀŭn rgum mhe. Tâm ntŭk ntu huêng khlay, n’gâng njuh dơi geh ndâk ƀư, ndơ ƀư ôp bah dơi nchrăp, nău nteh chĭng gong n'gloh nteh kơt nău mbah rhơn, vơt nău ŭch rŏng đăp mpăn, mbo ba jŭr geh n'hanh nău rêh hơm răm.

Wa Pyui - Bí thư Chi bộ ƀon Ia Gri lah rjăp, ngih rƀŭn mhe mô knŭng lah ndơ ƀư ntung trong nău way ơm ma hôm lah nău ntoh ang bâh nău tâm rnglăp, ndrel rdâk njêng ƀon lan: "Nău khlay bah nău ƀư ôp brah ngih rƀŭn aơ lah gay ƀon lan mât ndray dơi geh drăp ndơ ơm yău bah rnoi nuĭh nơm, tâl bar lah mpla n’hơ pâl nđaih nsum mpôl tât năch pâl nđaih tâm n'hanh bah dih dak. Bar pe khay kônh wa jêr jŏt, nsum soan du nuih n'hâm ƀư dơi ngih rƀŭn aơ. Kônh wa rhơn nđơr yor dơi Đảng n'hanh Ngih dak ntop kơl an ƀon, nău way mbra hun hao lơn".

Festival Chĭng gong - Pơh lễ kao Dã quỳ - Yôk ŭnh Chư Đang Ya năm 2026 ta Gia Lai geh nău tât râng bâh bơi tât 1.500 nŭih, ndơ̆ tât ntŭk tâm mâp tâm nđur lưu nau ơm âk ntil. Nău nteh chĭng, gông, nteh gâr, nău mprơ xoang ndrel nteh bah ăp ntil ndơ uh goh way ơm, njêng nău nteh êng bah bri dak têh hvi.

Ndrel đah nĕ lah nău rgum bah nău uĕh tanh cheh way ơm, nŭih trah mon ndah rup way ơm n'hanh nău kan cheh tanh geh bah jŏ. Rgŏ jă nău kan aơ, wa Ngô Đức Mạo - Giám đốc ntŭk kan văn hoá - thông tin n'hanh thể thao xã Phú Túc, n'gor Gia Lai nkoch: "Mpôl hên săch ăp nghệ nhân geh nău blău ngăn ta ăp nău kan n'hanh tâm pă ta ăp xã geh nau blau êng. Kơt cheh tanh n'hanh ndơ uh goh ta xã Ia Dreh, nău blău trah mon rup si n'hanh tanh tôk n'hanh nkra chĭng ri ta ăp xã Ia Rsai, Phú Túc n'hanh Uar. Mpôl hên nsĭt tât nar rgum du bôk nău kan lĕ rngôch, gay nkoch n'hơ rup gui n'hanh săk tơm văn hóa bah nuĭh Jarai".

 Ntơm bah nău nteh chĭng gong n'gloh lam, ăp bok cheh tanh uĕh, ăp rup ndah tơm si geh âk ntil rup gui…ăp rup ndah rgop nkoch nău mpeh nău rêh văn hóa bah ăp rnoi nuĭh Gia Lai. Ăp nău uĕh văn hóa bah ăp rnoi nuĭh lŏ geh mât ndray, rgop nau ƀư jêng nau ueh êng bah nau rêh nkuăl yôk nar aơ./.