Ƀon Ia Nueng gŭ êp ntŭk têl ơm yău Biển Hồ, aƀaơ geh rlău 200 rnăk đah rlău 1.000 nuĭh, tâm nĕ nuĭh Jarai âk rlău 96%. Ƀon hôm e mât ndrăy âk nău way ơm, ngih klơ, ngih rƀŭn rgum, ntŭk tơm si hang rhiăng năm, ndrâm dak nau vay ơm ndrel ăp nau kan tanh njuh, trah si, tanh njuh, chĭng gong, ngêt sa.

Bah meng ăp rnoh khlay văn hóa, ndơ geh ƀư pâl nđaih nsum mpôl ƀon Ia Nueng dơi ndâk ƀư jêng trong hăn uănh pâl, rlong saơ bah Biển Hồ, mpông lăp ƀon, ngih ƀư nsum mpôl, ndrâm dak way ơm, nkual ƀư nău kan tât ăp ntŭk homestay. Tĭng trong hăn aơ, năch pâl nđaih dơi joi gĭt văn hóa chĭng gong, râng njroh xoang, rlong ƀư tanh njuh, cheh tanh; râng ăp nău kan tuch tăm kơt lah kăch rek ba, pâk mbo, ƀư piăng prung, n’gon  ndrănh yăng. Tâm yan cà phê, năch pâl nđaih mbra rlong ƀư ngăn klih, wâr, mpli n'hanh ngêt cà phê; nkre rlong sa ndơ sa ta ntŭk, tâm nđŭr ma nuĭh ƀon lan n'hanh joi gĭt nău rhŏ gŭ âm ta ntŭk rêh jêng.

 Đah nuĭh ƀon lan tâm ƀon, hun hao pâl nđaih nsum mpôl mô dơn pơk luh trong hăn mhe n'hao nău geh ma hôm njêng nău nsrôih mât rbăy, mbơh tơih nău kan way ơm n'hanh văn hóa rnoi mpôl an rơh druh ndăm. Yuh Rơ Lan Han, nuĭh ƀon lan Ia Nueng an gĭt: “Ŭch kônh wa mra ndrel nsum n'hâm, tâm rnglăp rgop nau hun hao pâl n'aih. nău rêh nsum mpôl âk lơn, tâm pă nău tă ơm gĭt kan cheh tanh an rơh druh ndăm gay ăp păng gĭt âk lơn nău way ơm yau ueh. An geh nău ntĭm nti ăp băl mom gay jêng ntĭm nti năch pâl nđaih gay khân păng gĭt n'hanh mbơh êng mpeh săk tơm văn hoá bah rnoi nuĭh Jrai”.

 Wa Đặng Khánh Toàn, Groi Kruanh UBND xã Biển Hồ an gĭt, ta ntŭk ntrŏng nuĭh ƀon lan lah nuĭh tơm tâm ndâk njêng n'hanh hun hao ndơ pâl nđaih nsum mpôl ƀon lan. Jêh aơ tă, xã Biển Hồ ƀư lôch jêh uĕh nâp nău leo ƀư hun hao lŏ mir, ndơ ngêt sa, ndơ nsoh way ơm, buăt nthoi đah ăp ntŭk ƀư nau kan leo trong hăn pâl ngai n'hanh ntrôl dăng nkoch n'hơ.

Nkre, tâm rgop ƀon Ia Nueng đah ăp ntŭk tât kơt Biển Hồ, Trong tơm n’ho rhiăng năm, yôk chè n'hanh yôk ŭnh Chư Đang Ya, njêng ăp trong hăn pâl nđaih, nău tâm rgop, rgop âk ntil ndơ n'hanh n'hao nău uĕh an pâl n’aih Gia Lai.

"Ƀon pâl nđaih ntŭk nsum mpôl Ia Nueng mpôl hên năl lah nuĭh ƀon lan lah nuĭh tơm ƀư bah ƀon pâl nđaih nsum mpôl, nuĭh ƀon lan nơm lĕ ƀư jêng văn hoá, jêng lŏ mir, ndơ geh ƀư kloh uĕh, tour, trong hăn pâl nđaih, ndơ uh goh gay ndrel đah Ngih dak gay ndơ̆ ndơ geh ƀư pâl nđaih nsum mpôl tât đah năch pâl nđaih. Ntơm bah nê kơl n'hao nău geh, đăp mpăn rnă njrăng chính trị, đăp mpăn lam rêh jêng kon nuĭh rêh đăp mpăn tâm ƀon lan, rgop nau leo Biển Hồ nar lơn hun hao."

 Lôch rnôk mbơh, đại biểu, nuĭh ƀon lan n'hanh ntŭk ƀư nau kan nsong hăn râng bôk nău kan hăn uănh, rlong gĭt ăp ntŭk văn hóa n'hanh ăp nău ƀư tiăr nti ăp ndơ geh ƀư pâl nđaih nsum mpôl ta ƀon Ia Nueng./.