Tâm nklang mir điều ƀon Bi, xã Ia Dom, du blah neh lâng geh rep lơi dơm gay ma kơl an nau joi nting tahen khĭt. Ăp tơm điều lĕ geh play, lĕ jăk lơi tĭng nau đă bah nŭih tơm mir nê lah bu ranh Siu Pich, du hê tahen ơm tă geh tâm lơh tâm mpeh ba dâng.

Tâm ăp rnôk ƀư mir, wa Pich saơ geh ndơ tâm nâm neh mir, păng min lah geh môch tahen, ri ma păng mbơh ma n’gâng kan, tât leo trong ndrel ntĭm ntŭk gay tahen tât uănh. Bol ma mir điều nê lah ndơ gay leo nsĭt nau văng sa ân rnăk vâl, wa Siu Pich mô rvê, koh lơi, ân neh gay ma joi nting tahen tâm nâm nê:‘Tơm si bah ngih gâp geh kăl lơi ma gâp saơ nau ueh ơm, gâp mra koh, yor lah tahen nơm dôl hôm tâm neh kơt nê saơ yŭ ngăn”.

 Lăp tahen khay 11 năm 1975, tă tâm lơh tâm mpeh ba dâng, bu ranh Siu Pich gĭt nau jêr, nau klach bah rnôk tâm lơh kăl e ndrel ăp nau ji, roh hoach bah tahen lĕ khĭt. Ndri ma, rnôk tahen Đội K52 plŏ tay tâm nkuăl n’har bri aơ gay ma joi nting tahen, wa Pich kŏ kơt lah joi du gưl nau nkah bah săk nơm.

Bơi tât du khay ma aơ, mir điều ngai ma ngih nklăp 7 km jêng ntŭk păng hăn-ro mro. Ăp rnôk mông ru păng lŏ hăn ôp nau ndrel nkoch bri ma ăp tahen dôl ma ƀư nau kan. Tâm nklang bri duh nar, sial dăng bah nkuăl n’har bri, tahen ơm ranh hôm hăn uănh ngăn tâm ăp nau kan bah tahen nar aơ. Wa gĭt lah, tâm nâm neh, rnôk kuih, kuai nê lah du nau ŭch geh leo tay du băl tahen nơm sĭt:‘Gâp ŭch mhâm ƀư ăp ndrăng balư tahen geh sĭt ma rnăk vâl, lơn ma âk lơn ma ueh. Gâp saơ ăp oh nô tahen hăn joi nting tahen ơm kăl e kơt aơ yŭ ngăn ndrel jêr đŏng. Nar, sial yŭ ngăn, nau tâm ŭch tâm kơl ma ndrăng băl tahen kơt nê ri gâp saơ ueh khlay ngăn”.

 Ntơm bah nau mbơh yor bu ranh Siu Pich mbơh, cán bộ, tahen Phân đội 1, Đội K52, Jrâu kan Chính trị, N’gâng kan rđau tahen n’gor Gia Lai hŏ ƀư mêt uănh, năl ndrel ntrŭnh leo joi tâm mir điều.

Thượng tá Hoàng Viết Ngọc, Chính trị viên Đội K52 mbơh, tât rnôk aơ, rmôt kan lĕ rgum joi geh 16 nting tahen ndrel âk ntil ndơ geh joi saơ kơt lah: Nting, sêk, tăng, njao bah tahe. Ngăn lah, tâm nê geh nting geh moh săk Nguyễn Thanh Trì, khĭt lơ 18/5/1970. Aơ lah nau mbơh geh nau khlay, kơl an n’gâng kan lŏ năl moh săk ndrel joi băl mpôl bah ăp tahen: “Ntơm nau bah mbơh wa Siu Pich phung hên hŏ hăn uănh, jêh rnôk năl. Wa Siu Pich lah rnôk năm 1973 hŏ gĭt tât nkuăl aơ hôm. Jêh rnôk geh hăn uănh ri saơ geh pháp lý tŏng ăp ndrel geh nau dơi ri ma rmôt kan bah hên hŏ hăn joi ntơm lơ 5/10 tât rnôk aơ”.

Tâm xã Ia Dom, n’gâng kan tâm nkuăl dôl tâm rgop nsum ma Đội K52 bonh đă ƀon lan mbơh nau, kơl an mpeh ntŭk neh ntu ndrel pơk trong nơih ân nau kan rgum, joi nting tahen. Jêh rnôk hăn joi nting, nkuăl pă ntŭk ƀư ôp brah tâm Rnâng kan rđau kan tahen xã gay ƀon lan tât mpoh kthup, nkah ăp nŭih lĕ khĭt.

Wa Trần Ngọc Phận, Bí thư Đảng uỷ xã Ia Dom, mbơh, ăp nau yor ăp bu ranh ƀon, kruanh ƀon ndrel bu ranh âk năm nkoch mbơh dôl rgop nau khlay tâm nau joi ăp tahen tâm hôm tâm nkuăl: ‘Ăp bu ranh kăl e, ăp bu ranh ƀon, kruanh ƀon, ăp nŭih ranh nê kŏ mbơh âk ngăn nu nau khlay, phung hên lŏ tâm rgop nsum ma Đội K52, N’gâng kan rđau tahen n’gor mra ƀư ăp nau ueh ngăn gay leo ăp wa nê sĭt ma ƀon lan, sĭt ma neh me, ntoh nau nkah khlay ngăn đah ăp tahen hŏ khĭt, hŏ roh nting mham gay ma leo nsĭt nau đăp mpăn dah rong ân neh dak”.

Tâm Ia Dom, nau nkoch tât bu ranh ƀon, tahen ơm Siu Pich lah nau nkoch mpeh ăp nau nkah gĭt bah rnôk tâm lơh hôm geh mât tâm nuih n’hâm ƀon lan, mpeh nau kan bah tahen ê mâp huch suăt ndrel nau tâm boh tahen ƀon lan nâp nâl tâm nkuăl n’har bri. Tâm nkuăl neh n’har bri Gia Lai, ntrong hăn joi nê hôm geh ơm. Ăp tahen Độ K52 hôm hăn tĭng têl, nŭih ƀon lan hôm rgop n’hâm đah ăp nau ma nơm gĭt. Ăp nê ndrel nsum du nau ŭch leo ăp nŭih khĭt sĭt ma neh me, gay nau kâp bah âk rnăk vâl geh bah oi, gay nau tâm boh ndrăng băl tahen ndrel nau tâm boh tahen ƀon lan lŏ geh ang tay tâm nau rêh nar aơ./.